Baruk
Baruk mè ebi Ju me Babilọn
1
Echi ìre ikọ Baruk, gwun̄ kè Neriya, gwun̄ kè Mayaseya, gwun̄ kè Jedikaya, gwun̄ kè Asadiya, gwun̄ kè Ilikiya, ogebe me ikpa me Babilọn, 2 me òso usen jaaba me onyan̄, me òso acha go, me mgbọ ebi Babilọn etimbe akọn̄ ibọkọ Jeruselem, mè itap ukan̄ iwọp.3 Baruk onenifuk ikọ òkup me emen ikpa yi inyi Jekonaya,a ogwu ubọọn̄ Juda, òrere gwun̄ kè Jioyakim, mè otutuuk ebi ene ebi ìnunu inigọọk igban̄ otu ikpa ya, 4 mè ebi ibot mkpulu, mè bọn ebi ubọọn̄, mè ebi ugane, mè otutuuk ebi ene, ebi ijija mè ebi ilile, me agba okwaan̄ Sudu. Otutuuk ife chi eluk me Babilọn mgbọ ya.
5 Mgbọ îfukbe isan̄a, ema ekukup me isi Okumugwem ito ito enenen, mè ijin otu, mè iriaak uriaak. 6 Ema enenitip ikpoko me ene me ene, ike ene geelek okọtbe inyi, 7 mè iria isi me Jeruselem ijet ogwu òban Awaji, Jioyakim, gwun̄ kè Ilikiya, gwun̄ kè Salum, mè ebi ngwugwa, mè otutuuk ebi melek kan̄ ekupbe me Jeruselem. 8 Mgbọ yaage si, me òso akọp usen me onyan̄ Sifan, Baruk oraria nroon̄ ikwaan̄ Uwu Mbuban Okumugwem, echi efumbe me akọn̄ me Uwu Mbuban, ibe esa egwu ekom efo Juda. Nroon̄ ikwaan̄ cha ìre nroon̄ ikwaan̄ alata araran̄ echi Jedikaya, gwun̄ kè Josaya, ogwu ubọọn̄ Juda, orọbe. 9 Sabum mgbọ ya, Nebukadineja, ogwu ubọọn̄ Babilọn îwuuk lek ikpulu Jekonaya melek bọn ebi ubọọn̄, mè ebi mkpọn, mè ebi ibot mkpulu mè ebi ido ya me usun̄ akọn̄ me Jeruselem isi igwook me Babilọn.
Mîge ikpa ijet ebi Jeruselem
10 Ebi Ju cha ìkup me usun̄ akọn̄ me Babilọn enenige me ikpa ibe:
“Ikpoko ire eyi eji eriabe ijet enyi, ìsa ìleen̄ inu ngwugwa ewọwọp, mè echi ngwugwa ijo inu, mè nsensi, mè ìtitiin̄ si inu ngwugwa akpa, mè ìsa inu cha ìgwa ngwugwa me inyọn̄ ntook ngwugwa Okumugwem Awaji kiji. 11 Ìriaak uriaak me ibot ugwem kè Nebukadineja, ogwu ubọọn̄ Babilọn, mè ibot ugwem ogwu gwun̄, Belisaja, ibe efuk ugwem me linyọn̄ yi kubọk akpabin inyọn̄ ofukbe. 12 Ìriaak si ibe Okumugwem inyi eji unye, mè irọ ibe chieen̄ kiji igwuku, inyi eji ekọt eluk me irak okwukwek kè Nebukadineja, ogwu ubọọn̄ Babilọn, mè irak okwukwek kè Belisaja, ogwu gwun̄, mè eji esi ikwaan̄ enyi ema ejọn̄ọ mgbọ, mè ejit kiban̄ ibele me lek kiji. 13 Ìriaak si Okumugwem Awaji kiji me ibot kiji, mije, eji mîrọ Okumugwem Awaji kiji ilọ. Mege ire mgbọ keyi, unaan̄-ejit Okumugwem mè uyok uyok unaan̄-ejit kan̄ ìkatele-nu eji. 14 Ìfuk ikpa yi eji eriabe ijet enyi ìsibi, mè ìkup me Uwu Mbuban Okumugwem ìfuk ijo me usen ijọk ya, mè ìkifuk si me usen ntitiin̄ mbuban geelek.
Ifufuk ijo
15 “Enyi mêfuk ijo ibe, ‘Okumugwem Awaji kiji ìre ogwu ata irọrọ. Ire eji, esip îtet eji enenen chereyi, eji ebi Juda, mè ebi Jeruselem, 16 mè itet si ebi ubọọn̄ kiji, mè ebi ibot mkpulu kiji, mè ebi ngwugwa kiji, mè ebi nriran kiji, melek ebi nte nte kiji, 17 mije, eji mîrọ ijo inu me isi Okumugwem. 18 Eji mînye ibot inyi ọmọ, eji kpegban̄ ida Okumugwem Awaji kiji, eji kpeje igọọk me lek orọmijọn̄ Okumugwem onyibe eji. 19 Bene me akarake Okumugwem osan̄abe ebi nte nte kiji isibi me ido Ijipiti, mege inire chereyi, eji ekinyenye ibot inyi Okumugwem Awaji kiji, eji kpekeke si inye me lek kan̄, eji ekijijit irọrọ inu îbe eji erọ. 20 Eya orọ, ùrioon̄ mè ufieek-otu cha echi Okumugwem otumube inan̄a me otu kè Mosis ogwu ikwaan̄ kan̄ me mgbọ îsan̄abe ebi nte nte kiji isibi me Ijipiti iboninyi eji ijọn̄ òkisibi anam mè mfut, ọmọ ore ùrioon̄ òkitoon̄ eji me chereyi. 21 Eji kpegban̄ ida Okumugwem Awaji kiji mgbọ geege, me lek otutuuk ikọ geelek ebi nriran îriabe inu etumube inyi eji. 22 Ire, otutuuk kiji, ogwu ikup, ìkilibi igọọk inu ejit ikpak kan̄ otọbe inyi ọmọ; eji otutuuk ene ekisi iriaak ofifi awaji, mè ikirọ inu echi Okumugwem Awaji kiji ochabe.’