3
“Jei Okumugwem Ogwukaan̄ Inyọn̄ mè Ijọn̄, Awaji ebi Ijeren, ibot ejit òkisak ofaak, mè ejit ufialek okitet, òkitaan̄ ukpo igwen owu. 2 Jei Okumugwem, nye lek nọ, mè to eji nsan, mije, eji mîrọ ijo inu me isi kwun̄. 3 Owu òkup me ogboon̄ ubọọn̄ kwun̄ ire mgbọ geelek, ire, eji ekikwakwaan̄ ire mgbọ geelek. 4 Jei Okumugwem Ogwukaan̄ Inyọn̄ mè Ijọn̄, Awaji ebi Ijeren, mgbọ keyi, nọ uriaak ebi Ijeren ìkwakwaan̄ ita me ikeke, bọn ebi ìrọrọ ijo inu me isi kwun̄, ebi kpegban̄ ida Okumugwem Awaji kiban̄, eyi òsa ùrioon̄ inikitoon̄ eji. 5 Kayaka ìtap inu cha ebi nte nte kiji erọbe ilọ me ejit, ire, me emen ujaralek yi eji ekupbe, keek unye kwun̄ mè erieen̄ kwun̄. 6 Owu ore Okumugwem Awaji kiji me atikọ, owu si ke eji ebetọn̄. 7 Mije, owu otap ulibi kwun̄ me ejit kiji, inyi eji ekegwen erieen̄ kwun̄. Eji mêtọn̄ owu me usun̄ akọn̄ eji ekupbe, mije, eji mîsan̄a ejit kiji me lek irọrọ ijọ inu cha ebi nte nte kiji erọbe me isi kwun̄. 8 Kpọ, chereyi, eji me usun̄ akọn̄ me ere owu oyiyalabe eji igwook, ibe echak eji, mè efieek otu enyi eji, mè eji ebọkọ osusut me useen̄ ijo irọrọ ebi nte nte kiji, ebi ìjujuuk Okumugwem Awaji kiji itele.”Iriọọn̄-inu ìkinan̄a me ubọk Awaji
9 Jei ebi Ijeren, ìgban̄ ikan òkinyi ene ugwem;
ìriọọn̄ ubọk ìnọ, mè ìriọọn̄ inu iriọọn̄-inu orebe!
10 Keke orọ, jei ebi Ijeren,
keke orọ enyi esi ikup me ido ebi ochicha kinyi,
mè ikikup ikan me ofifi ido,
mè ikaan̄ orieen̄ me lek kubọk ebi ìkwakwaan̄,
11 efufuk enyi itap me otu ifuk ebi ìfofon ama ekwukwu?
12 Îre mije enyi ejitbe ogbuuruk
ere iriọọn̄-inu okigbuk isibi.
13 Mebe ke enyi mîje me oniin̄ Awaji,
kè enyi eluk me esuuk ère mgbọ geelek.
14 Ìriọọn̄ ere iriọọn̄-inu okupbe,
mè ere unye okupbe,
mè ere ngobo-ntet okupbe,
inyi enyi esa eriọọn̄ ere ujọn̄ọ usen mè ugwem okupbe,
mè ere utoon̄ ekisa imọọn̄ inu, mè esuuk okupbe.
15 Ekene oweek ere iriọọn̄-inu okiluk imun̄?
Ekene onin̄ uwu isun̄-inu kan̄?
16 Mọmọ ebi ìkikpulu ido geelek cha,
ebi ìkikaan̄ unye me lek ebi kè anam me linyọn̄,
17 ebi kecha ìkisook ebi kè unọn òwulu me inyọn̄ ikpan̄ kubọk ifit,
ebi ìkititiin̄ alata okuket mè alata araran̄
echi ebilene ekisa itoon̄ ejit isun̄ inyi lek kiban̄,
ebi ìkititiin̄ inu isun̄ inyi lek kiban̄, kpekikaan̄ okputut;
18 ebi ìkitọt ntọt, mè ikichieek mkpa iweek ikpoko,
ire, ubọk ikwaan̄ kiban̄, ene geege ìkamun̄?
19 Ema mîniniin̄ ichieen̄, mè ifon ama ekwukwu,
ebi ofifi ukpa enanan̄a isibi inikup me irek kiban̄.
20 Owuwa ayaya ukot mîsibi inu inimun̄ utoon̄ egwe,
mè iluk me linyọn̄;
ire, ema kperiọọn̄ oniin̄ eyi ifuk-ibot okije,
kpegogobo itet si agan̄ îkije,
kpekọkọt si ire lek kan̄.
21 Bọn kiban̄ si mîje ilọ oniin̄,
kpekọt itet ifuk-ibot.
22 Ebi Kenan kpenọnọ inu ofolek iriọọn̄-inu,
ebi Teman kpesasa si chieen̄ imun̄;
23 ebi owot iman kè Aga ebi ìkiweek ifuk-ibot me linyọn̄,
ebi mbit ìnan̄a me Meran mè Teman,
ebi ìkirọk urọk mè ebi ìkiweek ngobo-ntet,
kperọriọọn̄ oniin̄ eyi iriọọn̄-inu okije,
kpegogobo itet si agan̄ îkije.
24 Jei ebi Ijeren, ere nluk Awaji îmin iraka iman̄,
okike ere îkaan̄be îwele enenen!
25 Uwele kan̄, kpunu okputut,
ubene kan̄, kpebekọt itọ.
26 Ere ya ke eman ebi ujọn̄ọ ile cha,
ebi ìtataan̄ etip me ukot ikaan̄,
ife ìmimiin̄ ichak me akparalek, mè iriọọn̄ ukot akọn̄.
27 Awaji ìkagobo ema ìsa ìrọ ebi kan̄,
ìkajeen̄ si ema oniin̄ eyi ifuk-ibot;
28 eya orọ, ema ekwakwaan̄ ita
bak me lek ema kpekaan̄ iriọọn̄-inu,
ema ekup me emen mbubut kiban̄ ikwaan̄.
29 Ekene onene isi emen inyọn̄ isi itet iriọọn̄-inu,
mè isan̄a me emen oduku inyọn̄ inito?
30 Ekene osaba emen awaji isi itoon̄ me lek,
mè isa alata araran̄ eyi atata kan̄ ilep isa ika?
31 Ene geege ìkariọọn̄ oniin̄ ekije isi lek,
ene geege ìkpokọt iweek agan̄ îkijeje imun̄.
32 Ire, Awaji, ogwu òrọriọọn̄ otutuuk inu geelek îriọọn̄ ọmọ;
ìsa ngobo-ntet kan̄ iweek ọmọ imun̄,
Ogwa osun̄ linyọn̄ ibe ikup ire mgbọ geelek,
mè igwook anam ukot ini ichit lek;
33 ogwu òraria utoon̄ isibi, utoon̄ ojeje,
iyayaka igwen, isisiki ibot inyi, mè ikiran.
34 Ebi kè ntoronyan̄ ekitoon̄ me
mgbọ kiban̄, mè ikibele ejit;
Awaji isigwen ema,
ema mîra ibọkọ otu ibe, “Kpọ eji ire ebi!”
Ema ekitoon̄ me ubelejit inyi Òrom kiban̄.
35 Ọmọ yi ore Awaji kiji,
kpunu inu ebesa itọ me lek kan̄
36 Ọmọ oweek otutuuk oniin̄ ifuk-ibot imun̄,
mè isa ifuk-ibot inyi ogwu ikwaan̄ kan̄ Jekọp,
òrere Ijeren, ogwu îmabe.
37 Bene me mgbọ ya, iriọọn̄-inu okakana isibi me linyọn̄,
mè iniluk melek ebilene.