4 Mgbọ ema erọbe inu cha isan̄a, ema erururọn̄ọ inyana ikana isi ichit me ijọn̄, mè ikibeek Okumugwem ibe ikayaka ìda ema ìtap me mbet lek ùrioon̄ keya. Ire, ire ema irọ ijo inu, isulu ema osusut ekem ekem, mè ikayaka ìkana ema ìtap me ubọk ebi ìkinye chieen̄ inyi ọmọ mè ido ebi nnaan̄ ìkup ikeya.

5 Usen egwọkbe lek Uwu Mbuban ìre akọp usen iba mè go me onyan̄a Kisilep, òrere chieen̄ usen mè onyan̄ yaage ebi ofifi ido cha efifilabe Uwu Mbuban ya.

6 Ema mîrie ijọk inwọọn̄ unwọọn̄ usen jeeta, kubọk ekirie ijọk Uwu Nlak, mè ikikeek ubọk ema ejijen̄ebe ikana inyọn̄ ogoon̄ mè emen nkororok kubọk anam oron, sọnja mgbọ òraraka, me ibot mgbọ ijọk Uwu Nlak ema eriebe sọn̄ usen inen òraraka. 7 Ema eneniteen̄ uti ekatbe mkpatat me lek, mè ujuja agọọk uti melek inwan̄ me lek, mè nlak asaak, ikaan̄ me ubọk isa ikikọt okwa itọn̄ ogwu òrọrọ inyi ekọt egwọk lek Uwu Mbuban kan̄.

8 Ema mîtap ikan me ibot otutuuk ido, mè ibene ubọk isa irọ ijot, ibe ke otutuuk ido ebi Ju mêkirie ijọk ya me otu ifuk usen ya acha geelek.

9 Ubọk mkpa kè Antiọkus ogwu egwenbe Epifanes ojebe ire eya.

10 Mgbọ keyi, eji mênikpa inu ofolek kè Antiọkus Yupatọ, gwun̄ kè Antiọkus Epifanes, ogwu ikariọọn̄ge Awaji ya, mè ichak otu mgbidim mgbidim me lek inu akọn̄ osabe inu.

11 Mgbọ Antiọkus Yupatọ yi onenebe ogboon̄, itoto ene ge ekigwen Lisias me ibot mkpulu, mè irọ si ọmọ ogwu òkikpulu ido Kole-Siria mè ido Fonisia.

12 Tolemi yi, ogwu ekigwen Makurọn, ore adasi ogwu mkpulu òrọrọ unen inu me lek ebi Ju, isasa ichit uchit nlilọ inu erọbe ema iraka. Ọmọ îkaan̄ mgbaan̄-nrọ eyi esuuk melek kiban̄. 13 Mije keyi, ebi ogbo Unene ogwu Ubọọn̄ esasa ọmọ isi ifiat me isi kè Yupatọ. Înọ ekigwen ọmọ ogwu ofiaan̄ me agan̄ geelek, mije, ke îtele ido Saipọrọs eyi Filometọ otapbe ọmọ me ubọk, mè ikana igọọk Antiọkus Epifanes. Ìkayaka ìkọt ìkaan̄ ulibi eyi irek ikwaan̄ kan̄ mônyi ọmọ, eya orọ, inwọnwọ ibọk ikpan̄ lek kan̄.

14 Mgbọ Gọgiyas onire ogwu ibot mkpulu me agan̄ Idumia, îsun̄ urum akọn̄ ebi ọkọ inyi lek kan̄, mè ikpọkpọ ikitim ebi Ju akọn̄ me lek. 15 Ìkarere eya gaalek, uwu mgban akọn̄ echi òkukup itat me isi akọn̄, ìkup me ubọk kiban̄. Ema ekekinyi ebi Ju saasaak, mè ikibọkọ ebi elapbe me Jeruselem itap, mè itet lek inye ikisa akọn̄ ya ifo isi.

16 Ire, mgbọ Judas Makabiyọs mè urum ebi akọn̄ kan̄ eriaakbe uriaak isan̄a, ikibeek Awaji ibe igọọk ema ikeke, ema ejijibi akọn̄ inin̄ lek uwu mgban akọn̄ ebi Idumia cha. 17 Ema mîgwuun̄ ukot inye ikitim akọn̄ ya, mè irieen̄ ebi ìkibem mgban cha ikpebe, mè ibọkọ uwu mgban akọn̄ cha, mè ikpaan̄ ebi geelek ema esoon̄be. Ebi ekpan̄be kpesiki igak akọp obop ene iba.

18 Usini ene elilibi isi ilileek me emen uwu mgban akọn̄ iba ònyenye enenen, etapbe nroon̄ akọn̄ iso lek, isasa ibieen̄ mbin akọn̄ geelek ikeke. Ife cha kpesiki me otu ifuk iraka obop ene onaan̄ge.

19 Makabiyọs otetele Saimọn melek Josefu, mè Jakiọs melek urum akọn̄ kan̄, urum akọn̄ òsoso isasa ikpa mbin ikana ebi ìkup me uwu mgban akọn̄ cha. Ọmọ me lek kan̄ onanan̄a isi ere ekiweek ọmọ ugwat ugwat.

20 Ire, usini ebi akọn̄ kè Saimọn, ebi ebek ikpoko, etetele ibe usini ebi ìkup me uwu mgban akọn̄ cha erie ema udun̄ me ubọk. Ema ebọkọ akọp mè obop ikpoko alata okuket iba, mè itele usini me lek ife cha egwọt esibi.

21 Mgbọ Judas Makabiyọs onọbe inu ya òrọrọ, igwegween̄ ebi isi akọn̄ ititiin̄, mè itoon̄ ebi ife cha ikọ ibe ke mînyam ebi ngwan̄ kiban̄ mije ikpoko, mè itele ibe ebi ochicha elibi enwọnọ, inyi mêkpọkbe inu initim ema akọn̄ me lek. 22 Ikpakpan̄ ebi ìsa ema inyam ewe cha, mè itim akọn̄ ibọkọ uwu mgban akọn̄ iba cha mgbọ yaage. 23 Ike ubọk kan̄ okireke me lek akọn̄ geelek îkitim, îkpan̄ iraka akọp obop ene iba me emen uwu mgban akọn̄ iba cha.

24 Timọti, ogwu ebi Ju ewuukbe lek itim ikpan̄ mgbọ òraraka, otititiin̄ urum akọn̄ ebi ọkọ ìwawa enenen, mè isa si owuwa ebi urum akọn̄ inyọn̄ inyinya inan̄a me agan̄ Esia igbaalek, mè itet isi itat me Judia ibosa akọn̄ inibọkọ me unye. 25 Mgbọ îkije igbet, Judas Makabiyọs mè ebi kan̄ egigigen̄e mfuun̄ igwook me ibot kiban̄, mè ifiaka ekwut ufieejit ikana ebon, isa ikibeek Awaji mbeek. 26 Ema erururọn̄ọ inyana ikana isi ikwuun̄ me inyọn̄ otitop isi ntook ngwugwa, mè ikibeek Awaji ibe igọọk ema ikeke, mè ikana ogwu ochicha inyi ebi ochicha kiban̄, mè ikana ogwu oriara inyi ebi oriara kiban̄ kubọk, Ikan otumube.

27 Mgbọ ema eriaakbe uriaak isan̄a, ema eteteen̄ nroon̄ akọn̄ kiban̄ ikaan̄, mè ijibi ije ije ijọn̄ọ ere ida ibọkọ me lek ama. Mgbọ ema ejebe igbet lek ebi ochicha, ema ekekeke. 28 Egwe òkitotoon̄ inu, akọn̄ obubumu me etete ema urum akọn̄ iba cha. Agan̄ ge osa unye kiban̄ melek utoon̄-ejit ema ekaan̄be me lek Okumugwem ibieen̄ ejit ibe ke ema mêtim ikpan̄, sà agan̄ keyilọ osa unye-ejit ema ekaan̄be ibieen̄ ejit ibe ke ema mêtim ikpan̄. 29 Mgbọ akọn̄ ya onyebe ichit, ebi ochicha cha emumun̄ ujuja ebirieen̄ go ìkup me inyọn̄ inyinya esabe mgbidim okwukwut alata araran̄ itobo ikwuk irieen̄ me otu, enan̄abe me emen inyọn̄ ikana isibi, mè inikije me isi akọn̄ ebi Ijeren. 30 Ife cha ekukup ikana Judas Makabiyọs okokop, mè isa nroon̄ akọn̄ eyi kiban̄ ikikwek ọmọ lek, kpechieek ibe unan geege ire lek kan̄. Ire, ema ekekisa oraan̄ mè ewuuk isinyọn̄ ikitọbọ igwook ichit ebi ochicha, mege, wọlọwọlọ oninin̄ etete kè ebiba, mè itap ema ǹnàan̄, welewele oninin̄ me etete kiban̄, esọsọp ema igwook nsebe nsebe. 31 Akọp obop ebi akọn̄ ukot ukot iba mè efit go, mè efit ebi akọn̄ inyọn̄ inyinya gweregwen ke ekpaan̄ me akọn̄ ya.

32 Timọti me lek kan̄ olilibi ifo ama mgban akọn̄ ge ekiriọọn̄ ubọk ibem, eyi ekigwen Gejara, ere Kayerias orebe ogwu ibot. 33 Judas Makabiyọs melek ebi kan̄ ebebele ejit enenen, mè ikpa mbin akọn̄ ikana ama mgban akọn̄ ya otuuk kè usen ini. 34 Ebi ìkup me emen uwu ya esasa ike ere ya onyebe itoon̄ ejit, mè ikitumu Awaji ifiat ikpak ikpak, mè ikitumu ikọ unyechieen̄ inyi ebi Ju.

35 Me mbat egwe òso usen go, akọp ene iba me etete ebi akọn̄ kè Makabiyọs enyenye ejit inene mgban ama ya, mè isa me ukan̄ ukan̄ unaan̄-ejit ya ifieek ene geelek òchichichini ema ito, mije itutumu Awaji ifiat ya obenebe ema ukan̄ ukan̄ unaan̄-ejit me emen. 36 Ebi ofifi ene ejeje ubọk yaage ito lek ikana me udun̄ ebi ìkibem ere ya, mè ichim ukan̄ itaak me lek uwu-oket cha, mè itap ukan̄ iwọp ebi ìtutumu Awaji ifiat cha me njijoon̄. Ofifi kiban̄ egbugbugbọ otunchit cha igwook inyi ebi akọn̄ ebi ìsisik enin̄ enu. Sa me ikeya, ema ebọbọkọ ema ya. 37 Me ike mgbọ ya, Timọti me emen udọn̄ mun̄ oletbe. Ire, ekpakpan̄ ọmọ, mè ikpan̄ si Kayerias ogwu ngwan̄, melek kè Apolofanes.

38 Mgbọ ema erọbe otutuuk inu chi isan̄a, ema ekekikọt okwa itọn̄ ikisa ibe Okumugwem usọ, ogwu òkakaan̄ ata ejit me lek ebi Ijeren, mè irọ inyi ema etim ekpan̄.