5
Jei Jeruselem, wọọk ofọntiufieejit mè ukwook san̄a,
mè tap uja eyi ujamgbugbo Awaji re mgbọ geelek.
2 Sa ata irọrọ eyi Awaji kat kana lek kwun̄ kubọk ofọnti,
mè kwuun̄ ujamgbugbo Ogwu Mgbọ Geelek
me ibot kubọk ọgbọn ubọọn̄.
3 Awaji môsa uja kwun̄
ijeen̄ ido geelek me linyọn̄.
4 Mije, Awaji mônyi owu erieen̄ òbokup ire mgbọ geelek,
erieen̄ ya ìre, “Esuuk Ata Irọrọ,
mè Umin Irọriọọn̄ Awaji.”
5 Jei Jeruselem, nan̄a keke, si keke me inyọn̄ ogoon̄,
kpọ agan̄ mbum-ura,
owu mômun̄ bọn kwun̄ etitiin̄be
inan̄a me agan̄ mbum-ura mè agan̄ ichep-ura,
inan̄a me ida Ogwu Mbuban onyibe,
ema mêkinwọọn̄ unwọọn̄ ibe ke Awaji îkeek ema.
6 Ema eje ukot ukot inan̄a itele owu,
mgbọ ebi ochicha kiban̄ esabe ema ije inan̄a;
ire, Awaji môsa ema igwu ikom ika ijet owu,
ebebeen̄ ema me umin isa ika
kubọk ekiben ene me inyọn̄ ogboon̄ ubọọn̄.
7 Mije, Awaji înyi ida ibe ebak ogoon̄ geelek òbebene
mè oriọọn̄ mgbọ geelek cha esiki,
mè etọm iteke ebene, inyi ijọn̄ ije ìkike,
inyi ebi Ijeren eje me ujamgbugbo Awaji eka me utelelek.
8 Oron mè uti geelek òkidun̄u utop olu,
îkwek ebi Ijeren lek igọọk me ida Awaji.
9 Mije, Awaji môsa ebi Ijeren ikika inu me unwọọn̄,
me emen utoon̄ eyi ujamgbugbo kan̄,
melek nsan mè ata irọrọ òkinan̄a me ubọk kan̄.