3 Me emen mgbọ ya, ebi ama Jọpa erọrọ inu òlọlọ ijọn̄. Ema egween̄ ebi Ju ìluk me ama kiban̄ ibe esibi enu, melek ebi nwa me nsabọn, mè enenin̄ emen uji ema esun̄be, inyi ema ekọp esibi esi egwele efet. Kperọrọ kubọk ke ema mîkaan̄ ijo nket ibak ebi Ju. 4 Bak me lek îrebe ebi ama echieek ibe esi egwele efet ya, ebi Ju ebọbọkọ itap, mije, ekiweek si iluluk me esuuk, kpekpọ chieen̄ ibe ke inu geege môrọ. Ebi Jọpa esasa ema ikọp isibi okwaan̄, mè irek ema ifiin̄, otu ifuk kiban̄ ìkasiki ìraka efit ene iba.

5 Mgbọ Judas onọbe etip nnaan̄ ya erọbe me lek ebi kiban̄, ilolook ebi kan̄. 6 Ema eneniriaak uriaak igwen Awaji, ogwu unen oyerebet, mè ijibi akọn̄ isi lek ebi ìkpakpan̄ bọn ulọk kiban̄, mè isa me irak udun eririeen̄ itap ukan̄ itaka atasuk ya, mè iwọp uji geelek òkup me atasuk ya, mè ikpan̄ ebi geelek ìlilileek me ere ya. 7 Bak me lek egonbe otutuuk otunchit ama ya ichit, ema egwugwu ikom ika, mè iben me ejit ibe ke ema mêkpọk inu inijijaka otutuuk ama Jọpa isan̄a.

8 Ire, ineninọ ibe ke ebi ama Jaminia mîtọt ikpakpan̄ otutuuk ebi Ju ìluk me etete kiban̄ isan̄a si ike ebi Jọpa erọbe. 9 Inenisi akọn̄ me eririeen̄ me lek ebi ama Jaminia, mè itap ukan̄ iwọp atasuk kiban̄ melek uji kiban̄, ekukup me Jeruselem, akọp ewuuk ije ita, ikimun̄ alọm ukan̄ ya okibeen̄.

10 Ema eneninan̄a me Jaminia ije ijọn̄ọ ere iraka ewuuk ije iba ibesi itim akọn̄ me lek kè Timọti. Urum akọn̄ ebi Arabu, ìwawa iso obop ebi akọn̄ ukot ukot go mè efit ebi inyọn̄ inyinya go, ebebene ema akọn̄ me lek. 11 Akọn̄ ya înye enenen, ire, sa me ntap-ubọk Awaji, Judas mè ebi kan̄ etitim ikpan̄. Ife chi Judas otimbe ikpan̄, ìkijijen̄e ikana me emen èwê ibọọk anam kiban̄, ebebe Judas igọọk ema irọ unene, mè ichieek use inyinyi ọmọ anam, mè itatap ubọk inyi ọmọ me owuwa oniin̄. 12 Judas okekeek ibe ke ife cha mêrọ inu inyi ọmọ me owuwa oniin̄, mè ichieek irọrọ esuuk ya melek kiban̄. Mgbọ ema egbaan̄be ichieek use cha isan̄a, ebi Arabu cha efofon uwu ọfọ kiban̄.

13 Judas oninin̄ akọn̄ me unye ama mgban akọn̄ ge enamabe mgban mè obubot òbebene ikana, eyi owuwa ebi ofifi ido geelek elukbe me emen. Ekigwen ama ya Kasipin. 14 Ebi ama ya ekisa mgban ama kiban̄ ònyenye melek inorie ema etaakbe ijot emen ama ya itoon̄ ejit, mè ibene ikirọ Judas mè ebi kan̄ ochak, mè ikinye chieen̄ itumu ikọ, mè ikichichaka erieen̄ Awaji.

15 Ire, Judas mè ebi kan̄ erariaak uriaak igwen ikpele ogwu Òkaan̄ Unye Geelek me linyọn̄, ogwu ògbugbugbọ mgban Jeriko me ukot kè Josuwa me ikasage nroon̄ akọn̄ ekisa igbugbọ mgban, mè ìre ofifi chieen̄ unye nroon̄ akọn̄, ìgbugbọ. Ema ejijibi inin̄ lek mgban ama ya me unye. 16 Sa me nkeek Awaji, ema ebọbọkọ ama ya, mè ikpaan̄ ene jakajaka, ire lek eje ene obaakbe ijot isi mun̄ me emen oyô ge òkukup igbet me lek ama ya. Oyô ya îwele iso irek ge me irek ini eyi ewuuk ije ge.

17 Ema eneninan̄a me ere keya ije efit mè akọp ewuuk ije go, mè inire agan̄ Karakisi ere ebi Ju ekiluk me ama ekigwen Tobiani. 18 Ema kpemun̄ Timọti me agan̄ ya, mije, bak me lek ikakọtge ìrọ inu geege me agan̄ ya, înan̄a, mè isun̄ urum akọn̄ ge ònyenye me ere ge itele. 19 Dositeyọs mè Sosipata, ene iba me lek ebi kè Makabiyọs, esisi ijijaka urum ebi akọn̄ Timọti otobe itele me uwu mgban akọn̄ ya, ife cha mîraka akọp obop ene.

20 Makabiyọs oneniche ebi akọn̄ kan̄ me ukpa me ukpa, mè ito ebi ibot igọọk, mè inisa ema igọọk Timọti ugwat ugwat. Timọti îkaan̄ efit mè akọp obop ebi akọn̄ ukot ukot iba, mè obop ebi akọn̄ inyọn̄ inyinya iba mè efit go melek kan̄ mgbọ ya. 21 Mgbọ Timọti onọbe ibe ke Makabiyọs òkinu ọmọ akọn̄ me lek, iraria ebibaan̄ mè nsabọn melek akpan inu kiban̄ ifo ere ekigwen Karanayim. Mije, îyọt ikpakpa mbin ikana ere ya, mè iyọt si ininin̄ ere ya, bak me lek oniin̄ ere ya ìkup nchit nchit. 22 Ire, mgbọ adasi ukpa ebi kè Judas ekanabe isibi, ukpook melek mbiribọ ogwogwook ichit lek ebi ochicha cha, mije, Awaji, ogwu òkimọọn̄ inu geelek, osan̄abe lek kan̄ isibi. Ema esasa me ukpook ililim itaak ibot me agan̄ geelek. Owuwa mgbọ, ema gaalek ekisak ebi kiban̄ unan me lek, mè ikililim isi ichim lek me otu oge akọn̄ ebi kiban̄. 23 Judas onyenye ejit igọọk ema, mè ikisọp ebi ijo ife cha igwook, mè ikpan̄ inu òbet lek akọp obop ene ita me lek kiban̄. 24 Dositeyọs mè Sosipata melek ebi kiban̄ ekpekpebe Timọti. Ire, itoto ifiọk inyi ebiba ibe etele ọmọ ifo, ke owuwa ebi nte mè ebi nga kè ebibi, melek ebi ngwan̄ ebirieen̄ usini kè ebibi ekup me ubọk kan̄, ke mfat môfat ife cha, ire mfat ifat ọmọ. 25 Me òta kan̄, mije îtumube ikọ iwa isa ichieek use ibe ke ọmọ môtele ebi Ju ìkup me ubọk kan̄ cha inyi eka, etetele ibe ifo, inyi esa me ikeya enyan̄a ebi ngwan̄ kiban̄.

26 Judas onenijibi akọn̄ isi Karanayim melek àwa yọk ekigwen Atagatisi, mè ikpan̄ akọp obop ene iba mè obop go. 27 Mgbọ îtimbe ikpan̄ ebiba, mè ijijaka àwa yọk ya isan̄a, ijijibi akọn̄ isi Efurọn, ama mgban okanabe, ere Lisias olukbe melek owuwa ebi ofifi ido geelek. Nsabọn irieen̄ ìnyenye lek ekekikeke me isi mgban ya, mè ikitet lek inye ikput ibe ekanin̄ ama ya. Esese chieen̄ nroon̄ akọn̄ melek mgbọlọ akọn̄ owa òjot òjot me emen ama ya. 28 Ire, ebi Ju erariaak uriaak igwen Ogwu Òkaan̄ Unye Geelek, isasa unye kan̄ ijijaka unye ebi ochicha kan̄. Ama ya orọrọn̄ inin̄ ubọk kiban̄, ema ekpakpan̄ ene iso akọp obop ene iba mè obop go me emen ama ya.

29 Ema enanan̄a me ere keya, mè inan̄a isi ama Sikitopolis, òrere efit mè akọp ewuuk ije iba inan̄a me Jeruselem me agan̄ inyọn̄. 30 Ire, ebi Ju ìluk me ere ya erọrọ ijot inyi Judas ibe ke ebi Sikitopolis mîkirọ inu ijaan̄ me lek kiban̄, mè ikikaan̄ ema ata ejit me lek, ògak ge, mgbọ ufialek isikeme ema. 31 Mije keya, Judas mè ebi kan̄ etọtọn̄ ebi ama ya, mè ibe ekekaan̄ si ata ejit ya me lek ebi owot iman kiban̄ ikeya efo isi. Ema enenika inire Jeruselem sọnja mgbọ sabum ijọk Nde onibene.

32 Mgbọ ijọk ya, eyi ekigwen si Pentikọs orakabe, ema ebeben akọn̄ isi lek kè Gọgiyas ogwu ibot mkpulu agan̄ Idumia. 33 Ogwa osasa obop ebi akọn̄ ukot ukot ita mè efit ebi inyọn̄ inyinya ini isibi inikweek ema. 34 Mgbọ ekitim akọn̄, ebi Ju inen mè inen, eninin̄ me akọn̄ ya. 35 Ogwu ene ge ekigwen Dositeyọs, ònan̄a me Tobu, òkup me inyọn̄ inyinya, mè ire ene unye, otetet Gọgiyas me lek ofọnti inyọn̄ kan̄, mè igọbọ ikam, mè ikidut ọmọ me unye ije ikiweek isasa ogwu njijọ ebilene ya njijom ifo. Ire, ogwu akọn̄ ge, ogwu inyọn̄ inyinya urum akọn̄ ebi Tirasia, olilibi inin̄ lek kè Dositeyọs, mè ifieek ubọk kan̄ isan̄a. Gọgiyas osasa me ikeya ilibi inwọnọ ifo ama Marisa.

36 Me ike mgbọ ya, Esidiris mè urum ebi kan̄ mîtim akọn̄ ijọn̄ọ mgbọ, efuuk otata ema me owot. Eya orọ, Judas oneniriaak uriaak igwen Okumugwem ibe isan̄a lek isibi kubọk ogwu ògọgọọk ema ikeke mè ogwu isi akọn̄ kiban̄.

37 Irariaak uriaak ya isan̄a, itataan̄ ukpo me usem ebi nte nte kiban̄ ikitiki akọn̄, mè ikọt okwa itọn̄ Awaji. Ema emọmọnọ ebi urum akọn̄ kè Gọgiyas me nriki, mè irieen̄ ema ikpebe.

38 Judas onenititiin̄ urum akọn̄ kan̄, mè isa ema ije isi ama Adulam. Ike Usen Mbuban okinu, ema egwọgwọk lek kiban̄ kubọk orọmijọn̄ okupbe, mè isun̄ Usen Mbuban me ere ya. 39 Me ofit iwele kan̄, ikukup me uyọt igwagwat lek ikpulu ebi akọn̄ oriebe cha isa isi ifuun̄ me agba lek bọn ulọk kiban̄ me udọn̄-ufuun̄ ebi nte nte kiban̄. 40 Mgbọ ekibeen̄ nkwukwu ife cha isa ije, enenimun̄ igba mkpọmfaka ebi Jaminia, eyi Ikan ogbanbe ebi Ju itatap, me irak ofọnti kiban̄ ge ge. Inenisibi utoon̄ inyi otutuuk ene ibe kè inu ya orọ ibe ife cha ekwaan̄ me akọn̄ ya. 41 Otutuuk kiban̄ etọtọn̄ ubọk irọ-inu Okumugwem, ogwu òkisibi unen oyerebet, mè ikikpọk mbum inu òlelet. 42 Ema eninin̄ uriaak ikibeek Awaji ibe itutuku otutuuk ijo inu geelek ema erọbe isan̄a kpai. Judas, ogwu òsibi isi ya, onenitumu inyi ebi ene ibe eda lek esan̄a me lek ijo inu, ke ebibi mîsa chieen̄ kiban̄ imun̄ inu òrọrọ ebi akọn̄ oriebe cha bak me lek ijo inu kiban̄.

43 Mgbọ eya orakabe, inenitip otitip me ubọk ebi melek kan̄, me ene me ene, isisibi obop ikpoko alata okuket iba. Ineniria ikpoko cha ijet me Jeruselem ibe esa egwa ngwugwa ijo inu. Inu îrọbe yi îjaan̄ mè igbe, mije, ọmọ îkaan̄ nkeek ofolek ijojomo me mkpa. 44 Mije, ire ọmọ kpomokpọ chieen̄ ibe ke ebi ìkwakwaan̄ mêjomo me mkpa, irariaak uriaak inyi ebi ìkwakwaan̄, kè more burubut inu ikagbege. 45 Ire, ire ìkiweek ata mkpukpe eyi esun̄be iban ebi ìkwakwaan̄ me emen ata irọrọ, nkeek ya ìre nkeek òkup me mbuban, mè ire irọriọọn̄ Awaji. Sa me ikeyi, Judas orọrọ esuuk me ibot ebi ìkwakwaan̄, inyi enyan̄a ema esibi me ijo kiban̄.