2 Ebi Ju îtetbe me unye ibe ekegọọk ọmọ enenibe ọmọ, “Kakpan̄ ene ikpak ikpak me oniin̄ eyi anam oron okirọ. Ire, sa ulibi ògbegbe nyi usen ya eyi Awaji ogwu òkimọọn̄ inu geelek osun̄be me umin, mè isun̄ me mbuban igak otutuuk ofifi usen geelek.”

3 Ogwu njijọ ene ya ododo ibe mè ìre îkaan̄ ogwu ubọọn̄ ge me emen inyọn̄ ogwu ònyinyi ida ibe ekesun̄ Usen Mbuban ye?

4 Ife cha efọfọọk ọmọ ibe, “Îre Okumugwem, ogwu òkup me ògat ugwem me lek kan̄, ogwu òkikpulu me emen inyọn̄, onyi ida ibe ekesun̄ Usen Mbuban.”

5 Ifọfọọk ibe, “Emi me lek n̄a si, emi ìre ogwu mkpulu me linyọn̄. Emi nkinyi enyi ida ibe enyi eteen̄ nroon̄ akọn̄ ekwaan̄ me lek, mè erọ mbubek ogwu ubọọn̄ obe enyi erọ esan̄a.” Ire, ìkakọt ìrọ filafila inu ya îtọtbe irọrọ.

6 Nikanọ îsa me gogolek mè ugumulek itọt ibe ke ọmọ mônama obubot me oyet ama isa ikikeek ntim-mkpan̄ ọmọ obotim ikpan̄ Judas mè urum ebi kan̄. 7 Ire, Judas okekeke inye me lek ikpọchieen̄ kan̄ ibe ke Okumugwem môtap ubọk inyi ọmọ. 8 Itutumu inyi ebi kan̄ ibe ekafieek owot me lek akọn̄ ebi ofifi ido ekisa inu, ire, mè ekeek mgbọ òraraka cha echi ntap-ubọk onan̄abe me emen inyọn̄ inu inyi ema, mè etoon̄ ejit ibe ke ema mêtim si ikpan̄ mgbọ keyi inan̄a me ntap-ubọk Ogwu Òkaan̄ Unye Geelek.

9 Judas onenisa ikọ ònan̄a me ikpa Ikan mè ikpa ebi nriran itap ema efuuk me emen, mè ikeek ema si akọn̄ echi ema etimbe ikpan̄ iraka, mè isa me ikeya itap ema aya ulọk ònyenye me emen. 10 Mgbọ îrọbe ejit kiban̄ inye isan̄a, inyinyi ema ida, mè ijeen̄ ema si ataak ebi ofifi ido ekikan̄, mè ike ife cha kpekisun̄ inyan̄a-ibot. 11 Nroon̄ akọn̄ înyibe ema ge ge ìkare isasa agbọ melek otunwa itoon̄ ejit, ire, ìnyi ema ikọ òkiribi ekwukwu unye-ejit me emen ene, mè isa ilaak ògbegbe utoon̄-ejit eyi îmun̄be òbet lek ilaak ọkpọchieen̄, itap ema unye me emen.

12 Inu îmun̄be ìre ikeyi: Ìbe ke ọmọ îmun̄ Onias, ogwu òwuwuuk lek ire ogwu òban Awaji, ata ebilene òsibi isi, ogwu òsisiki lek, mè ikaan̄ mmemem eru, ogwu òkinye otu itumu ikọ ògbegbe, ogwu ekpukpobe karake nsek me ata irọrọ geelek me emen ilaak ya; ke ọmọ ìmun̄ ike Onias obenebe ubọk kan̄ ijeen̄ inyọn̄, mè ikiriaak uriaak me ibot otutuuk ido ebi Ju. 13 Ọmọ onenimun̄ si ofifi ene okanabe isibi, mè ikup òrirọ òrirọ bak me lek isọọn̄ ibot kan̄ mè umin kan̄, mè òrirọ umin ubọọn̄ kan̄ mè unye kan̄. 14 Onias onenitumu ibe, “Ene yi ìre Jerimaya ogwu nriran Awaji, ogwu òmama ebi Ju ebi ngwan̄ kan̄, mè ikiriaak uriaak enenen me ibot ebi ene mè ibot Jeruselem, ama mbuban.”

15 Jerimaya onyanyana ubọk agan̄ ulom kan̄, mè inyi Judas oge akọn̄ alata araran̄, mè ikitumu inyi Judas ibe, 16 “Bọkọ oge akọn̄ mbuban yi, òrere uche Awaji ochebe inyi owu, ọmọ ke owu obosa isọp ebi oriara kwun̄ igwook.”

17 Ikọ kè Judas okekeke, mè ikaan̄ unye, mè irọ ibe ejit nsabọn irieen̄ inye kubọk eyi ebi ugane. Sa me ukarajit ya, ema etutumu ifieek ibe ke ema kpebekigbugbaan̄ me ama me ama, ire, ke ebejijibi akọn̄ inin̄, mè isa otutuuk unye-ejit itim akọn̄ ya ubọk ubọk isa irọ ifieek. Mije, ilọ me ikeya, ke unan môninin̄ me lek ama kiban̄, mè ere mbuban kiban̄, mè Uwu Mbuban kiban̄. 18 Ufieek-owot kiban̄ ìkamalek ìkup me lek ebi nwa kiban̄ melek bọn kiban̄ mè ebi ngwan̄ kiban̄ ebirieen̄ melek bọn ulọk kiban̄. Ere ufieek-owot kiban̄ ominbe ichit ìre me lek Uwu Mbuban ya egbamabe lek itana. 19 Ejit ebi ìsisik me emen ama ìkare ijọn̄, ema ekifieek owot me lek akọn̄ ebetim me oyet akọn̄, ere kpunube okwukwek.

20 Otutuuk ene ekekikpọ agan̄ òbotim ikpan̄. Ebi ochicha mînin̄ igbet, mè idọmọ lek isun̄ me onineen̄ akọn̄, mè igwook eniin̄ me ere òkup uyọt uyọt, mè ito ebi inyọn̄ inyinya me otu utọn̄ otu utọn̄. 21 Judas Makabiyọs omumun̄ urum ebi ìkekeke ọmọ me isi, mè esese chieen̄ nroon̄ akọn̄ ife cha ekaan̄be, mè eniin̄ cha òkup nriki nriki, mè inibene ubọk ijeen̄ inyọn̄, mè igwen Okumugwem ogwu òkirọ uyeke inu, mije, îriọọn̄ ibe ke ìkare unye eyi nroon̄ akọn̄ ke ebesa itim ikpan̄. Ire, ke ìre ubọk geelek Okumugwem odọmọbe ke îkinyi ebi ìgbegbe ntim-mkpan̄. 22 Judas oneniriaak uriaak ibe ikeyi:

“Jei Okumugwem, îre owu oria ogwu osat kwun̄ me ukot kè Ejikaya ogwu ubọọn̄ Judia, mè ikpan̄ efit mè akọp obop ene jeeta mè obop go me lek ebi urum akọn̄ kè Senakerip. 23 Eya orọ, mgbọ keyi, Ogwu Ubọọn̄ Inyọn̄, soso, ria ata ogwu osat kwun̄ na, inyi inirọ ebi ochicha kiji efieek owot, mè ekeran. 24 Sa unye ubọk kwun̄ jijaka ife chi ebi ìkitumu owu ifiat, ìnunu akọn̄ me lek ebi owu ogobobe isun̄ me mbuban inyi lek kwun̄.” Ikeyi ke îriaak uriaak kan̄ ifieek.

25 Nikanọ mè urum ebi kan̄ ejijibi akọn̄ ikije, mè ikiwut otita, mè ikikọt okwa akọn̄. 26 Ire, ebi urum akọn̄ kè Judas ejijibi akọn̄ ikweek ema, mè ikiriaak uriaak, mè ikibeek Awaji ntap-ubọk. 27 Ikeya ke ema ekisa ubọk ikitim akọn̄, mè ikiriaak Awaji me emen ejit, mè ikpan̄ iso akọp obop ene ita mè obop go, mè ikibele ejit enenen ike Awaji osan̄abe lek kan̄ isibi itap ubọk inyi ema.

28 Mgbọ akọn̄ ya otabe ema ebenebe ikika me unwọọn̄, ema emumun̄ Nikanọ olaakbe nkwukwu ibia, melek otutuuk nroon̄ akọn̄ kan̄ me lek osobe isi, mè itet ọmọ chieen̄ me lek. 29 Ema etataan̄ ukpo, mè idimi ere ikitọn̄ Okumugwem Ogwukaan̄ Inyọn̄ mè Ijọn̄ me usem ebi nte nte kiban̄.

30 Judas Makabiyọs, ogwu òsasa otutuuk lek kan̄, akpalek mè ibot ejit, ikitim akọn̄ me ibot ebi ido kiban̄, mè itet ata ejit îkaan̄be akarake nsek kan̄ me lek ebi kiban̄ inye, oneninyi ida ibe efieek ibot melek ubọk kè Nikanọ, mè eben esa efo Jeruselem.

31 Mgbọ Judas me lek kan̄ orebe Jeruselem, igwegwen ebi ido kiban̄ mè ebi ngwugwa ititiin̄, mè inikeke me isi ntook ngwugwa iria ibe esi egwen ebi ìkup me emen uwu mgban akọn̄ enu. 32 Inenijeen̄ ema ibot kè Nikanọ, njijọ lek ene ya, mè ubọk filafila ene ya, eyi îsabe ugumulek inyana ida Uwu Mbuban eyi Ogwu Òkaan̄ Unye Geelek. 33 Inenifieek alọm kè Nikanọ ogwu ikariọọn̄ge Awaji ya, mè ibe ke ebekikọkọọk alọm ya okpọkọ okpọkọ inyi ebi kè ofut eketaka, mè iben ibot kan̄ ijeen̄ iyaka ikikpọ Uwu Mbuban, inyi ire mkpukpe mbubut kan̄ osabe ijet ọmọ.

34 Otutuuk ene cha ebebene isi ikpọ inyọn̄, mè ikitọn̄ Okumugwem ogwu òjejeen̄ unye kan̄ isibi, mè ikibe, “Itọn̄ ikup inyi Awaji ogwu òsusun̄ Uwu Mbuban kan̄, inyi ekafifila!”

35 Judas obeben ibot kè Nikanọ ijeen̄ ididen̄ me lek uwu mgban akọn̄, inyi ire inu ata-ikọ eyi òrọrọ ibe ntap-ubọk Okumugwem ikpọk mbum me chieen̄ otutuuk ene, mè isibi utoon̄. 36 Otutuuk ene egbagbaan̄ ichieek, mè inyi ikan ibe ekalọlọ ikekikeek usen yi, mè ikito ijọk me usen yi, òrere akọp mè usen ita me akọp mè onyan̄ iba, eyi ekigwen Adari me usem Aram. Ofit iwele usen ya ìre usen ijọk kè Mọdikai.

37 Ikeya ke inu geelek okana igwook me lek kè Nikanọ. Bene me mgbọ ya, ama Jeruselem onenire ama ebi Ju ekaan̄be. Eya orọ, mâfieek mfufuk n̄a me ere keyi.

38 Ire mkpa itop, mè ikpa itat, achubọk inu emi mweekbe ire eya. Ire ǹkarọ ìjaan̄, mè ire ikup ubọk ge ubọk ge, otutuuk eyi nkọtbe irọ ire eya. 39 Mije, inwọnwọ miin̄ gaalek, mè ìre mudim gaalek, ìkitap ene unan me lek. Ire, isigbaan̄ miin̄ melek mudim igwa, îra ikitop, mè ikirọ ibe ene ikirie utop otu. Ikeya si, ata mfufuk eriọọn̄be ubọk ige ìkitop me utọn̄ ebi ìkifufuk. Nkana igwook me ikeyi.