Usini mgbọ mîkimọnọ ikpa yi kubọk ibot gweregwen me lek ikpa kè Baruk.

1 Eyi ìre chieen̄ ikpa yaage Jerimaya oriabe ijet ebi usun̄ akọn̄ ebi ogwu ubọọn̄ Babilọn okpulube ibosa ifo Babilọn. Ìge ikpa yi isasa ilook ema etip eyi Awaji onyibe Jerimaya ibe ilook ema.

2 Bak me lek ijo inu enyi erọbe me isi Awaji, Nebukadineja, ogwu ubọọn̄ Babilọn, môkpulu enyi me usun̄ akọn̄ isa ifo Babilọn. 3 Enyi isire Babilọn, enyi mêkup me ere ya owuwa acha; môbọkọ mgbọ enenen iso ukot ukot jaaba. Mgbọ isikem, mânenisa enyi inan̄a me ere ya ika me esuuk. 4 Me Babilọn, enyi mêmun̄ awaji esabe alata okuket irom, mè echi alata araran̄, mè echi uti, echi ebilene ekibeen̄ me oguga, òkitap ebi yọk ukpook igak lek. 5 Ìgbala chieen̄, ikagọọk ebi ichen cha ìrọ inu ema ekirọ, ikatetet si ukpook me lek awaji kiban̄ cha, mgbọ enyi isimun̄ urum ebi ìkup me isi mè ebi ìkup me udun̄ ekitọbọ ebum inyi awaji cha. 6 Ire, ìkitumu me emen ejit kinyi ìbe, “Jei Okumugwem, îre owu ke eji ebetọbọ ebum inyi.” 7 Mije, ogwu osat n̄a òwa melek kinyi okikpọ chieen̄ me lek ebek ugwem kinyi.

8 Ogwu usọ okwuk alọm mkpọmfaka cha irọt, mè isa alata araran̄ mè alata okuket ichọkọ ichit lek kiban̄. Ire, ema ìre mkpọn̄kpọn̄ awaji, kpekitumu ikọ. 9 Ebi ene ekirom okpibot ubọọn̄ alata araran̄ isa ikwuun̄ me ibot awaji kiban̄, kubọk ekirọ inyi gwun̄ enenwaan̄ òkima inu mbala-lek. 10 Usini mgbọ, ebi ngwugwa yọk cha mîkichichim alata araran̄ mè alata okuket òkup me lek awaji cha inyiaan̄ irie me lek kiban̄, 11 mè ikisa me lek iche inyi ebi òje oyet uwu yọk. Ema ekitaak ofọnti me lek awaji alata araran̄ kiban̄ cha, mè echi alata okuket, mè echi uti, kubọk ìre ebilene. 12 Ire, ubọk geelek ibe ke mîtaak ema ofọnti irio irio kubọk ebi ubọọn̄, ema kpekikọt ikpọ chieen̄ me lek kiban̄. Achiaan̄ mè ǹyak ìkitataka ema ifiat isan̄a. 13 Mfuun̄ emen uwu yọk isigwook ilobo me isi kiban̄, ogwu ebilene okisi ituku isan̄a. 14 Ebi kè awaji cha ekitet okuba ikaan̄ me ubọk kubọk ogwu mkpulu ido, ire, kpekikọt isulu ene geege òrọrọ ema inu unaan̄-ejit ikpan̄. 15 Ema mîkikaan̄ òsọnsi me ubọk agan̄ ulom, mè ikikaan̄ si otuban, ire, kpekikọt isa inyan̄a lek kiban̄ me ubọk akọn̄ mè ebi inọ afa. 16 Echichi ìkijeen̄ ibe ke ema kpere awaji kubọk ge. Eya orọ, ikatet ukpook me lek kiban̄.

17 Otin̄ ekisa irọ ikwaan̄ isibum, ìkayaka ìkikup me lek inu geege. Ikeya ke awaji ebi yọk cha ekup. Ekpọkpọ iyik ikecha ibia me emen uwu yọk cha. Mfuun̄ ukot ebi ìkinin̄ uwu cha okifuku ibene îra ikininin̄ ijot awaji cha chieen̄. 18 Ike ekigon otutuuk otunchit uwu ogwu ubọọn̄ ikwek ene geelek òrọrọ ogwu ubọọn̄ ilọ, etitip oyerebet mkpa, ikeya ke ebi ngwugwa yọk cha ekigon afọn̄ mè akpo mè olọkọrọ me lek uwu yọk cha ikam, inyi ebi inọ ekanichiin̄ awaji cha. 19 Ebi ngwugwa yọk cha ekimin mkpukan̄ iwa iyiyik inyi awaji cha, echi ìkakimun̄ mkpukan̄ cha geege, igak echi ema ekimin inyi lek kiban̄. 20 Ekitumu ibe ke nkarankat îtaka ejit kiban̄ igwak. Ema ekup kubọk ogbugboon̄ uwu yọk cha, mije, ike nkarankat okitaka ogbugboon̄ uwu yọk cha igwak, ikeya si ke nkarankat okinyiọọn̄ me emen ijọn̄ inin̄ emen awaji cha, mè itaka ema igwak ire lek ofọnti kiban̄. Ema kpekiriọọn̄ 21 mgbọ oduku òkibumu me uwu kiban̄ okitet isi kiban̄ ifit ikup kpurọk. 22 Ebi kè afian̄, mè agagawaji, mè ofut ekisisisọn me akpalek kiban̄ mè ibot kiban̄, ikeya si ke ebi kè onyinya ekinene inyọn̄ kiban̄ isiki ikweek. 23 Echichi ke enyi ebesa iriọọn̄ ibe ke ema kpere awaji kubọk ge. Eya orọ, ikatet ukpook me lek kiban̄.

24 Alata araran̄ esabe ichọkọ ichit ema lek inyi ejaan̄, ogwu ebilene okikwuk afit isan̄a me lek, îra ikitoon̄. Ikerere mgbọ ekitọkọ ema cha, ema kpenọnọ inu geege me lek. 25 Ubọk geelek efiatbe ikpoko òwawa isa ilep ema, kpunu efuuk geege me emen kiban̄. 26 Ema kpekije ije, ebilene ekibeen̄ ema me oguga. Eyi okikpọk mbum inyi ebilene ibe ke awaji cha kpekup me lek inu geege. 27 Esip ìkitetet ebi ìkifaka ema, mije, ire ge me lek kiban̄ inan̄a irọn̄, ogwu ebilene okibene igwuun̄. Ire ogwu ebilene ibene igwuun̄, ìkpokọt ije ije. Ire isun̄ nkọọn̄ nkọọn̄, ìkpokọt inen̄e lek kan̄ ikeke itat. Uche geelek echebe inyi ema, ìkup kubọk ekiche inyi nkwukwu ene. 28 Ebi ngwugwa kiban̄ ekinyanyam inu esabe inigwa inyi ema, mè ibọkọ ikpoko itaak me akpa kiban̄. Ikeya si, ebi nwa ebi ngwugwa cha mîra ikigwook uchi me lek usini anam ngwugwa cha isun̄, inyi ikafiat, kpekinyi ebi ugbọọn̄ mè ìre ebi una geege me lek. 29 Ebibaan̄ ìkup me irek ebibaan̄, mè ebi eje uman-gwun̄ okupbe me owot, ekekichak ubọk me lek ngwugwa cha. Echichi ìkijeen̄ ibe ke ema kpere awaji. Eya orọ, ikatet ukpook me lek kiban̄.

30 Ìre mije keke ke ekigwen ema awaji? Ebibaan̄ mîkigwa ngwugwa inyi awaji alata okuket chi, mè echi alata araran̄, mè echi uti cha. 31 Me emen uwu yọk cha, ebi ngwugwa kiban̄ ekikwekweek irek, melek ǹgwak ekwut me ebon, mè ikwọkọ ijeek isan̄a me ibot, mè ikwọkọ ifet irọt me otu, kpekichit ibot. 32 Ema ekigọt mè ikitaan̄ ukpo me isi awaji kiban̄ cha kubọk ekirọ me ere inorie mkpa ene. 33 Ebi ngwugwa cha ekiteteen̄ usini me lek ofọnti awaji kiban̄ cha isa inyi nwa kiban̄ mè bọn kiban̄ eketap. 34 Mè ìre ene ìrọ ema ijo inu mè ìre ata inu, ema kpekikọt irọ useen̄. Ema kpekikọt ito ene ubọọn̄, kpekikọt si isan̄a ene me ubọọn̄. 35 Ema kpekikọt irọ ene ibọọn̄ ubọọn̄ mè ìre ikaan̄ ikpoko. Ire ene ichieek ema use, mè ìkarọ, ema kpebekọt ido. 36 Ema kpebekọt inyan̄a ene geege isibi me ubọk mkpa, kpebekọkọt si ibọkọ ebi kpenye lek isan̄a me ubọk ebi ìnyenye lek. 37 Ema kpebekọt irọ ogwu ǹnàan̄ imọọn̄ inu, kpebekọkọt si inyan̄a ogwu òkup me ufialek. 38 Kpebekọt ito nwakpa njijin, kpebekọkọt si irọ ata inu geege inyi gwun̄ kpà-nte. 39 Inu chi esabe uti ikọ mè isa alata araran̄ mè alata okuket ichọkọ ichit lek ìkup kubọk ewuuk ekpọkọbe me lek ogoon̄. Esip môtet ebi ìkisi ikwaan̄ inyi ema. 40 Ìre mije keke ke ene obokeek ibe ke ema ìre awaji, mè ìre igwegwen ema awaji? Ògak ge, achubọk ebi Babilọn me lek kiban̄, kpekaan̄ ulibi inyi awaji kiban̄. 41 Mije, ema isimun̄ ogwu mbuuk, mîra isa ijet Belu, mè ikiriaak ibe irọ mè ogwu mbuuk itumu ikọ. Ema ekirọ kubọk Belu ya înọ mbeek kiban̄. 42 Ire, ema kpekikọt imun̄ ikeyi, mè ijit awaji cha ìtele, bak me lek ema ìre mbubut.

43 Ofifi kan̄, ebibaan̄ ekitobo olik ikana ebon isa ikikup me agba oniin̄ ikiwọp mfufe akpa kubọk nsensi. Ene ge me lek ebi ìkije iraka isisa ogwu ge me lek ebibaan̄ cha ifo isi ilaak, ogwa mônenikichak ogwu enenwaan̄ me lek kan̄ ibe ke ogwu melek kan̄ ìkajaan̄ ìbet lek kan̄ orọ kpefieek ogwugwu olik me ebon. 44 Inu geelek ofolek mkpọmfaka chi ìre ofiaan̄. Keke oborọ ibe ene ikeek ibe ke ema ìre awaji, mè ìre igwegwen ema awaji? 45 Ebi usọ uti mè ebi usọ alata araran̄ erom ema. Ema kpebekọt ire inu geege igak inu ebiba eweekbe ibe ema ere. 46 Ebi ìrorom inu chi me lek kiban̄ kpebeluluk ugwem ijọn̄ọ. Inu ema erombe ìbojeje ire awaji? 47 Ofiaan̄ mè esip gaalek ke ife chi ekitele inyi ebi owot iman kiban̄ kubọk ìrot.

48 Mije, akọn̄ mè ìre ùrioon̄ isirọn̄ ikeme ema, ebi ngwugwa kiban̄ mîra ikigbaan̄ ibot isọk ikitọt ere ema mêlibibe inin̄ ilet lek kiban̄ melek awaji kiban̄ cha. 49 Keke orọ ene kpokọtbe imun̄ ibe ke inu chi ìkare awaji ni, mije, ema kpekikọt inyan̄a lek kiban̄ me emen akọn̄ mè ìre ùrioon̄?

50 Eyi îrebe ibe ke esa uti irom ema, mè isa alata araran̄ mè alata okuket ichọkọ ichit ema lek, mêriọọn̄ me mgburudun̄ ibe ke inu chi ìre ofiaan̄. 51 Môsibi utoon̄ inyi ido geelek mè ebi ubọọn̄ geelek ibe ke îre ogwu ebilene orom inu chi, ke ema kperere awaji kubọk ge, ke kpunu si ubọk ikwaan̄ Awaji geege me emen kiban̄. 52 Ìre ekene ikakọtge ìyaka ìriọọn̄ si ibe ke inu chi ìkare awaji?

53 Ema kpebekọt ito ubọọn̄ inyi ido, kpebekọkọt si irọ ibe ibot irep inyi ebi ene. 54 Ema kpebekọt idọmọ inu ògbaan̄ me lek kiban̄, kpebekọkọt si inyan̄a ogwu erọbe ilọ, mije, ema kpebekọt irọ inu geege. Ema ebet lek ùgọọk òkiwulu me etete inyọn̄ mè ijọn̄.

55 Ukan̄ isibumu me uwu yọk chi esabe uti ikọ mè isa alata araran̄ mè alata okuket ichọkọ ichit lek, ebi ngwugwa kiban̄ mîra ililim inwọnọ. Ire, ema mîra ibia, mè ukan̄ òtaka ema òriọk kubọk ogbugboon̄ uwu. 56 Ema kpebekọkọt ikeke ida ogwu ubọọn̄ geege mè ìre ogwu ochicha ònu ema uyọrọlek me lek. Keke môrọrọ mè ene ikeek ibe ke ema ìre awaji, mè ìre igwegwen ema awaji?

57 Awaji uti chi esabe alata araran̄ mè alata okuket ichọkọ ichit lek kpekikọt inyan̄a lek me ubọk ebi inọ mè ebi inọ afa, 58 ebi mêkọtbe ikama alata araran̄ mè alata okuket kiban̄, mè iwọọk ofọnti òkup me lek kiban̄ isa ije ifo. Ema kpebekọkọt inyan̄a lek kiban̄.

59 Eya orọ, înwọn irere ogwu ubọọn̄ òkijeen̄ unye kan̄, mè ìre irere otin̄ ibat òkup me uwu ikirọ ikwaan̄ inyi ogwukaan̄ kan̄, igak irere awaji ofiaan̄ kechi. Afọn̄ òkup me lek uwu, ekisa ikwek inu me uwu, înwọn igak awaji ofiaan̄ chi. Atà eyi uti òkup me emen uwu ogwu ubọọn̄ înwọn igak awaji ofiaan̄ chi.

60 Ìkpọ, ura mè onyan̄ mè ntoronyan̄ ekitotoon̄ ere. Awaji onyi ema ikwaan̄ keya ibe ekerọ, ema egbagban̄ utọn̄, mè ikirọ. 61 Ikeya si, omumen-inyọn̄ isimumen, ekimumun̄ me ujọn̄ọ ere. Efet si ìkiwuwut me ido geelek. 62 Awaji isinyi oduku inyọn̄ ida ibe ikiduku ikana otutuuk linyọn̄, ìkirọrọ ida ya. 63 Ukan̄ eriabe me inyọn̄ ibe initaka ogoon̄ mè oron, ìkirọrọ si inu etọbe inyi. Ire, kpebesasa mkpọmfaka cha itọ me lek inu chi me lek uja mè unye ema ekaan̄be. 64 Eya orọ, ene geege ikakekeek ibe ke ema ìre awaji, ikagwegwen si ema awaji, mije, ema kpebekọkọt isibi oyerebet, kpebekọkọt si irọ ata inu inyi ene geege. 65 Eyi enyi eniriọọn̄ ibe ke ema kpere awaji, ikatet ukpook me lek kiban̄.

66 Ema kpebekọkọt ifieek otu inyi ebi ubọọn̄, kpebekọkọt si igbana ebiba. 67 Ema kpebekọkọt ijeen̄ ebi ido geege inu ijejeen̄ me akpabin inyọn̄, kpebekọkọt ira kubọk ura, kpebekọkọt si itoon̄ kubọk onyan̄. 68 Ebi kè anam oron mînwọn igak ema, mije, ebiba mêkọt ilim inan̄a me lek inu môsakbe ema unan, mè ègbala chieen̄ ekpọ lek kiban̄. 69 Kpukpunu inu geege òkijeen̄ ibe ke ema ìre awaji. Eya orọ, ikatet ukpook me lek kiban̄.

70 Awaji kiban̄ cha esabe uti ikọ mè isa alata araran̄ mè alata okuket ichọkọ ichit lek ekup kubọk ògbalatasuk òkup me emen uko osisem, eyi ìkakikọt ìbem inu geege. 71 Ubọk yaage si, awaji kiban̄ cha esabe uti ikọ mè isa alata araran̄ mè alata okuket ichọkọ ichit lek, ekup kubọk uti ukpak me emen uko, eyi ebi kè ofut ekinisisọn me lek, ìkakọt ìrieen̄ ema ìsan̄a. Mkpọmfaka cha si ekup kubọk nkwukwu ene etọpbe ito me emen udun. 72 Ìsa me lek ekwut irio irio mè ekwut lilin̄ òjajaan̄ cha, echi òkup me udun̄ kiban̄ ikijet ita cha, ìriọọn̄ ibe ke ema kpere awaji kubọk ge. Me òta kan̄, nkarankat môtaka ema igwak isan̄a, ema mênenire inu esip inyi ido ya ìkiriaak ema.

73 Ogwu ata ene ikakaan̄ge mkpọmfaka înwọn igak ogwu òkakaan̄, mije, kpunu esip geege òbotet ọmọ.