Uriaak Solomọn osabe ibeek iriọọn̄-inu
9
“Jei Awaji ebi nte nte kiji,Okumugwem ogwu nsan,
owu ogwu òsa ikọ kwun̄
irom otutuuk inu,
2 mè isa me iriọọn̄-inu kwun̄ irom ebilene,
ibe ire ogwu ibot inyi inu cha owu orombe,
3 mè isa me ata irọrọ
mè ikukup me mbuban ikpulu linyọn̄,
mè isa me ejit òtatana ikisibi oyerebet,
4 soso, nyi emi iriọọn̄-inu ya
òkup me agba lek ogboon̄ ubọọn̄ kwun̄,
mè kafuk emi ìsan̄a
me otu ifuk nsabọn kwun̄.
5 Mije, emi ìre gwun̄ ikwaan̄ kwun̄,
gwun̄ enerieen̄ ogwu enenwaan̄
òkisi ikwaan̄ inyi owu omanbe;
emi ǹkanye lek, m̀kabafufuk si ugwem;
sọntiik ngobo-ntet gaalek
ke nkaan̄ òfo me lek oyerebet mè ikan.
6 Mije, ikerere ogwu
ònwọnwọn isan̄a me etete bọn ebilene,
ebemọnọ ibe ìkakup me lek inu geege,
ire ìkakaan̄ iriọọn̄-inu
ònan̄a me ubọk kwun̄.
7 Owu ogobo emi ibe emi
ǹnenre ogwu ubọọn̄ ǹnyi ebi kwun̄,
mè ǹnenre ogwu òkisibi oyerebet
ǹnyi bọn kwun̄ ebirieen̄ mè ebibaan̄.
8 Owu onyi emi ida
ibe emi ǹnama Uwu Mbuban
me inyọn̄ ogoon̄ mbuban kwun̄,
mè ǹnama ntook me ama ere owu okiluk,
mbet lek Akpatan̄ Mbuban ya
eyi owu orọbe isun̄ bene me ibebene.
9 Iriọọn̄-inu ìkup melek kwun̄,
ọmọ oriọọn̄ ikwaan̄ kwun̄,
mè ikup mgbọ orombe linyọn̄;
îriọọn̄ inu òkijaan̄ owu me chieen̄,
mè eyi òtatat me lek ikan kwun̄.
10 Ria iriọọn̄-inu me emen inyọn̄,
ere mbuban, sibi na,
mè ria ọmọ nan̄a me ogboon̄
ubọọn̄ ujamgbugbo kwun̄ na,
inyi inikup me agba lek n̄a irọ ikwaan̄,
ufuna emi ǹriọọn̄ inu òkineme owu.
11 Mije, ọmọ îriọọn̄ inu geelek,
mè ikigobo inu geelek itet,
môsa emi ikije me iriọọn̄ inu
me emen inu geelek mbarọ,
mè isa mgbugbo kan̄ ikibem emi.
12 Owu mônenikibọkọ ikwaan̄ geelek nrọbe itap,
emi mânenikikpulu ebi eyi kwun̄ inen,
mè igbe ikukup me inyọn̄
ogboon̄ ubọọn̄ kè nte n̄a.
13 Ekene obokọt iriọọn̄ inu Awaji okitọt?
Sà ìre ekene obokọt iriọọn̄
nkeek Okumugwem?
14 Inu ogwu ebilene okikeek
ìkakup me lek inu geege,
inu eji ebenbe me ejit ìkakikeke.
15 Mije, akpalek òbojọjọ
ìkikekeme ibot ejit isiki;
uwu ibat keyi ìkisa ulobo akpan
ikeme ekiket ejit ene.
16 Ìkiyọyọt enenen
ikọkọt ikeek inu òkup me linyọn̄ itet,
irọriọọn̄ inu òkup iriaak eji me lek
ìre kwulukwulu;
ire, ìre ekene obokọt igobo inu
òkup emen inyọn̄ itet?
17 Ekene okọt iriọọn̄ nkeek kwun̄,
ire owu òkanyi iriọọn̄-inu,
mè ìria Ekwukwu Mbuban
kwun̄ me inyọn̄ ìjet ene?
18 Ikeya ke osa inen̄e oniin̄
ebi ìkup me linyọn̄ itat,
enenijeen̄ ebilene inu òkineme owu,
esasa iriọọn̄-inu inyan̄a ema.”