Iriọọn̄-inu Kè Solomọn 10

Ikwaan̄ iriọọn̄-inu bene me lek kè Adam re lek kè Mosis

Iriọọn̄-inu okput lek adasi

ute otutuuk ebi linyọn̄

ogwu Awaji orombe,

me mgbọ ọmọ gaalek

orebe ogwu erombe;

iriọọn̄-inu si onyan̄a ọmọ isibi

me emen nrọ-nlọ kan̄.

2 Iriọọn̄-inu onyi ọmọ unye

îsabe ikikpulu otutuuk inu geelek.

3 Ire, mgbọ Ken, ogwu ijo irọrọ,

osabe unaan̄-ejit ijit iriọọn̄-inu,

îchep lek kan̄,

mije îsabe me ikpele

unaan̄-ejit ikpan̄ ogwu ngwan̄.

4 Mgbọ mun̄ ile omeen̄be

linyọn̄ bak me lek kan̄,

iriọọn̄-inu okpọk inyan̄a linyọn̄ isibi;

ìsa okpọkọ uwot ikike

ikọp ogwu ata irọrọ ije.

5 Ofifi kan̄, mgbọ ebi ido geelek

egbaan̄be ichieek me lek inu ikpak,

wọlọwọlọ onin̄be,

îre iriọọn̄-inu otet chieen̄

me lek ogwu ata irọrọ,

mè isun̄ ọmọ itana me isi Awaji,

mè irọ ọmọ ikeke inye,

inyi ikato njijin ogwu gwun̄.

6 Îre iriọọn̄-inu onyan̄a ogwu

ata irọrọ isibi, mgbọ ebi ijo ekikwaan̄;

ọmọ olilibi inwọnọ ukan̄

òkirep itaka ebi ene ikpan̄ me Ibot Ama Go.

7 Inu òkijeen̄ inu ikpak kiban̄ cha

òwa si okupbe:

ijọn̄ òyayat ita òkpọkpọ ikibumu oduku,

mè uti òkito mfut echi ìkakiren̄e,

mè ewuuk uchi òkekeke

kubọk inu isasa ikeek ogwu

ikakaan̄ge ichechieek.

8 Bak me lek ema ekpọbe

iriọọn̄-inu chieen̄ isiki,

ema kpekọt iriọọn̄ ata inu.

Ìkare eya gaalek, ema mîtele si

inu ebi linyọn̄ ebekisa

ikeek mbubut kiban̄,

inyi ijo inu ema erọbe

ikalọ ene chieen̄ mgbọ geege.

9 Iriọọn̄-inu înyan̄a ebi ìkirọ

ikwaan̄ inyi ọmọ isibi me ufialek.

10 Mgbọ ogwu ata irọrọ

olibibe inan̄a me lek unaan̄-ejit ogwu ngwan̄,

iriọọn̄-inu osa ọmọ ije me oniin̄ òtatat;

îjeen̄ ọmọ mkpulu eyi Awaji,

mè irọ ọmọ iriọọn̄ inu òkup mbuban;

îrọ ubọk ikwaan̄ kan̄ isibi oruru,

mè irọ ibe kwulukwulu kan̄ ito mfut òwawa.

11 Mgbọ ebi ìkitutuku ọmọ

ebenitet ọmọ inu kan̄ ibọkọ,

iriọọn̄-inu okekeke inyi ọmọ,

mè itap ọmọ ubọọn̄.

12 Îbem ọmọ me lek ebi ochicha kan̄,

mè inyan̄a ọmọ isibi

me ufe etipbe ikikpọ ọmọ;

mgbọ etim onyebe,

irọrọ inyi ọmọ itim ikpan̄,

inyi ọmọ isa iriọọn̄ ibe

ke irọriọọn̄ Awaji

îkaan̄ unye igak otutuuk inu geelek.

13 Mgbọ etetbe ogwu ata irọrọ inyam,

iriọọn̄-inu ìkafiin̄ ọmọ ìtele,

ire, înyan̄a ọmọ, inyi ọmọ ikarọ ijo inu.

Ìgọgọọk ọmọ inin̄ uwu mkpọn me emen ijọn̄,

14 me emen uwu mkpọn,

ìkanan̄a ìtele ọmọ,

înyi ọmọ okuba ubọọn̄, inyi ọmọ ikpulu ido,

mè unye irere ogwu ibot

inyi ebi nte uwu kan̄.

Îjeen̄ ibe ke ebi ìtutumu ikọ itoon̄ ọmọ

ìre ebi ataak,

mè inyi ọmọ umin

eyi òkukup ire mgbọ geelek.

Iriọọn̄-inu osa ebi Ijeren isibi me Ijipiti

15 Ife ìkup me mbuban

mè owot iman kperọ inu geege ilọ,

iriọọn̄-inu îtaba ema isibi

me ido ebi ìkitutuku ema.

16 Iriọọn̄-inu ìninin̄ me emen

ogwu ikwaan̄ Okumugwem ge,

mè isa uyeke uyeke inu ijejeen̄

ikeke ida ebi ubọọn̄

ebi ekitetet ukpook me lek.

17 Iriọọn̄-inu înyi ebi ìkup mbuban

mkpukpe ikwaan̄ kiban̄;

mè isa ema ije me oniin̄

òkup mgbugbo mgbugbo;

mè ikana okwukwek inyi ema me ikarek,

mè ikitoon̄ kubọk

ntoronyan̄ me eririeen̄.

18 Îsa ema isaba okwaan̄ Anyiaan̄,

mè isa ema ije isaba mun̄ ògwugwuuk.

19 Ire, îrọ ibe ebi ochicha kiban̄

enwọ mun̄ ekwaan̄,

mè itọọn̄ ema me ejit irem

isibi igwook me otu ijọn̄.

20 Eya orọ, ebi ata irọrọ

efufum ebi kperiọọn̄ Awaji;

jei Okumugwem, ema mîkọt

okwa itọn̄ erieen̄ mbuban kwun̄,

mè isa me ida ge igbaan̄ itọn̄

ubọk kwun̄ ya òbebem ema.

21 Mije, iriọọn̄-inu îchili otu ebi mbuuk,

mè irọ asa nsabọn esa otu alọm kiban̄ etumu ikọ.