3 Menelọs okakana igọọk ema ikeke, mè isa ifiọk ikirọ Antiọkus inye. Ìkarọ ìnye bak me lek nnwọn eyi ido kan̄, ire, ìkeek ibe ke mêsa ọmọ ito me irek ogwu òban Awaji. 4 Ire, Ogwu Ubọọn̄ Ebi Ubọọn̄ orọrọ ibe Antiọkus inaan̄ ejit ikpak ikpak ikeme ogwu ijo ene yi. Lisias onenitumu inyi Antiọkus ibe ke ìre Menelọs ore ogwu òkisa otutuuk ufialek isibi, Antiọkus onyinyi ida ibe etet Menelọs esa esi ama Beria esi ekpan̄ ubọk ebi ama ya ekikpan̄ ene. 5 Me ama ya, uwu-oket ge òwa ntọn̄ ojotbe emen. Ubene uwu-oket ya ìre akọp mè ejit ge mè ìkike iba. Mînama ukpọk-otu ikana me inyọn̄ uwu ya ikana okokop me agan̄ emen, eyi òkibeke ikana ikook inin̄ emen ntọn̄ ya. 6 Ene geelek òchachaka mbuban, mè ìre ogwu òkpọkpọ ikirọn̄ ikan, otutuuk ebi ama ekisasa ene ya inene isi ere ya, mè ida itọbọ me ere ya, inyi irọn̄ ikwu. 7 Ikeya ke Menelọs ogwu ikpak ya oje ikwu mkpa, kpefufuun̄ ọmọ kubọk ekifuun̄ otutuuk ene. 8 Inu keyi òrọrọ ọmọ okpọkpọ inen, mè igbe. Mije, ọmọ îrọ owuwa ijo inu ikeme ntook ngwugwa Awaji, eyi ukan̄ kan̄ melek ntọn̄ kan̄ okupbe me mbuban. Ikeya si, ọmọ ìchichini mkpa kan̄ si me emen ntọn̄.

9 Ogwu ubọọn̄ Antiọkus onenijibi akọn̄ inu, mè iben me ejit irọrọ ebi Ju inu ikpak echi òfefieek enenen igak echi òrọrọ ema me ukot kè nte kan̄. 10 Mgbọ Judas onọbe inu ya, inyinyi ebi ene ida ibe enin̄ uriaak ikarek mè eririeen̄ egwen Okumugwem, inyi initap ubọk, eyi mgbọ keyi-nu, inyi ema, ebi ebi ofifi ido ebenitet ikan kiban̄ ibọkọ, mè ibọkọ si ido kiban̄ mè Uwu Mbuban kiban̄ igbaalek, 11 mè ikachechieek ibe ema erọn̄ enin̄ ubọk ebi ofifi ido ebi kperiọọn̄ Awaji, me sọntiik mgbọ keyi gaalek ema ebebebene ikiluk ata ugwem. 12 Mgbọ otutuuk kiban̄ ebọkọbe nteme ya, mè igbaan̄ ibeek Okumugwem ogwu ejit nsan mbeek kiban̄, mè ikito ito, mè ikijin otu, mè ikilaak inyana ikana isi ikwuun̄ otuuk kè egwe ita, Judas otutumu ikọ ikat ema ejit, mè ibe ema enan̄a ekeke ebem lek.

13 Judas melek ebi ugane eneninin̄ oru me nlelet. Mgbọ enin̄be oru ya isan̄a, Judas otutumu ifieek ibe ke ọmọ môsa me ntap-ubọk Awaji ijibi akọn̄ ikweek ogwu ubọọn̄ ya, isi irọ ifieek, ke ọmọ ìkpokukup ikikpọ ibe ogwu ubọọn̄ ya iben akọn̄ inu me Judia, mè inibọkọ ama Jeruselem. 14 Eya orọ, iyayaka inu geelek òfo me lek akọn̄ ya itap me ubọk Ogwu Òrom Linyọn̄, mè iteme ebi akọn̄ kan̄ ibe etet ejit enye etim akọn̄ ekwaan̄ me ibot Ikan kiban̄, mè Uwu Mbuban kiban̄, mè Jeruselem, mè ido kiban̄, melek orọmijọn̄ kiban̄. Ema enenirieen̄ akọn̄ me agba lek ama Modeyin. 15 Judas onyinyi ebi kan̄ ikọ ebekitiki me akọn̄ ya ibe, “Awaji okinyi ntim-mkpan̄.” Inenigobo nsabọn irieen̄ ebi ejit onyebe ichit, mè isa ije me eririeen̄ inin̄ me ere òkup igbet lek uwu ọfọ ogwu ubọọn̄, mè ikpaan̄ ene mêsobe obop iba me emen orieen̄ akọn̄ ife cha, mè ichim eniin̄ òkije me isi akọn̄ ebi ife cha ikpan̄, mè ikpan̄ si ogwu òkikọp. 16 Me òta kan̄, ema etatap ukpook mè wọlọwọlọ ijot otutuuk orieen̄ akọn̄ ya, mè ije ika me ntim-mkpan̄. 17 Egwe ìkitotoon̄ inu mgbọ ema erọbe inu cha ifieek. Îre Awaji otap ubọk inyi ema, mè ikput ema lek, inyi ema ekọt erọ inu cha.

18 Antiọkus omumun̄ ubọk ebi Ju ekichieek mkpa me lek akọn̄, mè iweek oniin̄ ònwọnwọn eyi îbosa itim akọn̄ me lek orieen̄ akọn̄ ebi Ju geelek. 19 Îjibi akọn̄ inin̄ Bet Suru, ama mgban akọn̄ ebi Ju ònyenye, ire, ebebieen̄ ọmọ ikpebe. Ikpọkpọk inin̄, etitim ọmọ ikpan̄.

20 Judas oraria inu geelek òkup me uyọt inyi urum akọn̄ òkup me ama mgban akọn̄ ya. 21 Ire, Rodokọs, ogwu akọn̄ ebi Ju, okekiben nlelet inu akọn̄ ebi Ju isi ikpa inyi ogwu ochicha. Eweweek iriọọn̄, mè itet ọmọ ikpan̄.

22 Ogwu ubọọn̄ onunu òso mgbọ iba inigọọk ebi Bet Suru itumu ifieek, ema, isi mè udun̄, echechieek use. Isasa ebi akọn̄ kan̄ ikpebe, mè iniyaka isi ida Judas melek ebi kan̄, etitim ikpan̄ ọmọ.

23 Me ike mgbọ ya, inenibọkọ etip ibe ke Filip ogwu îtobe me otuchieen̄ mkpulu me Antiọk, îbene unye-ibot. Eya onenifieek ọmọ ejit, igwegwen ebi Ju, mè igọọk ema irọ esuuk, mè ichieek ike ema etumube, mè inyan̄a ibot irọrọ inu ònenen inyi ema, mè igọọk ema ikana igwook, mè igwa ngwugwa, mè inyi Uwu Mbuban ulibi, mè iche uche inyi mêsabe ikisi ikwaan̄ me ere mbuban. 24 Îbọkọ si Judas Makabiyọs itap ijaan̄ lek, mè inito Egemọnides ibe ikikpulu ibene me Tolemayas ire Gera, 25 mè inan̄a isi Tolemayas. Ebi Tolemayas enanaan̄ ejit me lek mgbaan̄-nchieek ya îkaan̄be melek ebi Ju. Unaan̄-ejit kiban̄ înye enenen, ire lek ema eweekbe ibe egwak otu mgbaan̄-nchieek ya. 26 Ire, Lisias oneninene ikeke me ibot ikọ ya, mè itumu ikọ inwene ebi ama ya ejit, mè irọ inyi ema enwene ejit, mè ebọkọ mgbaan̄-nchieek ya etap me ata ejit. Itata me ubọk, igwugwu ikom ifo Antiọk.

Ubọk Antiọkus osabe inu akọn̄, mè iyaka ikpebe ire eya.