Iriọọn̄-inu osa ebi Ijeren ije itibi èwê
11
Iriọọn̄-inu îsa me ubọkogwu nriran òkup mbuban,
irọ inyi ubọk ikwaan̄ kiban̄ ije ijaan̄.
2 Ema mîje itibi emen èwê ere ebi ene ekalukge,
mè igwugwuun̄ uwu ọfọ
kiban̄ me ere ukot ene ìkajakge.
3 Ema mîkeke ida ebi ochicha kiban̄,
mè itim ikpan̄ ebi oriara kiban̄.
4 Îre owu ke ema egwen mgbọ ebek orakbe ema,
owu onyinyi ema mun̄
inan̄a me lek ewuuk ònyenye isi;
owu osa mun̄ ònan̄a me lek
ewuuk ònyenye isi isuuk urak-ebek kiban̄.
5 Sa me ikeya, inu esabe inyi
ebi ochicha kiban̄ osusut,
oneninin̄ oruru inyi ema
me emen ufialek kiban̄.
6 Owu osa ògbugbuk mun̄
okwaan̄ òkigbuk mgbọ geelek,
eyi òrere mun̄ òbububuku afuk, eje ofifilabe,
7 inyi ebi ochicha kiban̄,
mije ema esabe ikan ikpan̄ asasa nsabọn,
ire, mè ininyi ebi kwun̄ mudim
òjot òjot me ekakpọge chieen̄,
8 mè isa me ebek òrarak ema me mgbọ ya
ijeen̄ ubọk osulube ebi
ochicha kiban̄ osusut.
9 Owu òsa me ejit nsan igana ikọ inyi ema
me mgbọ otọbe ema ikpọ;
ema esasa me ikeya ikween̄
ubọk owu okisulu ebi
kperiọọn̄ Awaji osusut,
mgbọ owu okisa uyok
uyok unaan̄-ejit kwun̄ isibi
ebiba oyerebet me ibot.
10 Owu otọ ema ikpọ
kubọk ute okirọ isa ikitaba
bọn ubọk me utọn̄,
ire, owu òwọwọlọ ebi kperiọọn̄ Awaji ikpọ,
kubọk ogwu ubọọn̄
òkinye ejit itip ene oyerebet.
11 Ebi kperiọọn̄ Awaji mîbọkọ ikpele ujat,
mè ìre ekukup igbet,
mè ìre ekup me ujọn̄ọ ere.
12 Ufieejit ebi ekariọọn̄ge
Awaji cha îmin mgbọ iba;
ema mînunuun̄ mgbọ ema
ekikeek inu cha òrọrọ iraka.
13 Mije, mgbọ ema enọbe ibe
ke inu ya ònyinyi ema osusut,
ìyaka ininyi ebi ata irọrọ unwọọn̄,
ema erọriọọn̄ ibe ke îre Okumugwem orọ.
14 Mosis, ogwu ebi Ijipiti ejitbe,
mè iben itọp ifiin̄ me oyet mgbọ òjọjọn̄ọ,
Mosis ya ìyaka inikana inu
ukechieen̄ inyi ema,
me mgburudun̄,
mgbọ otutuuk inu orọbe iraka;
mgbọ ebek orakbe ema
me oniin̄ òsibi esese me lek
urak-ebek ebi ata irọrọ.
Awaji îsulu ebi ikpak osusut
15 Mije mbubut kiban̄
mè ejit ikpak kiban̄
osabe ema ilọ oniin̄,
inyi ema eketọbọ ebum enyi
ijijinu ikanọge lek
mè njijọ lek anam geelek,
owu osasa urum anam ikanọge lek
inisulu ema osusut,
16 inyi ema esa ekween̄ ibe
ke inu esabe irọ ijo inu
ore si inu ekisa isulu ene osusut.
17 Mije, ubọk kwun̄ òkakaan̄ unye geelek,
eyi òrom linyọn̄ isibi
me lek inu ìkakakaan̄ ubọk îkupbe,
ìkanan unye isasa iria ogbogbo urum ibo nriọk,
mè ìre egbe àtat òkirọ nnaan̄,
18 mè ìre ayaya isi ijo anam
orombe echi kperiọọn̄ lek-nu,
òkinaan̄ ejit uyok uyok,
mè ìre echi òkifuuk efuuk òkicho ukan̄ isibi,
mè ìre echi òkicho oduku isibi,
mè ìre echi ntat-ukan̄
okinyan isibi me chieen̄.
19 Ìkare ikpakpan̄ ene gaalek
ke anam chi obokọt irọ;
iyayaka chieen̄ itoon̄ me lek anam chi
môkọt irọ ibe ene ikwu mije ukpook.
20 San̄a echichi san̄a,
ire osa unen oyerebet igọọk ebilene,
efuuk ge kpọi ofuukbe,
ema mêrurọn̄ọ ikwaan̄ ita,
unye efuuk kwun̄ môben ema igba iyak.
Ire, owu òneneen̄ inu geelek isun̄,
ikpọ me orirom, mè otu ifuk, mè ulobo.
Awaji îkaan̄ unye mè ikaan̄ si ejit nsan
21 Ikpele unye kwun̄ òwa
mgbọ geelek oweekbe isasa irọ inu,
ekene obokọt ikeke ida
unye eyi ubọk kwun̄?
22 Me chieen̄ kwun̄,
otutuuk linyọn̄ ìsip kubọk mfuun̄
eyi kpokọtbe ijujuk
okwukwut itọ-inu ijaan̄,
mè ibet lek otu mbat ge
òrọrọn̄ọ me ijọn̄ me otu ewelegwe.
23 Ire, owu òkikakaan̄ nsan
me lek otutuuk ene,
mije, owu môkọt irọ inu geelek,
owu òkikpọkpọ chieen̄ ilọ
me lek ijo inu ebi ene erọbe,
inyi ema ekọt egwu ekom.
24 Mije, owu oma inu geelek òkukup,
òkajọ ejit me lek inu geege orombe,
mije, ire mokaan̄ inu eyi owu ochabe,
owu kpomorom inu keya.
25 Mọmọ ubọk inu môsabe ikup ibia,
mè ire ìkare nkeek kwun̄?
Mọmọ ubọk mêkọtbe isun̄ inu geege,
mè ire owu òkagwen inu ya ìsibi?
26 Jei Okumugwem,
owu ogwu òmama inu
geelek òkup me ugwem;
owu òtetele ibe ema otutuuk ekup,
mije, îre owu okaan̄ ema.