3 Judas onọnọ inu ema ekirọ, ọmọ melek urum akọn̄ ejijibi akọn̄ isibi isisi itim akọn̄ me lek urum akọn̄ ogwu ubọọn̄ ya òkup me Emayọs, 4 me mgbọ urum akọn̄ kè Gọgiyas onan̄abe isibi me orieen̄ akọn̄ eyi kiban̄. 5 Mgbọ Gọgiyas onire ere orieen̄ akọn̄ kè Judas, ìkamun̄ kubọk ene ge. Ibebene ikiweek ebi Ju cha me inyọn̄ ogoon̄, mè ikibe, “Ife chi mêkilim inan̄a me lek kiji.”

6 Me lek obum egwe, Judas orere lek òla ijọn̄, ọmọ melek obop ene ita ebi melek kan̄, ire, ema kpekaan̄ nroon̄ akọn̄ mè oge akọn̄ iso ubọk ike îgbebe. 7 Ema emumun̄ urum akọn̄ ebi ofifi ido cha, nroon̄ akọn̄ ìsoso ema lek, ebi akọn̄ inyọn̄ inyinya ekeke ikwek ema ikat ikana, urum ebi akọn̄ ìkwekween̄ ukot akọn̄ ijaan̄. 8 Ire, Judas otutumu inyi ebi melek kan̄ cha ibe “Ikatet ukpook me lek otu ifuk kiban̄, ikafefieek si owot mgbọ ema isijibi akọn̄ inin̄ enyi lek. 9 Ìkeek ubọk Awaji onyan̄abe ebi nte nte kiji me okwaan̄ Anyiaan̄, mgbọ ogwu Fero mè urum akọn̄ kan̄ egọọkbe ema. 10 Mgbọ keyi, eji etaan̄ ukpo egwen Awaji òkup me emen inyọn̄, mè ekpọ-nu, mè ìre môkaan̄ ata ejit me lek kiji, mè ikeek inyan̄a-ibot kan̄ melek ebi nte nte kiji, mè ijijaka urum akọn̄ keyi òkup eji me isi cherekeyi. 11 Sa me ikeyi, otutuuk ebi ofifi ido mêneniriọọn̄ ibe ke ebi Ijeren mîkaan̄ ogwu òkifaka ema isibi, mè ikinyan̄a ema.”

12 Mgbọ ebi ichen cha ebenebe chieen̄ imun̄ ebi Ijeren ekinu me lek kiban̄, 13 ema enanan̄a me orieen̄ akọn̄ kiban̄ isibi isisi itim akọn̄ me lek kiban̄. Ebi melek kè Judas ewuwut otita, 14 mè ijibi akọn̄ inin̄ ema lek, mè itim ikpan̄ ebi ofifi ido cha. Ife cha elilim ifon agan̄ òla ijọn̄. 15 Otutuuk ebi kiban̄ ìje me udun̄ ekwakwaan̄ me otu oge akọn̄. Ebi Ijeren egọgọọk ema isi igwook me Gejeri, mè ililaba ema isi ire lek òla ijọn̄ Idumia, mè iraka isi ire Ajọtọs mè Jaminia. Obop ene ita me etete kiban̄ ekwakwaan̄ irurọn̄ọ. 16 Judas mè urum ebi kan̄ egwugwu ikom, mè itele igọgọọk ema. 17 Judas otutumu inyi ebi ene ibe, “Ikamin ejit ifufum inu, mije, akọn̄ òwa me isi kiji ititim. 18 Gọgiyas òwa melek ebi akọn̄ kan̄ me lek ogoon̄, kpejọn̄ọ ere me lek kiji. Ìdasi ìnan̄a ìkeke ìtim akọn̄ me lek ebi ochicha kiji. Enyi isitim ifieek, ìtolek ìnifum inu ubọk òneneme enyi.”

19 Ikọ ya òkitata Judas me otu, urum ebi ochicha ebi ìkinikpọ ere ekakana isibi me inyọn̄ ogoon̄. 20 Ife cha emumun̄ ibe ke mîrieen̄ ebi kiban̄ isan̄a, ke ebi Ju mîtap ukan̄ me lek uwu ọfọ kiban̄ cha, mije, ema mîmun̄ oduku okibumu, mè isa me ikeya iriọọn̄ inu òrọrọ. 21 Inu ema emun̄be ya otetet ema ukpook enenen. Ofifi si, mgbọ ema emun̄be urum akọn̄ kè Judas me lek òla ijọn̄ ya ekekebe egbe egbe, 22 otutuuk kiban̄ elilim inin̄ agan̄ ido Filisia. 23 Judas onenigwu ikom isi ifum ere orieen̄ akọn̄ kiban̄ ya, ema ekpukpulu ogbogbo alata araran̄ mè alata okuket, mè ekwut ekpan̄be chieen̄ ikup oluku oluku mè echi òkup eje eje, mè owuwa inu ubọọn̄. 24 Mgbọ ema ekabe inu, ema ekekikọt okwa itọn̄ Awaji òkup me emen inyọn̄ ibe: “Mije, ọmọ înwọn, nsan kan̄ ìkukup ire mgbọ geelek.” 25 Usen ya, ebi Ijeren mîkaan̄ ikpele unyan̄a.

26 Ebi ichen ebi ìkọkọt ilibi inwọnọ esisi ilook Lisias otutuuk inu geelek òrọrọ. 27 Etip ya oririki ọmọ lek, mè ifieek ọmọ ejit, mije, inu òrọrọ me Ijeren ìkare ubọk ọmọ okeekbe, ìkarere si ike ogwu ubọọn̄ onyibe ida. 28 Eya orọ, ofifi acha, inenigobo akọp obop ebi akọn̄ ukot ukot gweregwen, mè obop ebi akọn̄ inyọn̄ inyinya go, ibe esi etim akọn̄ me lek ebi Ju, mè etim ekpan̄. 29 Ema ejeje inire ido Idumia, mè igwugwuun̄ uwu ọfọ kiban̄ me Bet Suru. Me ere ya, Judas osasa akọp obop ebi akọn̄ inichichini ema. 30 Mgbọ Judas omun̄be ubọk ebi akọn̄ ife cha enyebe lek, irariaak uriaak ibe, “Itọn̄ ikup inyi owu Ogwu Unyan̄a ebi Ijeren, ogwu òtọtọbọ unye ogwu isi akọn̄ ebi Filisia ikpọk sa me ubọk gwun̄ ikwaan̄ kwun̄, Debit, mè ikana orieen̄ akọn̄ ebi Filisia itap me ubọk kè Jonatan gwun̄ kè Sọọlu, mè ubọk ogwu òkibeme nroon̄ akọn̄ kan̄. 31 Mgbọ keyi, kana si ebibi tap me ubọk ebi kwun̄ ebi Ijeren, inyi ikpele urum akọn̄ ukot ukot mè eyi inyọn̄ inyinya ema esabe inu ikana inu esip inyi ema. 32 Rọ inyi ema ekana ebi ukpook owot. Rọ lek kiban̄ iwọ, mije unye kiban̄ ema esabe itoon̄ ejit, inyi mbiribọ igwook ijot ema lek mgbọ mêtimbe ikpan̄ ema.

33 “Sa oge akọn̄ ebi ìmama owu sọp ema gwook, inyi otutuuk ebi ìrọriọọn̄ erieen̄ kwun̄ ekọt okwa etọn̄ owu.”

34 Urum akọn̄ iba cha ebebene akọn̄ me lek kiban̄, obop ene go me lek urum akọn̄ kè Lisias ekwakwaan̄ me etim ubọk ubọk. 35 Mgbọ Lisias omun̄be ibe ke mîrieen̄ ebi akọn̄ kan̄ ikpebe, mè imun̄ unye-ejit ebi akọn̄ kè Judas ekaan̄be, mè ike ema ebembe lek iluluk ugwem mè ìre ikwukwu mkpa kubọk ebi akọn̄, ikpekpebe lek ifo Antiọk. Ere keya ke îbọkọ ebi akọn̄ ebi ọkọ isọkọ, inyi ọmọ ikaan̄ urum akọn̄ òmimin igak eyilọ, mè isa ikpọk isi akọn̄ me Judia.

36 Judas mè ebi ngwan̄ enenibe, “Mgbọ keyi, eji mîkpan̄ ebi ochicha kiji isan̄a. Eji enesi Jeruselem esi egwọk lek Uwu Mbuban, mè efaka etap me ubọk Awaji.” 37 Otutuuk urum akọn̄ enenititiin̄, mè ije inene isi ogoon̄ Sayọn. 38 Ema esisi ire, mè imun̄ Uwu Mbuban olaakbe ukpọk ukpọk kubọk emen èwê. Ntook, mîchichaka mbuban me lek; otunchit, mîwọp igbugbọ igwook; emen oyet egep, uti îtibi ichit kubọk oron, mè ìre kubọk ibot ogoon̄; agwut ebi ngwugwa ekisun̄ inu, mîjijaka igwook. 39 Ema egwagwak ofọnti me lek kiban̄, mè ifieek ejit ito ito enenen, mè igwọ ntọn̄ igwook me ibot, 40 mè ilaak inyana me ijọn̄ ikana isi ichit. Mgbọ otita otaan̄be inyi ulook, ema edidimi ukpo ito ito igwen Awaji òkup me emen inyọn̄.

41 Judas oraria ebi kan̄ ibe etim akọn̄ me lek ebi akọn̄ ìkup me uwu mgban akọn̄ ya mege mêgwọkbe lek Uwu Mbuban isan̄a. 42 Inenigobo ebi ngwugwa ebi ìtetet Ikan inye, kpekaan̄ nrọ-nlọ geege me lek, 43 ibe egbama lek Uwu Mbuban, mè ekpulu okpọkọ ewuuk cha echakabe mbuban me lek esi egwook me ere ikakupge me mbuban. 44 Ema enenitọt ubọk eberọ ntook ngwugwa ewọwọp ya eyi efifilabe. 45 Ema enenikana igwook ibe ke inu òtatat ichit irọrọ ìre igbugbugbọ ntook ya igwook, ufuna ikakana inu esip ìnyi ema ibe ke ebi ofifi ido mîfifila ntook ya. Ema egbugbugbọ ntook ya, 46 mè ikpulu okpọkọ ewuuk kan̄ isi igwook me ere ògbegbe me inyọn̄ ogoon̄ Uwu Mbuban, ikikpọ mgbọ ogwu nriran ge môkanabe isibi initumu inu mêsabe ewuuk cha irọ. 47 Ema enenikpulu ewuuk echi kpebabak, ike Ikan otumube, mè isa inama ayaya ntook kubọk eyi oka ya. 48 Ema mînama si ere ògbugbugbọ me lek Uwu Mbuban, mè emen uwu ya, mè igbana oyet egep ya. 49 Mîrom si ayaya nroon̄ ikwaan̄ mbuban, mè isa ngugọọn̄ mkpukan̄, mè ntook nsensi, mè ikasi Fituru Isi Awaji initaak me Uwu Mbuban. 50 Ema eneniwọp nsensi me inyọn̄ ntook ya, mè imin mkpukan̄ cha me inyọn̄ ngugọọn̄; echichi oneninyi utoon̄ me emen Uwu Mbuban. 51 Ema enenitoon̄ fituru me inyọn̄ ikasi ya, mè ijijen ekwut isotu, mè irọ otutuuk ikwaan̄ ema ebenbe me ejit isan̄a kpai.

52 Me òso akọp usen iba mè go, mè òso onyan̄ onaan̄ge, òrere onyan̄ Kisilep, mè acha efit mè akọp ini mè jeeta, ema enanan̄a ikeke me obum egwe, 53 mè inigwa ngwugwa me inyọn̄ ayaya ntook ema enamabe ya igọọk me lek Ikan. 54 Me ibot mgbọ yaage, mè otu ifuk usen yaage eyi ebi ofifi ido efifilabe ntook ya, ema egbagbana ntook ya, mè isa uneen̄ mè òja mè mkpamkpa ikọt okwa ifit ifit. 55 Otutuuk ene erururọn̄ọ inyana ikana isi ichit me ijọn̄ itọbọ ebum, mè ikitọn̄ Awaji òkup me emen inyọn̄ ogwu òrọrọ inu ije ijaan̄ me lek kiban̄. 56 Egwe jeeta ke ema ekup me lek ijọk igbagbana ntook ya, mè isa me unwọọn̄ ikigwa ngwugwa ewọwọp, mè ngwugwa esuuk, mè ngwugwa onirọ. 57 Mîsa alata araran̄ itọkọ ajakajak, mè isa ibala isi Uwu Mbuban ya, mè inama ere geelek ògbugbugbọ me lek otunchit geelek, mè agwut ebi ngwugwa, mè itaak afọn̄ iso me lek. 58 Unwọọn̄ omimin me etete kiban̄ enenen, esip ebi ofifi ido etaakbe ema me isi cha otata.

59 Judas melek ebi ngwan̄, mè otutuuk urum ebi ene, enyinyi ikan ibe usen egbanabe ntook ya ikire usen ijọk me acha geelek me ibot mgbọ ya. Mêkirie ijọk ya, mè ikinwọọn̄ unwọọn̄, mè ikibele ejit usen jeeta bene me akọp usen iba mè go me onyan̄ Kisilep.

60 Me mgbọ ya, ema eneninama mgban òbebene melek uwu-oket ònyenye ikana ogoon̄ Sayọn, inyi ebi ofifi ido cha ekayaka ìkọt ìsaba ìnin̄, mè ìnijak ema ìkpukpuku kubọk mgbọ òraraka. 61 Judas onenisun̄ urum akọn̄ me ere ya ibe ekebem. Înama si mgban ikana ama Bet Suru, inyi ebi Ijeren ekaan̄ unye mgban òkwekwek ema me agan̄ òkikpọ ido Idumia.