3 Ene ge ekigwen Alikimọs, ogwu òwuwuuk lek ire ogwu òban Awaji, mè ififila lek kan̄ ikirọ orọmijọn̄ ebi Giris me mgbọ ùrioon̄ onin̄be ya, onenimun̄ ibe ke utelelek ìkpokup inyi ọmọ, ke kpukpunu si irek inyi ọmọ isisi ikwaan̄ me lek ntook mbuban ofifi. 4 Ineninan̄a isi lek ogwu ubọọn̄ Demetirọs me acha efit mè akọp go mè ge, mè isa okpibot ubọọn̄ alata araran̄ melek nlak asaak, igbaalek agọọk uti olifu ekisa irọ orọmijọn̄ me Uwu Mbuban, isi iche inyi ogwu ubọọn̄ ya. Usen keya, ìkatumu-nu nkeek kan̄ geege ìsibi. 5 Ire, irek onenisibi inyi ọmọ isasa ijo nkeek kan̄ ya irọ inu. Irek ya ìsibi me mgbọ Demetirọs ogwenbe ọmọ inu me ntitiin̄ ebi oru, mè ido ọmọ inu òfo me lek eru ebi Ju, mè inu ema ekitọt irọrọ.

Inenifọọk ibe: 6 “Ebi Ju ebi ekigwen ebi Kasidi, ebi Judas Makabiyọs orebe ogwu ibot inyi, ìre ebi ìkima akọn̄, mè ikitap unye-ibot me etete ebi ene, ebi kpekichieek ibe ido ikup me esuuk. 7 Îre eya orọ nkanabe irek umin n̄a òje me ìrot ebi nte nte kiji, òrere irek ogwu òban Awaji, ito, mè inan̄a inu me ere keyi mgbọ keyi. 8 Mije, me adasi irek, emi nkaan̄ ata ulọk ofolek inu geelek òkup ogwu ubọọn̄ me uyọt. Òso iba, nkaan̄ ulibi me lek ebi melek n̄a esibibe me ido ge. Ufieek-owot n̄a ìre ke, inan̄a me lek burubut inu ebi mbakbe cha ekirọ, ufialek òkukup me otutuuk ido kiji mgbọ keyi îmin enenen. 9 Ogwu ubọọn̄, owu ora igen ibot iriọọn̄ otutuuk inu chi. Soso, nye lek tap nkeek ofolek nnwọn eyi ido kiji mè eyi ebi ido kiji ebi ekitutuku, kubọk owu okikaan̄ ata ejit irọ nnwọn inyi ebi otutuuk ife. 10 Mije, eyi Judas okukup me ògat ugwem, kpunu ubọk ido kiji obokọt ikukup me esuuk.”

11 Mgbọ Alikimọs otumube ikọ kan̄ isan̄a, ebi ogbo unene ogwu ubọọn̄ kechilọ, ebi ìchacha Judas, egwagwat lek isa irek keya irọ ibe Demetirọs inaan̄ ejit enenen ikeme Judas. 12 Mgbọ yaage, ogwu ubọọn̄ Demetirọs ogogobo Nikanọ, ogwu ibot ebi akọn̄ inyọn̄ eniin̄, ito ibe ikana ogwu ibot mkpulu me agan̄ Judia, mè iria ọmọ isi agan̄ ya, 13 mè inyi ida ibe ikpan̄ Judas, mè iyiyala urum akọn̄ kan̄, mè isa Alikimọs irọ ogwu òban Awaji me Uwu Mbuban ya eyi òmimin ichit.

14 Ebi ofifi ido kechilọ ìkup me Judia, ebi ìlilim inan̄a mije kè Judas, egbugbuku igọọk Nikanọ. Ema ekikeek ibe ke ufialek mè ùrioon̄ òbotoon̄ ebi Ju mônin̄ oruru inyi ema.

15 Mgbọ ebi Ju enọbe ibe ke Nikanọ òkinu, ke ebi ofifi ido ìlilim cha mîgbaan̄ itọbọ melek kan̄, ema egwọgwọ mfuun̄ igwook me ibot kiban̄, mè iriaak uriaak ibeek mbeek me ubọk Awaji ogwu òsusun̄ ebi kan̄ ire mgbọ geelek, ogwu ìkalọlọ ikekibieen̄ ebi ìrot kan̄ ikeke ikaan̄, sa me isasa lek kan̄ gaalek inikeke ikput.

16 Judas, ogwu ibot kiban̄ onyinyi ida, ema ejijibi akọn̄ mgbọ yaage ikweek ife cha me gwun̄ ama ge ekigwen Desawu, mè itim ife cha akọn̄ me lek. 17 Saimọn, ngwan̄ kè Judas, otitim si akọn̄ me lek kè Nikanọ. Ire, bak me lek ebi ochicha enin̄be ọmọ me nriki, ubọk kan̄ ogbegbeen̄ sọntiik mgbọ.

18 Ire, mgbọ Nikanọ onọbe ike Judas mè ebi kan̄ enyebe lek ire, mè ike ema ekinye ejit itim akọn̄ me ibot ido kiban̄, ibebe ke ifafiat eje ene ìkpofieek ikọ ya. 19 Eya orọ, ineniria Posidoniọs, mè Tiodotọs melek kè Matatiyas isi lek ebi Ju, ibe esi echieek use ibe ema erọ unene, mè esa use kè ebiba enu si.

20 Mgbọ ema agan̄ iba cha etapbe chieen̄ ikpọ ubọk ebesa irọ mgbaan̄-nchieek ya isan̄a, ogwu ibot ololook ebi akọn̄ kan̄. Ike îkupbe kubọk ema ìre ejit ge, ema enenichieek me lek inyan̄a-ibot ya. 21 Eya orọ, ebi ibot cha esusun̄ usen ema ebechichini me nlelet; uji akọn̄ ge ge onanan̄a me agan̄ iba cha inu, esasan̄a ikasi ebi ilile me agan̄ iba cha isibi inigwook. 22 Judas îto ebi akọn̄, melek nroon̄ akọn̄ me ubọk me ere òkup me uyọt uyọt, inyi mêkput ofiaan̄ geelek ogwu ochicha môsabe inu me nriki. Ire, ebi ibot iba cha eninin̄ oru kiban̄ me esuuk. 23 Nikanọ oneniluk me Jeruselem, ìkarọ inu geege ìkọọn̄. Ire, iraria otutuuk ebi ìgbugbuku igọọk ọmọ cha ibe efon. 24 Inenitaba Judas iriaak me lek kan̄, ogwa melek kan̄ ekekikup mgbọ geelek. 25 Îrọ Judas inye ibe ido nwa, mè ikaan̄ bọn. Judas ododo nwa, mè itọbọ efuuk ikiluk ugwem ike ekiluk.

26 Mgbọ Alikimọs omun̄be ike Nikanọ mè Judas ekigbaan̄ ije ijaan̄, isasa ikpa mgbaan̄-nchieek ya isi lek ogwu ubọọn̄ Demetirọs, mè itumu inyi ibe ke Nikanọ îkpaka ibot inyi mkpulu, ke îsa Judas, ogwu ochicha ido ya, ito ibe mônibọkọ irek ọmọ okupbe.

27 Ogwu ubọọn̄ onanaan̄ ejit enenen me lek ataak ataak ikọ uraamọn ya ogwu ijo ene ya osabe inikpa inyi ọmọ. Igege ikpa ijet Nikanọ ibe ke ọmọ ìkabọkọ mgbaan̄-nchieek ya ìtap, mè ogwugwu igon Judas me mkpọn, mè iria inu me Antiọk ugwat ugwat.

28 Mgbọ ikpa ya orebe Nikanọ ubọk, îsisik ọmọ lek, mije, ìkaweek ichichichaka mgbaan̄-nchieek ya me mgbọ ogwu melek kan̄ ìkarọ inu geege ìlọ. 29 Ire, bak me lek ke ìkpokọt ikpaka otu ikọ ogwu ubọọn̄, ikekikpọ ibe irek isibi, inyi ọmọ isa ifiọk ikaan̄ Judas. 30 Judas obebene ikimun̄ ibe ke Nikanọ ìkirọ ọmọ inu me lek uyọt uyọt, mè ikitumu ikọ inyi ọmọ unye unye igak ubọk îwuukbe lek ikirọ. Inenikana igwook ibe ke irọrọ ya îkirọ ìkare me ata ekiket. Eya orọ, ichachiaan̄ owuwa ebi melek kan̄, mè ilibi isi ilet, inan̄a me chieen̄ kè Nikanọ.

31 Mgbọ Nikanọ omun̄be ibe ke Judas îfit ọmọ ifiọk, isisi Uwu Mbuban ilile ya òkup me mbuban, me mgbọ ebi ngwugwa ekigwa ngwugwa, mè inyi ebi ngwugwa ida ibe etet Judas eyaka enyi ọmọ. 32 Ebi ngwugwa enyanyan̄a ibot ibe ke ema kperiọọn̄ ere Judas onin̄be. 33 Nikanọ onyanyana ubọk agan̄ ulom kan̄ ida Uwu Mbuban ya, mè inyan̄a ibot ibe, “Ire enyi kpeyaka Judas itap emi me ubọk kubọk ogwu mkpọn, m̀bagbugbugbọ Uwu Mbuban Awaji yi igwook me ijọn̄, mè inama uja isi-ijọn̄ inyi yọk Dayọnisọs me akpat kan̄.” 34 Itutumu isan̄a, ijeje inan̄a.

Ebi ngwugwa ebebene ubọk ijeen̄ inyọn̄, mè igwen Ogwu Òkitim Akọn̄ ibot ido kiji mgbọ geelek, ikibe: 35 “Jei Okumugwem ogwukaan̄ otutuuk ene, owu ogwu inu geege ìkakinan, ìneneme owu ibe Uwu Mbuban, ere owu okiluk, ikup me etete kiji. 36 Eya orọ, mgbọ keyi, Ogwu Mbuban, owu ogwu inu geelek òkup me mbuban okupbe inyi, usen inen keyi ke egwọk uwu yi itana, kput filafila me lek uwu yi re mgbọ geelek.”

37 Enenikpa ijo ikọ ibak ene ge ekigwen Rajis, òrere ene ge me lek ebi ugane Jeruselem, inyi Nikanọ. Ebe ke Rajis îma ebi ido kiban̄ enenen, ebi ene emọmọnọ ọmọ kubọk ene òmimin, mè ibak me lek ata ejit îkaan̄be ikigwen ọmọ “Nte ebi Ju.” 38 Me mgbọ òraraka, mgbọ ebi Ju kpekigbaan̄ inu irọ melek ebi ofifi ido, mîtap ọmọ mkpọn mije ubọk iriaak Awaji ebi Ju. Isasa me ikpele ulọk ubọk iriaak Awaji ebi Ju itap akpalek kan̄ mè ugwem kan̄ me unan. 39 Nikanọ oraria ebi akọn̄ ìwawa iraka efit ene go ibe esi etet Rajis, inyi ọmọ isa me ikeya ijeen̄ ike ọmọ ochabe ebi Ju ire. 40 Mije, ìkikeek ibe ke ire ọmọ itet ene yi, ke môtap ebi Ju ikpele unan me lek. 41 Mgbọ ebi akọn̄ cha ebenibọkọ uwu-oket ere Rajis onin̄be, mè ikigọ otunchit oyet egep ya, mè ibe esa ukan̄ enetaak me lek afọn̄ cha, Rajis omumun̄ ibe ke mîkpa mbin ikana ọmọ okokop, mè irọn̄ itoon̄ me otu oge akọn̄ kan̄ iweek ikpakpan̄ lek kan̄. 42 Îma ikwukwu mkpa òsisibi isi igak irọrọn̄ inin̄ ubọk ebi ikpak, isi ibọkọ tukutuku eyi ikagbege ibe ebi owot iman ilile ọmọ osibibe ebọkọ.

43 Ire, mije ere okupbe wuruwuruwuru, ìkarọn̄ ìtat me otu oge ya. Ebi urum akọn̄ cha ekekigbuku me isotu cha inin̄ uwu ya. Rajis otetet ejit inye ilibi inene mgban ya, mè iwulu irọn̄ inin̄ etete urum ene cha. 44 Ire, ebi urum ene cha egwagwat lek ikpebe lek ida ibọkọ, ọmọ orọrọn̄ me ukpọk ijọn̄ me eden̄ kiban̄. 45 Isasa ugwem me lek, melek unaan̄-ejit me ejit, itọtọbọ ijibi, ubọk geelek unan kan̄ ominbe, eje okekigbuk si isibi ọmọ melek, mè ilibi itibi etete urum ebi ene cha, mè isi ikeke me inyọn̄ ewuuk òbebene. 46 Me ike mgbọ ya, eje îsibi ita me lek, isasa ubọk kan̄ itaba nkat kan̄ isọp, mè isa ubọk iba kan̄ ikpulu ifiaak igwook me lek ebi urum ene cha, mè ikigwen Ogwukaan̄ ugwem mè efuuk ibe ikpọk iyaka nkat cha inyi ọmọ. Ubọk îsabe ikwu mkpa ire eya.