Judas Makabiyọs îtim ikpan̄ Lisias
(I Makab 4:26-35)
11
Inu yi irọrọ iraka, sọnja lek mgbọ, Lisias, ogwu òkibem ogwu ubọọn̄ mè ire si gwun̄ ogwu ulọk ogwu ubọọn̄ mè ogwu ibot mkpulu, onanaan̄ ejit enenen me lek inu ya òrọrọ. 2 Eya orọ, itititiin̄ obop ebi akọn̄ ukot ukot jeeta mè otutuuk urum akọn̄ inyọn̄ inyinya echi îkaan̄be, mè ijibi akọn̄ inu me lek ebi Ju. Nkeek kan̄ ìre inenisa Jeruselem irọ ama ebi Giris, 3 mè ifieek mkpukpe inyi ibe ekekpe me ibot Uwu Mbuban, kubọk îfieekbe me ibot àwa yọk me otutuuk ofifi ido geelek. Ofifi nkeek kan̄ ìre si ikekinyam irek òban Awaji me acha me acha. 4 Ìkasasa unye Awaji ìgwen inu geege, ire, otutuuk ejit kan̄ ìtoon̄ me lek akọp akọp obop ebi akọn̄ ukot ukot kan̄, mè obop obop ebi akọn̄ inyọn̄ inyinya kan̄, mè akọp eniin̄ jeeta kan̄ cha. 5 Lisias ojijibi akọn̄ inin̄ Judia, mè ije igbet Bet Suru, ama mgban okanabe, òsoso akọp ewuuk ije ita inan̄a me lek Jeruselem, mè inigwuun̄ ukot inye ikisisik ama ya.6 Mgbọ Judas Makabiyọs mè ebi kan̄ enọbe ibe ke Lisias îkpa mbin akọn̄ ikana ama mgban ya, ema mè otutuuk ene esasa ufieejit mè ito me chieen̄ ibeek Okumugwem ibe iria ata ogwu osat inu ininyan̄a ebi Ijeren. 7 Makabiyọs me lek kan̄ odasi iteen̄ nroon̄ akọn̄ kan̄, mè ibeek ebilọ ibe egọọk ọmọ efiin̄ ugwem kiban̄ esa etap ubọk enyi bọn ulọk kiban̄. Otutuuk kiban̄ esasa me ikpele ulọk igbaan̄ igbuku isibi. 8 Ema kpejọjọn̄ọ-nu ere me Jeruselem, ema emumun̄ ogwu òkọp inyinya ge òtatap ofọnti okuket okanabe isibi kubọk ogwu ibot akọn̄ kiban̄, mè ikaan̄ nroon̄ akọn̄ alata araran̄ òkimumumen. 9 Ema otutuuk ene egbagbaan̄ ikitọn̄ Awaji ogwu nsan, ejit kiban̄ onyenye, ema ebebem lek ichochon inu geelek igwook, mè ìre ebilene, mè ìre anam-unye geelek, mè ìre mgban okwukwut. 10 Ema ejeje me onineen̄ akọn̄ ijibi inin̄, ema melek ogwu akọn̄ emen inyọn̄ ya ònigbaan̄ itọbọ melek kiban̄, mije, Awaji îkaan̄ nsan me lek kiban̄. 11 Ema ewuwulu inin̄ lek ebi ochicha kubọk egbe àtat, mè ichon akọp mè obop ebi akọn̄ ukot ukot ge mè akọp mè efit ebi inyọn̄ inyinya gweregwen igwook, mè ililaba ebi ìsisik isan̄a me unye. 12 Owuwa me lek ebi ife cha esasa unan me lek ililiin̄ iyat, mè itọọn̄ nroon̄ akọn̄ kiban̄ ifiin̄. Lisias me lek kan̄ osasa ekot ekot ilibi inwọnọ kubọk ogwu ukpook owot.
Lisias îrọ esuuk melek ebi Ju
(I Makab 6:56-61)
13 Lisias ìkare ogwu ifuk-ibot onanbe. Îkeek inu òrọrọ inyi etim ekpan̄ ọmọ, mè iriọọn̄ ibe ke inu òrọrọ kpekọt itim akọn̄ ikpan̄ ebi Ju ìre mije Awaji ogwu unye otimbe akọn̄ inyi ema. Ineniria etip isi lek ebi Ju, 14 ibe ema enenen̄e inu geelek esun̄ ubọk înenbe, mè ichieek use ibe ke ọmọ môtumu ikọ melek ogwu ubọọn̄, mè itet ogwu ubọọn̄ inye, inyi inire unene melek ebi Ju. 15 Bak me lek ke ntọt ya môsa nnwọn inu inyi otutuuk ene, Makabiyọs ochechieek otutuuk inu Lisias obe enerọ, mije, ogwu ubọọn̄ îbọkọ inu geelek Makabiyọs ogebe me ikpa ijet Lisias ofolek ebi Ju itap.
Lisias îge ikpa ijet ebi Ju
16 Ikpa Lisias ogebe ijet ebi Ju ìre ikeyi:
“Emi Lisias nge ikpa keyi inyi enyi ebi Ju ikitọp enyi amọn.
17 “Jọn mè Abusolọm, ebi enyi eriabe osat, mînyi emi ikpa enyi egebe mè itap ubọk me emen, ibe ema esa ejet emi, mè ido ikọ òfo me lek inu egebe me emen ikpa ya. 18 Inu geelek ògbaan̄ me lek ogwu ubọọn̄, nrọ mè ogwu ubọọn̄ iriọọn̄. Îchieek si irọrọ eyi mêkọtbe irọ. 19 Ire enyi ikikaan̄ ata ejit enyi ekaan̄be me lek mkpulu ifo isi, ubọk geelek nkọtbe, mâmun̄ ibe ke ntap-ubọk irọ ibe inu inwọn me lek kinyi me mgbọ ònu me isi. 20 Nria ebi enyi eriabe ijet emi, melek ebi otuchieen̄ n̄a, ibe enegọọk enyi ekpa inu chi geelek eriọk me ntuun̄ me ntuun̄. 21 Kè inu ije ijaan̄ enyi me lek. Ege ikpa yi me akọp usen iba mè ini me emen onyan̄ Diosikorintiyọs, me acha efit mè akọp ini mè jeeta.”
Ogwu ubọọn̄ îge ikpa ijet Lisias
22 Ikpa eyi ogwu ubọọn̄ ire eyi:
“Emi ogwu ubọọn̄ Antiọkus nge ikpa keyi ikitọp owu Lisias ogwu ngwan̄ n̄a amọn.
23 “Mgbọ keyi, eyi nte kiji ofobe awaji, îlọk eji ibe ekasisaak ebi ìkup me irak mkpulu kiji, inyi ema gaalek ekpọ chieen̄ me lek mbubek kiban̄. 24 Eji mînọ ibe ke ebi Ju kpema ikekirọ orọmijọn̄ ebi Giris kubọk nte kiji otọbe, ire, ekiweek iluluk ubọk iluk-ugwem eyi kiban̄, mè ibe etele inyi ema ekerọ orọmijọn̄ echi kiban̄. 25 Ikeya orọ, mije mweekbe ibe ema ekup kubọk ebi ofifi ido ekupbe, mè ekayaka ìnyi ema saasaak, eji mîkana igwook, ibe etele Uwu Mbuban kiban̄ enyi ema, mè enan̄a lek kiban̄ eluk egọọk orọmijọn̄ ebi nte nte kiban̄. 26 Eya orọ, owu môlook etip ijet ema, mè irọ ema eriọọn̄ ibe ke eji ìre unene, inyi ema eriọọn̄ nkeek kiji, mè ejit kiban̄ inye isasa ubelejit ikikpọ chieen̄ me lek mbubek kiban̄.”
27 Ikpa eyi ogwu ubọọn̄ oriabe ijet ido ebi Ju ìre ikeyi:
“Emi ogwu ubọọn̄ Antiọkus ntọp enyi ebi oru ama ebi Ju mè ebi Ju kechilọ amọn. 28 Ire lek inye enyi, nkeek kiji ire eya. Lek eyi kiji înye si. 29 Menelọs îrọ eji eriọọn̄ ibe ke enyi ekiweek ifofon ido kinyi isi ikpọ chieen̄ me lek mbubek kinyi. 30 Eya orọ, otutuuk ebi kinyi ebi ìkaka ire ido kinyi sabum akọp usen ita me onyan̄ Jantikọs, mîkaan̄ use eyi irek unene melek kiji. Eji mînyi si ema unye òjot òjot irọrọ ike enyi ebeekbe. 31 Ebi Ju mêkọt ikirie inorie kiban̄, mè ikisun̄ Ikan kiban̄ kubọk îwuukbe lek ikup; kpunu ogwu kiban̄ geege ebenyi osusut me oniin̄ geege me lek inu erọbe me ekariọọn̄ge. 32 Ǹkiria Menelọs inu, inyi ejit kinyi isiki. 33 Ìriọọn̄ ubọk ìkup. Ege ikpa yi me akọp mè usen go, me onyan̄ Jantikọs, me acha efit mè akọp ini mè jeeta.”
Ebi Rom mîge ikpa ijet ebi Ju
34 Ebi Rom mîge si ikpa ijet ebi Ju. Ikpa kiban̄ ìre ikeyi:
“Kwintọs Memiọs melek Taitọs Maniọs, ebi otuchieen̄ ebi Rom, ege ikpa keyi inyi enyi ebi Ju, mè ikitọp enyi amọn. 35 Inu geelek Lisias, ngwan̄ ogwu ubọọn̄ ochieekbe inyi enyi, eji mîbọkọ itap. 36 Ire, òfo me lek inu cha echi Lisias obe ke ìkup me ubọk ogwu ubọọn̄, enyi isitọt inu ofolek isan̄a, ìria ene ge ugwat ugwat ìnu, inyi eji mênyi nkeek ògbegbe òfo me lek kinyi. Eji ebesi Antiọk mgbọ keyi. 37 Eya orọ, ikafiat mgbọ, ìria ebi ene ìnu, ebi mêkọtbe itumu nkeek kinyi inyi eji. 38 Ìriọọn̄ ubọk ìkup. Ege ikpa keyi me akọp mè usen go me onyan̄ Jantikọs, me acha efit mè akọp ini mè jeeta.”