8
Unye kan̄ ìnan̄a me òtalinyọn̄ agan̄ ge ire ofifi agan̄,
ọmọ okekisun̄ inu geelek ijaan̄ me onineen̄.
Solomọn îma iriọọn̄-inu
2 Mma iriọọn̄-inu,
mè ikisaan̄ ikana iweek ọmọ
akarake ijija n̄a;
ntumu ifieek ibe ke
mâkaan̄ ọmọ kubọk nwa,
uja kan̄ îneme emi enenen.
3 Îluk melek Awaji,
mè isa me ikeya ikaan̄
umin kubọk ogwu òsibi me uwu ubọọn̄,
Ogwukaan̄ Inu Geelek omama ọmọ.
4 Ọmọ îriọọn̄ udọk udọk inu eyi Awaji,
mè ikigọọk Awaji igbaan̄ ikwaan̄ irọ.
5 Ire inu ubọọn̄ ire inu-nkaan̄
òkilọk ene me linyọn̄ keyi,
mọmọ inu ubọọn̄ ògagak iriọọn̄-inu,
òrere ogwu òkirọ inu geelek?
6 Melek si, ire ifuk-ibot ikisi ikwaan̄,
mọmọ ogwu òmimin igak iriọọn̄-inu,
ogwu òsisisọkọ inu geelek?
7 Ire oma ata irọrọ,
ata irọrọ ìre mfut
ubọk ikwaan̄ iriọọn̄-inu,
mije, ọmọ okijeen̄ ene itetet lek ikaan̄,
mè irọriọọn̄ lek,
melek unen oyerebet, mè itetet ejit inye;
kpunu inu geege me ugwem
òkakaan̄ oruru inyi ebilene ìgak echichi.
8 Ire oweek ibe chieen̄ kwun̄ igwuku iwele,
iriọọn̄-inu îriọọn̄ oka oka inu òraraka,
mè ìkimun̄ inu òkinunu me isi;
ọmọ okibum ibot nke nke usem,
mè ikibak ibot urọk;
ọmọ okidasi iriọọn̄ inu ijejeen̄
mè uyeke inu Awaji oborọ,
mè ikiriọọn̄ inu òborọ
me mgbọ mè ibot mgbọ geelek.
Iriọọn̄-inu îkup me uyọt me lek ebi ibot mkpulu
9 Eya orọ, mbebe ke mâsa iriọọn̄-inu ifo,
inyi isi igọọk emi iluk,
mije nriọọn̄be ibe ke ọmọ
môkinyi emi ata nteme
mgbọ inu okije ijaan̄,
mè ikinyi emi ukarajit
me mgbọ saasaak mè ufieejit.
10 Mâsa me lek kan̄ ikaan̄ umin
me ere geelek ebi ene etitiin̄be,
mè ikaan̄ si ulibi me isi ebi ugane,
ubọk geelek nrebe ijija.
11 Mêmun̄ ibe ke chieen̄ n̄a
ìkirere ijọn̄ me irek oyerebet,
mêkekitọn̄ emi me isi ebi ibot mkpulu.
12 Mgbọ nsiriaan̄ ere,
mêkup ikikpọ ibe ǹsan̄a amọn,
nsitumu ikọ, mêsiki utọn̄ igban̄;
ire ntumu ikọ ijọn̄ọ mgbọ enenen,
ema mêkaba utọn̄ ikigban̄.
13 Mije iriọọn̄-inu, emi ǹkabakwu,
mâtele inu ebi ìbegọọk emi me udun̄
ebekisa ikeek emi ire mgbọ geelek.
14 Emi mâkpulu ebi ene,
ido geelek mêkup me irak n̄a;
15 ebi mkpulu ìkikpulu ene
ikpak ikpak isinọ erieen̄ n̄a,
mêfieek owot;
mâjeen̄ ebi n̄a ibe ke emi mâkọt ikpulu,
ke emi nnye lek si me akọn̄.
16 Nsifo uwu, mâtap efuuk melek iriọọn̄-inu,
mije, kpunu ujat geege me
lek igọgọọk ọmọ igbaan̄ ikup;
iluluk ugwem melek kan̄, ufiak ìkakikup,
unwọọn̄ mè ubelejit gaalek okikup.
17 Nsikikeek inu chi me emen n̄a,
mè ikiwọlọ ema ikpọ me ejit n̄a,
ibe ke igọgọọk iriọọn̄-inu irọ ngwan̄
môrọ ene ikakwu;
18 igọgọọk ọmọ itet unene
môrọ ejit ene isiki,
ikwaan̄ îkisi môtap ene ikpele ubọọn̄,
igọgọọk ọmọ igbaan̄ ije mônyi ene ngobo-ntet,
ikpakpa ukpatu melek kan̄
môrọ ene itaan̄ etip.
Eya orọ, ǹkakana ere ikiweek
ubọk mâsabe ọmọ irọ eyi n̄a.
19 Mgbọ nrebe sọn̄ gwun̄,
emi ìre gwun̄ òriọọn̄ lek,
mînyi emi uche eyi ata ekwukwu;
20 usini mgbọ, môre ubọk nrebe ata ene
ke nnin̄ emen akpalek ikafiatge.
21 Ire, nriọọn̄ ibe ke
m̀kpakaan̄ iriọọn̄-inu
îtata Awaji ìnyinyi emi;
ke irọriọọn̄ ogwu òkinyi uche ya
ìre iman̄ ogwu òkaan̄ ngobo-ntet.
Ikeya ke nnisi lek Okumugwem,
mè ibeek ọmọ,
mè isa otutuuk ejit n̄a itumu ibe: