4
Iriọọn̄-inu ore ikpa Ikan Awaji,òrere ikan òbokukup ire mgbọ geelek,
Ebi geelek ìtetet ọmọ inye mêluk ugwem,
ebi geelek ìkpọkpọ ọmọ ilọ chieen̄ mêkwaan̄ ita.
2 Jei ebi kè Jekọp, ìgwu ìkom ìsi ìtet iriọọn̄-inu,
ìje ìsi lek utoon̄ kan̄ òkitotoon̄.
3 Ikayaka umin kinyi ìnyi ebi ofifi ene,
ikasa atisi kinyi ìnyi ebi ichen.
4 Jei ebi Ijeren, unwọọn̄ okup inyi eji,
mije, eji mîriọọn̄ inu òkibele Awaji ejit.
Mînyi ebi Jeruselem ukarajit
5 Ebi n̄a, ìkat ejit,
enyi ekiben erieen̄ kè Ijeren ifo isi.
6 Kpenyam enyi inyi ebi ofifi ido,
ibe ekpakpan̄ enyi esan̄a.
Eyaka enyi inyi ebi ochicha kinyi,
mije enyi erọbe Awaji inaan̄ ejit.
7 Enyi mîrọ Òrom kinyi inaan̄ ejit,
bak me lek enyi ekigwa ngwugwa inyi yọk,
kpegwa inyi Awaji.
8 Enyi mîwuuk Awaji ogwu mgbọ geelek,
ogwu òkpukpukpo enyi isibi;
mè irọ Jeruselem, ama òkpọkpọ enyi isibi, inu ufieejit.
9 Mije, îmun̄ uyok uyok unaan̄-ejit Awaji onaan̄be ikeme enyi,
mè itumu ibe,
“Ìgban̄, enyi ebi ama cha ìluluk iriaak me lek Sayọn,
Awaji îtap emi me ikpele ufieejit,
10 mije, mmun̄ ekikpulu bọn n̄a ebirieen̄ mè ebibaan̄
ifon me usun̄ akọn̄,
eyi Ogwu Mgbọ Geelek odabe ema itap me emen.
11 Ǹsa unwọọn̄ ikpọ ema isibi,
mè isa ito mè ufieejit ikikpọ mgbọ ekikpulu ema ifon.
12 Ene geege ikabele ejit me lek n̄a,
emi ogwu nwakpa, ogwu owuwa bọn ekwaan̄be itele;
îre bak me lek ijo inu bọn n̄a erọbe ke nkana ogwu una ene,
mije ema mîda lek kiban̄ isan̄a me lek Ikan Awaji.
13 Ema kpekaan̄ ulibi inyi inu îtọbe ibe erọ,
kpejeje si me oniin̄ eyi ikan kan̄,
kpegọgọọk si oniin̄ ata irọrọ eyi îjeen̄be ema.
14 “Enyi ebi ama cha òkukup iriaak Sayọn, ìna,
ìkeek ubọk ekpulube bọn n̄a ebirieen̄
mè ebibaan̄ me usun̄ akọn̄ ifon,
eyi Ogwu Mgbọ Geelek odabe ema itap me emen.
15 Ido òjọjọn̄ọ ere ke îsa inu initim ema akọn̄ me lek,
ido kperiọọn̄ nsan, ìkitumu nke nke usem,
ebi kpekaan̄ ulibi inyi ugane,
kpekito nsan me lek gwun̄ aya.
16 Ema enikpulu bọn ebirieen̄ ogwu nwakpa omabe isa ifon,
mè itele ogwu enenwaan̄ ya
gaalek me ufieejit bọn ebibaan̄ kan̄.
17 “Bọn n̄a ebi Ijeren,
mọmọ ike mbakọt itap ubọk inyi enyi?
18 Ogwu òsasa ùrioon̄ chi initoon̄ enyi,
mônyan̄a enyi me ubọk ebi ochicha kinyi.
19 Ìje, bọn n̄a, ìje,
ke mâkup emi gaalek, mîyat itele emi.
20 Mwọọk ofọnti nkitap mgbọ esuuk ito,
mè initap ekwut ufieejit isa ikup me uriaak;
mâto ito inyi Ogwu Mgbọ Geelek otutuuk usen ugwem n̄a.
21 “Bọn n̄a, ìkat ejit, ìto ito ìgwen Awaji,
ke mônyan̄a enyi me ubọk ebi ochicha ìkitutuku enyi.
22 Ntoon̄ ejit ibe ke Ogwu Mgbọ Geelek mônyan̄a enyi,
Ogwu Mbuban îria unwọọn̄ ijet emi,
mije nsan eyi môrebe enyi lek me sọntiik mgbọ,
inan̄a me ubọk Ogwu Mgbọ Geelek, ogwu unyan̄a kinyi.
23 Ǹkup me ufieejit mè ito me chieen̄
mgbọ mmun̄be ekisa enyi ije,
ire, Awaji môsa enyi ika ijet emi me unwọọn̄ mè ubelejit
ire mgbọ geelek.
24 Ike ebi ama cha ìluluk ikana Sayọn
emun̄be ekisa enyi ifon mgbọ yi,
ikeya si, sọntiik mgbọ, ema mêmun̄ Awaji onyan̄abe enyi isibi;
unyan̄a kinyi ìbonu melek ikpele umin,
melek uja eyi Ogwu Mgbọ Geelek.
25 Bọn n̄a, ìkat ejit ìbọkọ uyok uyok unaan̄-ejit Awaji
eyi ònunu inyi enyi;
ogwu ochicha înyi enyi saasaak,
ire, sọntiik mgbọ, enyi mêmun̄ ejijakabe ọmọ,
owu môjak ọmọ me ebek iraka.
26 Jei bọn n̄a ebi nkirireek,
enyi mîje me oniin̄ òkup kpunukpunukpunu,
ekpulu enyi ifon kubọk ebi ochicha efum arọọn̄ ikpulu ifon.
27 “Bọn n̄a, ìkat ejit, mè ìto ito ìgwen Awaji,
mije, ogwu òsasa ùrioon̄ keyi ijet enyi môkeek enyi.
28 Ike enyi esabe me nkeek kinyi
ikpebe lek kinyi isan̄a me lek Awaji,
ìsa ulọk òmimin akọp mgbọ igak ikeya
ìgwu ìkom ìweek ọmọ.
29 Mije, ogwu òsasa ùrioon̄ chi ijet enyi,
mônyan̄a enyi isibi, mè inyi enyi unwọọn̄ kpotabe.”
Mêtap ubọk inyi Jeruselem
30 Jei Jeruselem, kat ejit,
mije, ogwu ònyinyi owu erieen̄ môsiki owu ejit.
31 Uyọrọlek môtet ebi ìrọrọ owu ikpak
ebi ìbebele ejit mgbọ owu onan̄abe irọn̄.
32 Uyọrọlek môtet ama cha echi bọn kwun̄ enin̄be usun̄ inyi,
uyọrọlek môtet ama cha òbọbọkọ bọn kwun̄ itap.
33 Mije, ike ọmọ obelebe ejit ibe owu onan̄a irọn̄,
mè inwọọn̄ unwọọn̄ ibe owu okpukpuku igwook,
ikeya si, ọmọ môfieek ejit
mgbọ mêjijakabe ọmọ me lek kan̄ igwook.
34 Mâsan̄a gogolek ọmọ okigugo mije uwa ene ọmọ okaan̄be isan̄a,
mgbọ ya, unyechieen̄ kan̄ ya mônenikana ufieejit.
35 Ukan̄ Ogwu Mgbọ Geelek môsak me emen kan̄ owuwa usen,
ebi ijo erumun̄ mêkekiluk me emen kan̄ ijọn̄ọ mgbọ.
36 Jei Jeruselem, kana chieen̄ kwun̄ kpọ agan̄ mbum-ura,
mè mun̄ unwọọn̄ òkinan̄a me ubọk Awaji inu inyi owu.
37 Kpọ, bọn kwun̄ cha omun̄be mgbọ ekisa ije, ema mêkika inu;
ema mêkika, mîtitiin̄ ema
inan̄a me agan̄ mbum-ura mè agan̄ ichep-ura;
inan̄a me ida Ogwu Mbuban onyibe,
ema mêkinwọọn̄ unwọọn̄ me ujamgbugbo eyi Awaji.