“Eya orọ Okumugwem orọbe eji inu îtumube ibe ke ọmọ môrọ eji, mè irọ si ebi oyerebet ebi ìkikpulu Ijeren, mè ebi ubọọn̄ kiji melek ebi ibot mkpulu kiji, mè irọ ebi Ijeren melek ebi Juda. 2 Kpunu ere geege me irak isinyọn̄ keyi eyi erọbe mbet lek inu Okumugwem orọbe me Jeruselem, igọọk me lek inu egebe me emen ikpa Ikan kè Mosis. 3 Eji mîtaka bọn kiji ebirieen̄ mè bọn kiji ebibaan̄. 4 Okumugwem îyaka ebi kiji itap me irak mkpulu ebi ido echi òkakana eji okokop, inyi eji ekana inu ochak mè inu ebi ene ebekilibi lek me etete otutuuk ife ìluluk ikana eji, ebi îchonbe eji ikana isi igwook. 5 Mije ebi kiji erọbe Okumugwem Awaji kiji ilọ bak me lek ekagban̄ge ida kan̄, ebi ido kiji mîkana ebi etimbe ikpan̄, kpan̄asi ema ebere ebi ìbetitim ikpan̄.

6 “Okumugwem Awaji kiji ìre ogwu ata irọrọ. Ire eji, esip îtet eji enenen chereyi, mè itet si ebi nte nte kiji. 7 Ùrioon̄ cha geelek Okumugwem obe môtoon̄ eji, îtoon̄ si eji. 8 Ire, eji kpebeek nsan me ubọk Okumugwem, inyi eji etele inu ejit ikpak kiji okitọ inyi eji cha. 9 Eya orọ, Okumugwem ìkpọkpọ mgbọ òtatat me lek kan̄, mè isa ùrioon̄ cha inikeme eji. Okumugwem ìkikpe mkpukpe ònenen ikpọ me lek ike eji erọbe inu cha îtọbe ibe eji erọ. 10 Ire, eji kpegban̄ ida Okumugwem, mè ikirọ inu cha îtọbe ibe eji erọ.

11 “Mgbọ keyi, owu Okumugwem, Awaji ebi Ijeren, ogwu òsasa unye oguga, mè owuwa inu ijejeen̄ mè uyeke uyeke inu, mè ikpele unye kwun̄, mè unye ubọk, isan̄a ebi kwun̄ isibi me ijọn̄ Ijipiti, mè isa me ikeya ikaan̄ erieen̄ òkitaan̄ etip mege inire chereyi, 12 eji mîrọ ijo inu, eji kpeyaka iriọọn̄ owu, jei Okumugwem Awaji kiji, eji mîchaka otutuuk ikan kwun̄ isan̄a kpai. 13 Soso, kayaka ìnaan̄ ejit ìnyi eji. Owu omun̄ ibe ke eji ene inen mè inen gaalek esik me etete ebi ido cha ochonbe eji igwook ikana. 14 Jei Okumugwem, soso, nọ uriaak kiji mè mbeek kiji, mè sa mije umin kwun̄ nyan̄a eji, mè rọ eji nsan, inyi otutuuk ebi ìkpukpulu eji me usun̄ akọn̄ emun̄; 15 ufuna otutuuk ebi linyọn̄ eriọọn̄ ibe ke owu ore Okumugwem Awaji kiji, mije, Ijeren mè ebi owot iman kan̄ ekichieek erieen̄ kwun̄.

16 “Jei Okumugwem, kup me ere mbuban okiluk siki chieen̄ kpọ eji, mè kaan̄ ekiket ofolek kiji. Siki utọn̄ gban̄, mè nọ eji ida. 17 Jei Okumugwem, chili chieen̄ kwun̄, mè kpọ, mije, ìkare ebi ìkwakwaan̄ ifon ama ekwukwu, ebi ebọkọbe efuuk kiban̄ isan̄a me akpalek kiban̄, ebekitọn̄ owu, mè ikitumu unen oyerebet Okumugwem isibi. 18 Ire, ogwu ebilene ogwu ufieejit kan̄ ominbe, ogwu òkigele isi ikwuun̄ ije ije, mè iwọ lek, ogwu chieen̄ okidun, ogwu òkup me uraafiọọn̄, ọmọ ore ogwu òbotọn̄ owu, jei Okumugwem, mè ikitumu unen oyerebet kwun̄ isibi.

19 “Jei Okumugwem Awaji kiji, eji kpebak me lek ata irọrọ ebi nte nte kiji mè ìre echi ebi ubọọn̄ kiji ikibeek nsan me ubọk kwun̄. 20 Owu oria unaan̄-ejit kwun̄ mè uyok uyok unaan̄-ejit kwun̄ igwook eji me lek kubọk ochieekbe use sa me otu ebi ikwaan̄ kwun̄ ebi nriran, ibe: 21 ‘Okumugwem ìbe: Ìgele oguga kinyi ìsiki, mè ìsi ikwaan̄ ìnyi ogwu ubọọn̄ Babilọn, inyi enyi mêluk me lek ijọn̄ ya eyi nnyibe ebi nte nte kinyi. 22 Ire, ire enyi kpegban̄ ida Okumugwem, kpesi ikwaan̄ inyi ogwu ubọọn̄ Babilọn, 23 mâchit okput unwọọn̄ mè okput ijọk, mè ida unwọọn̄ ogwu òdo nwa mè ida ogwu òbat olom, me otutuuk ama geelek me ido Juda mè lek oniin̄ geelek me ama Jeruselem, otutuuk lek ijọn̄ ya mônenikana èwê, ere ene geege ikalukge.’ ”

24 Ire, eji kpegban̄ ida ikọ kwun̄, eyi otumube ibe eji esi ikwaan̄ enyi ogwu ubọọn̄ Babilọn. Eya orọ, owu orọ eji inu cha otumube sa me otu ebi ikwaan̄ kwun̄ ebi nriran ibe ke mêrọkọ ukwuuk ebi ubọọn̄ kiji mè echi ebi nte nte kiji isibi me udọn̄-ufuun̄ kiban̄. 25 Me atikọ, mîtọọn̄ si ukwuuk cha igwook me lek uyok ikarek mè lek ofiik senesene ibot ewuuk me eririeen̄. Ebi nte nte kiji ekwaan̄ mkpa nyanya me ubọk akan̄, mè oge akọn̄, mè ijo orukan̄. 26 Uwu ya eyi ekigwen ibak erieen̄ kwun̄, owu orọ inyi ikup ike îkupbe chereyi, bak me lek inu ikpak ebi uwu kè Ijeren mè ebi uwu kè Juda erọbe.

27 “Ire, jei Okumugwem Awaji kiji, owu òsa me otutuuk ata ejit kwun̄ mè ejit nsan kwun̄ irọ eji inu me lek, 28 kubọk owu ochieekbe use inan̄a me otu kè Mosis ogwu ikwaan̄ kwun̄, me usen obe ọmọ ige Ikan kwun̄ isibi me isi bọn ebi Ijeren, ibe, 29 ‘Ire enyi kpegban̄ ida n̄a, ikpele urum ene keyi môkana sọntiik ene inen mè inen gaalek me etete ebi ido geelek ere mâchonbe ema ikana itap. 30 Nriọọn̄ ibe ke ema kpebegban̄ utọn̄ inyi emi, mije ema ìre ebi unye-ibot. Ire, ema mêkup inọ lek kiban̄ me ido cha, ere mêkpulube ema me usun̄ akọn̄ isi igwook, 31 mè itolek iniriọọn̄ ibe ke emi nre Okumugwem Awaji kiban̄. Mânyi ema ejit òkigban̄ utọn̄ mè utọn̄ òkinọ ikọ. 32 Ema mêkup me ido usun̄ akọn̄ kiban̄ ikọt okwa itọn̄ emi, mè ikeek erieen̄ n̄a. 33 Mgbọ ya, ema mêtele unye-ibot kiban̄ mè inu ikpak kiban̄, mije, ema mêkeek inu òsisibi inyi ebi nte nte kiban̄ ebi ìrọrọ ijo inu me isi Okumugwem. 34 Emi mânenisa ema igwu ikom ika inu me lek ijọn̄ ya eyi nnyan̄abe ibot ichieek use isasa inyi ebi nte nte kiban̄, Ebereyam, mè Ajiki, mè Jekọp. Ema mêkekikpulu lek ijọn̄ ya. Emi mânenirọ ibe otu ifuk kiban̄ iwa, ema kpebeyaka ise. 35 Mânyan̄a ibot eyi môkupbe ire mgbọ geelek inyi ema, ibe ke emi mâre Awaji kiban̄, ema mêrere ebi eyi n̄a. Mgbọ ya, emi m̀kpayaka ikpọk irieen̄ ebi n̄a, ebi Ijeren, isan̄a mgbọ geege me lek ijọn̄ ya nnyibe ema.’ ”