3 Eya orọ, Judas otitim akọn̄ me lek bọn kè Isọ me ido Idumia, mè ijibi akọn̄ inin̄ me agan̄ Akarabatene, mije ema ekikpa mbin akọn̄ ikana ebi Ijeren. Îkpan̄ ema nsebe nsebe, lek kiban̄ owọwọ, ifufum inu kiban̄ irak. 4 Îkeek si inu ikpak bọn kè Bayen, ebi ìkup kubọk ufe inyi ebi Ijeren erọbe. Ife chi ekilileek me oniin̄ ikirọ ebi Ijeren nnaan̄. 5 Igogon ema ikam me emen uwu-oket kiban̄ cha, mè ikpa mbin akọn̄ ikana ema, mè inyan̄a ibot ikpakpan̄ ema isan̄a, mè itap ukan̄ iwọp uwu-oket cha melek otutuuk ebi ìkup me emen itaka iriọk isan̄a kpai. 6 Inenisaba itoon̄ me lek ijọn̄ ebi Amọn, mè itoon̄ me lek urum akọn̄ ònyenye mè iwa, melek Timọti ogwu isi akọn̄ kiban̄. 7 Ititim owuwa akọn̄ me lek kiban̄, mè itim ikpan̄ ema, mè ikpan̄ ema igwook. 8 Îtim si akọn̄ ibọkọ ama Jajeri mè asabọn ama kan̄ isan̄a, mè inika inu me Judia.

9 Ebi ofifi ido ìkup me Giliadi enenigbaan̄ itọbọ ibetim akọn̄ me lek ebi Ijeren ìkiluk me lek ijọn̄ kiban̄, inyi ekpan̄ ema esan̄a. Ebi Ijeren cha elilim isi ileek me uwu mgban̄ akọn̄ me ama Datema, 10 mè iria ikpa ijet Judas mè ebi ngwan̄ ibe, “Ebi ofifi ido ìluk ikana eji, mîgbaan̄ itọbọ ibetim eji akọn̄ me lek, inyi ekpan̄ eji esan̄a. 11 Ema mêkineen̄ lek isasa akọn̄ inibọkọ uwu mgban akọn̄ ere eji elilimbe inileek. Timọti ore ogwu isi akọn̄ kiban̄. 12 Soso, ìgwat lek ìna ìninyan̄a eji ìsibi me ubọk kiban̄, mije, owuwa ebi kiji mîra ikwakwaan̄ iraka me ubọk kiban̄. 13 Mîkpan̄ si otutuuk ebi kiji ìkiluk me agan̄ Tobu isan̄a kpai, mè ikpulu ebibaan̄ kiban̄ mè nsabọn kiban̄ me usun̄ akọn̄, mè ikpulu si otutuuk inu ekaan̄be isak, mè ikpan̄ iso obop ene me ere ya.”

14 Mgbọ ekifuk ikpa ya, ofifi ebi etip, ofọnti ogwakbe me lek, enanan̄a me agan̄ Galili, isa si chieen̄ etip yaage inu, 15 mè inibe, “Ebi Tolemayas, mè ebi Taya, mè ebi Saidọn mîgbaan̄ itọbọ melek otutuuk ebi ofifi ido ìkiluk me Galili ibenikpan̄ eji isan̄a kpai!” 16 Mgbọ Judas mè otutuuk ebi ene enọbe etip chi, ikpele urum ebi ene etititiin̄ itọt inu ema eberọ inyi ebi kiban̄ ebi ebi ochicha ekisisaak, mè ikitim akọn̄ me lek. 17 Judas otutumu inyi ogwu ngwan̄, Saimọn, ibe, “Gobo ebi kwun̄ sa si agan̄ Galili si nyan̄a ebi kiji. Ngwan̄ n̄a, Jonatan, melek n̄a mêsi agan̄ Giliadi.” 18 Inenitele Josefu gwun̄ kè Jekaraya, melek ogwu ibot kiban̄, Ajariya, melek ebi akọn̄ ebi ìsisik, ibe ekup me Judia ekebem ere keya, 19 mè inyi ema ida ibe, “Ìkpọ chieen̄ me lek kè ebibi, mè ikasi akọn̄ me lek ebi ofifi ido mege eji mêkabe.” 20 Eneninyi Saimọn obop ene ita ibe isa isi Galili, mè inyi Judas obop ene jeeta ibe isa isi Giliadi.

21 Saimọn ojijibi inin̄ agan̄ Galili, mè itim owuwa akọn̄ me lek ebi ofifi ido, mè ikpan̄ ema nsebe nsebe. 22 Îgọọk ema isi ire otunchit ama Tolemayas, mè ikpan̄ ene môsobe obop ene ita, mè ifum inu kiban̄ irak. 23 Inenikpulu ebi Ju ìkup me Galili mè Aribata, melek ebi nwa mè nsabọn kiban̄, mè otutuuk inu ema ekaan̄be, mè isa ema ika inu Judia me uga unwọọn̄.

24 Me ike mgbọ ya, Judas Makabiyọs mè ogwu ngwan̄ Jonatan enenisaba okwaan̄ Jodan, mè isa egwe ita ije itibi emen èwê. 25 Ere ya, ema emumun̄ ebi agan̄ Nabatiya, ebi ìrọrọ ema me lek esuuk esuuk, mè ikpa otutuuk inu òkirọ ebi ngwan̄ kiban̄ me Giliadi inyi ema. 26 Ebi ife cha etumu inyi ema ibe, “Mîgoon̄ owuwa ebi kinyi me mkpọn me Bojira mè Bosoru, mè Alema, mè Kasifo, mè Makedi, mè Karanayim; otutuuk chi ìre ama ile mgban okanabe. 27 Usini ene ke egoon̄ me ama kechilọ me agan̄ Giliadi. Ebi ochicha cha ekitọt isisi akọn̄ me ama mgban ònyenye cha me iyakwut òbowele, mè ibọkọ ama cha, mè ikpan̄ otutuuk ebi ìkup me emen isan̄a egwe ge gaalek.”

28 Judas inọnọ ikeya, ọmọ mè ebi urum akọn̄ kan̄ egwagwat lek igwu ikom isi ije me oniin̄ emen èwê isi Bojira, mè itim akọn̄ ibọkọ ama ya, mè isa oge akọn̄ ikpan̄ otutuuk ebirieen̄ geelek ìkup me emen, mè ifum inu geelek isan̄a me emen, mè itap ukan̄ iwọp ama ya. 29 Mgbọ egwe ofitbe, ema esisibi me ama keya, mè ije mege inire lek uwu mgban akọn̄ ama Datema. 30 Me obum egwe ya, ema ekpọkpọ, mè imun̄ urum ene kperiọọn̄ otu ifuk, ebeen̄be obeek mè nroon̄ ekisa igbugbọ mgban isa ikinu ibesa initim akọn̄ ibọkọ uwu mgban akọn̄ ya, mè ikibene akọn̄ me lek mgban ya. 31 Mgbọ Judas omun̄be ibe ke akọn̄ îbene me lek uwu mgban akọn̄ ya, mè inọ ida ukpo akọn̄ melek ida otita mè ikpele okput okitaan̄ ifo Akpabin inyọn̄, 32 itutumu inyi ebi urum akọn̄ kan̄ ibe, “Ìtim akọn̄ cherekeyi me ibot ebi ido kinyi!” 33 Ineniche ebi kan̄ urum ita, mè ijibi inin̄ me agan̄ udun̄ ebi ochicha cha. Ema ekekiwut otita, mè ikitaan̄ ukpo iriaak uriaak unye unye. 34 Mgbọ ebi urum akọn̄ kè Timọti emun̄be ibe ke ìre Makabiyọs ire ya, ema elililiin̄ inan̄a me isi kan̄. Makabiyọs okpakpan̄ ema nsebe nsebe. Ebi ochicha ìkwakwaan̄ me usen ya mêso obop ene jeeta.

35 Judas osasa ebi kan̄ inan̄a isi Alema,^a mè itim akọn̄ ibọkọ ama ya, mè ikpan̄ otutuuk ebirieen̄ ìkup me emen isan̄a kpai, mè ifum inu kiban̄, mè itap ukan̄ iwọp ama ya iriọk. 36 Ineninan̄a si me ere keya isi itim akọn̄ ibọkọ Kasifo, mè Makedi, mè Bosoru mè ama kechilọ cha òsisik me Giliadi.

37 Mgbọ echichi orakabe, Timọti ojijibi si ofifi urum akọn̄ mè inirieen̄ akọn̄ me ere òkibene isi ikpọ ama Rafọn, me usaba agan̄ okolo ge me ere ya. 38 Judas oraria ebi enun̄unun̄ isibi ibe esi ekpọ-nu orieen̄ akọn̄ ya. Esisi, mè ika inilook ibe, “Otutuuk ebi ofifi ido ìluluk ikana eji mîgbaan̄ itọbọ melek kan̄, urum akọn̄ ya îmin enenen. 39 Ema mîbọkọ si ebi Arabu me ọkọ ibe enetap ubọk enyi ema. Ema ekup me usaba okolo, ema mîbem lek isan̄a inunu initim owu akọn̄ me lek.” Judas osisibi isi ikweek ema.

40 Mgbọ Judas okije igbet lek okolo ya, Timọti otutumu inyi ebi ibot akọn̄ kan̄ ibe, “Ire ọmọ ya idasi kiji isaba okolo yi, eji kpebekọt ibieen̄ ọmọ ikpebe, mije, ọmọ ìkpolọlọ ititim ikpan̄ eji. 41 Ire, ire ifieek owot, mè ibia me usaba okolo agan̄ keyilọ, eji mêsaba igọọk ọmọ, mè itim ikpan̄ ọmọ.” 42 Mgbọ Judas orebe lek okolo ya, itoto ebi ibot akọn̄ me lek okolo ya, mè inyi ema ida ibe, “Ikachieek ibe ene geege igwuun̄ uwu ọfọ, ìmun̄ ibe ke otutuuk ene mîsibi isi akọn̄!” 43 Ọmọ me lek kan̄ odadasi isaba okolo ya itoon̄ me agan̄ ebi ochicha ekupbe, otutuuk ene esasaba igọọk. Otutuuk ebi ofifi ido cha eyiyiyala, mè itọọn̄ nroon̄ akọn̄ kiban̄ ifiin̄, mè ililim isi ilileek me emen àwa yọk me Karanayim. 44 Judas mè ebi kan̄ eninin̄ ama ya, mè ibọkọ, mè itap ukan̄ iwọp àwa ya melek ebi geelek ìkup me emen itaka iriọk. Sa me ikeya ke etim akọn̄ ikpan̄ ama Karanayim, ebi ochicha cha kpekọt iyaka ikeke ida Judas ofifi.

45 Judas onenititiin̄ otutuuk ebi Ijeren ìkiluk me Giliadi, ibene me lek ebi ijija ire lek ebi ilile, mè ebi nwa mè ebi bọn, mè inu ema ekaan̄be, mè ikpulu ema isa ikika inu Juda, urum ene ya îmin enenen. 46 Ema enenire Efurọn, ama ile òkup me agba oniin̄ agan̄ iba, enamabe mgban ònyenye enenen ikana. Ema kpekọt ije ikana ama ya, mè ìre me agan̄ ujit, mè ìre me agan̄ ulom. Otutuuk oniin̄ òkukup ìre ijeje itibi emen ama ya. 47 Ire, ebi ama ya ekwekwek ema ibe ekaraka, mè isa ewuuk igbugbala ichit otunchit ama ya.

48 Judas oneniria etip me ata ejit ijet ema ibe, “Soso, ìtele eji eje eraka me lek ijọn̄ kinyi efo lek ijọn̄ kiji, ke eji kpebesak enyi unan geege me lek. Eji ekiweek ijeje iraka gaalek.” Ire, ebi ama ya kpechieek ichichili oniin̄ inyi ọmọ. 49 Eya orọ, Judas onyinyi ida ikana ibe otutuuk urum ene cha ekeke me ere ema ekupbe. 50 Ebi akọn̄ emọmọnọ irek kiban̄. Judas osasa ikarek ya mè eririeen̄ itim akọn̄ me lek ama ya, Awaji okakana ama ya itap ọmọ me ubọk. 51 Isasa oge akọn̄ ikpan̄ otutuuk ebirieen̄ ama ya isan̄a kpai, mè iwọp ama ya ire ijọn̄, mè ifum inọọn̄. Ema enenije me inyọn̄ ebi ìkwakwaan̄ cha iraka itibi ama ya.

52 Ema enenisaba okwaan̄ Jodan inin̄ me lek ikpele òla ijọn̄ òkikpọ ama Bet San. 53 Otutuuk mgbọ ya, Judas ìtetet lek inye ikikwọọk ebi ìkije me udun̄, mè ikitap ebi ene efuuk me owot, mege ema enube inire lek ijọn̄ Juda. 54 Ema enenisa me unwọọn̄ mè ubelejit inene ogoon̄ Sayọn, mè inigwa ngwugwa ewọwọp mije ema ekabe me utelelek, ene geege me etete kiban̄ ìkakwu.

55 Mgbọ Judas mè Jonatan ekupbe me Giliadi, ngwan̄ kiban̄ Saimọn okupbe me Galili ikitim akọn̄ me ama Tolemayas, 56 Josefu gwun̄ Jekaraya, mè Ajariya, ebi ibot urum akọn̄ òkup me Juda, enọnọ inu ofolek ikwaan̄ unye-ejit ebibilọ esibe, mè ubọk enyebe lek itim akọn̄ itọn̄ọ ene isi, 57 ema enenibe, “Eji enesibi esi akọn̄ me lek ebi ìluluk ikana eji, inyi erieen̄ kiji si igọọk itaan̄ etip.” 58 Ema enyinyi urum akọn̄ òkup me irak kiban̄ ida, mè inijibi akọn̄ isi ama Jamina. 59 Ire, Gọgiyas osasa ebi akọn̄ kan̄ inan̄a me ama ya isibi inikweek ema, 60 mè ililaba Josefu mè Ajariya inire otubọk ijọn̄ Juda. Me usen ya, ebi Ijeren ìkwakwaan̄ mêso obop ene iba. 61 Akọn̄ ofefieek ema ikpele ikpele, mije, ema ekiweek ibe erieen̄ kiban̄ itaan̄ etip me akọn̄, kpegban̄ utọn̄ inyi Judas mè ebi ngwan̄. 62 Ema si kpere ebi owot iman ya, ebi Awaji ogobobe isasa inyan̄a ebi Ijeren isibi.

63 Ire, me otutuuk Ijeren, mè etete ebi ofifi ido geelek, ere geelek enọbe erieen̄ kè Judas mè ebi ngwan̄, ekinyinyi ema ikpele umin. 64 Ebi ene ekitititiin̄ ikana ema, mè ikitọn̄ ema.

65 Judas mè ebi ngwan̄ enenijibi akọn̄ isi lek ebi Edọm me ido agan̄ osiki, mè itim akọn̄ me lek ama Eburọn mè asabọn ama kan̄, mè igbugbọ uwu mgban akọn̄ kiban̄ cha, mè itap ukan̄ iwọp uwu-oket kiban̄ cha me agan̄ geelek.

66 Ineninan̄a me ere keya isi ido Filisia, mè ije itibi ama Marisa.^b

67 Me usen ya, usini ebi ngwugwa, ìweweek irọrọ inu òborọ ema etaan̄ etip, mîkwaan̄ me akọn̄ bak me lek ema ejebe ndide ndide isi akọn̄.

68 Judas ojijibi akọn̄ ikana isi agan̄ Ajọtọs me ido Filisia, mè igbugbọ ntook ngwugwa kiban̄ igwook, mè itap ukan̄ iwọp mkpọmfaka awaji kiban̄ cha itaka iriọk, mè ifum ama cha irak, mè igwu ikom ika inu Juda.