Ogwu ubọọn̄ ìre ìkike melek otutuuk ebilene
7
Emi si ìre ebilene kubọk ene geelek orebe,gwun̄ owot iman adasi ene
esabe achiaan̄ irom;
me emen owot uga
ke ebot emi ikana anam akpalek;
2 otuuk kè akọp onyan̄
ke nkup emen eje kan̄ ikiruruku,
inan̄a me lek uyọ eyi enerieen̄
mè utop eyi olom mè nwa.
3 Mgbọ emanbe emi,
mbebene ikifuuk efet
otutuuk ene ekifuuk,
mè irọn̄ si me achiaan̄ yaage
ere ene geelek orọn̄be;
adasi amọn nsan̄abe ìre ito,
kubọk otutuuk ene etobe.
4 Esa ekwut ekisa ikat nsabọn ikat emi,
mè ikpukpo emi isibi me imumechieen̄;
5 mije, kpunu ogwu ubọọn̄ geege
òjeje esese ubọk isibi inyọn̄.
6 Oniin̄ ge kpọi okup
inyi ene geelek isisibi inyọn̄,
oniin̄ ge si okup inyi itetele inyọn̄.
Solomọn îkaan̄ ulibi inyi iriọọn̄-inu
7 Eya orọ, nrariaak uriaak,
Awaji onyinyi emi ngobo-ntet,
ngwegwen Awaji,
inyinyi emi ekwukwu iriọọn̄-inu.
8 Ọmọ îmin me lek n̄a igak okuba
mè ogboon̄ ubọọn̄,
ibọbọọn̄ ubọọn̄ ìkasoon̄ inu mbasa itọ me lek.
9 Ǹkafufuk ewuuk unye otu ewe geege
ibe ìre ogbo me lek kan̄,
mije, otutuuk alata araran̄
ìre achiaan̄ ikike,
ire isa itọ me lek kan̄;
alata okuket ìre ibat ikike,
ire isa itọ me lek kan̄.
10 Mma ọmọ igak ikakaan̄ ata lek
mè ijajaan̄ uja;
ọmọ otat emi me lek ikakaan̄ igak utoon̄,
mije, utoon̄ kan̄ ìkakita.
11 Otutuuk ata inu geelek
ìje melek kan̄ inire emi lek;
inu ubọọn̄ ikakaan̄ge otu ifuk
ìkup me ubọk kan̄.
12 Nkaan̄ ubelejit me lek kiban̄ otutuuk,
mije, iriọọn̄-inu okisa ema ije;
ire, ǹkariọọn̄ ibe ke ọmọ ore nga kiban̄,
ogwu ema enan̄abe me lek isibi.
13 Ǹkasa ifiọk ìkween̄, ǹkasa nuunuun̄ ìjeen̄,
ǹkalelet si inu ubọọn̄ òkup me emen kan̄.
14 Isa inyi ebilene,
ọmọ ìre uwu isun̄-inu
eyi inu ìkakita me emen;
ebi ìkakaan̄ ọmọ
ekire unene melek Awaji;
inu ema ekween̄be inan̄a me lek kan̄
ke ekisa itọn̄ ema.
15 Kè Awaji ichieek ibe emi ǹtumu ikọ
ǹgọọk me nkeek kan̄,
mè ǹkaan̄ ekiket ògbegbe
inu îchebe inyi emi,
mije, ọmọ me lek kan̄ okisa
iriọọn̄-inu ijeen̄ oniin̄,
mè ikinyi ebi ìriọọn̄ inu nteme.
16 Me atikọ, eji melek ikọ kiji
ekup me ubọk kan̄;
ikeya si, otutuuk ngobo-ntet
mè usọ ikwaan̄ ìkup me ubọk kan̄.
17 Îre ọmọ onyi emi ata iriọọn̄-inu
ofolek otutuuk inu geelek òkukup,
mè ijeen̄ emi ubọk enamabe linyọn̄,
mè ubọk inu kan̄ geelek okupbe,
18 mè ijeen̄ ubọk mgbọ obenebe,
mè òta kan̄, mè etete kan̄,
mè ubọk ura okinwunween̄ ije kan̄,
mè ubọk ibot mgbọ ge okigọọk ge,
19 mè ubọk ibot mgbọ okiben ikana me acha,
mè ubọk urum ebi kè
ntoronyan̄ okupbe.
20 Îjeen̄ si emi ubọk ebi kè anam ekupbe,
mè eru ebi kè anam oron,
mè unye ebi erumun̄,
mè ekiket ebilene,
mè kpa chieen̄ kpa chieen̄ uti,
mè ugwun̄ òkup me lek ugwun̄ ijọn̄ kiban̄.
21 Nneniriọọn̄ otutuuk inu òkup nlelet,
mè echi ikaletge,
22 mije, iriọọn̄-inu,
ogwu òrorom inu geelek,
ojeen̄ emi inu.
Ubọk iriọọn̄-inu okupbe
Me emen kan̄, îkaan̄ ekwukwu eyi òrọriọọn̄ inu,
mè ikup me mbuban,
mè ikup ọkpọkpọ, mè iwa,
mè iyọt irọriọọn̄,
eyi òkijijen̄e ikana, mè itana,
inu geege ìkagwugwa me lek,
ìkup esese, kpekitim ikpan̄,
ìkima inu ònwọnwọn,
eyi òkikaan̄ ikpele ulọk,
kpekikọt ikeke ida;
23 îkaan̄ ata ejit, mè ikima ebilene,
ìkekeke inye, mè igbe ibieen̄-lek,
ìkakaan̄ saasaak,
îkaan̄ unye geelek,
ìkimọmọọn̄ inu ikana iso,
ìkijeje itibi emen ekwukwu
geelek òrọriọọn̄ inu,
ìkakaan̄ okpa geege me emen,
îyọt ikọkọt iweek iriọọn̄.
24 Mije, iriọọn̄-inu îfet ukot ije
igak otutuuk inu geelek òkije ije;
bak me lek ikakaan̄ge okpa geege me emen,
îso emen inu geelek,
mè ikigwọt itibi inu geelek.
25 Iriọọn̄-inu ìre unye eyi
Awaji ofuukbe ito,
eyi ònan̄a me lek ata
ujamgbugbo Ogwukaan̄ Inyọn̄ mè Ijọn̄.
Eya orọ, kpunu inu geege ikatanage
eyi òbokọt iraka inin̄ emen kan̄.
26 Iriọọn̄-inu ìre ogugo eyi utoon̄
òkitoon̄ ire mgbọ geelek,
eyi òkijeen̄ ubọk ikwaan̄ Awaji
me oniin̄ kpunube okpa geege me lek,
mè ire si ogugo òkijeen̄ nnwọn Awaji.
27 Ubọk geelek iriọọn̄-inu orebe ge kpọi,
môkọt irọ otutuuk inu geelek;
ubọk geelek ọmọ me lek kan̄ ìkakinwenwene,
ìkinwenwene inu geelek ikana ayaya.
Me ukot geelek, ìkiraraka inin̄
emen ibot ejit òkup mbuban,
mè òkorọ ema ekana unene melek Awaji
mè ebi nriran;
28 mije, Awaji ìkama inu geege ìbet lek
ogwu òkiluk melek iriọọn̄-inu.
29 Ọmọ ojaan̄ uja igak ura,
mè itoon̄ igak otutuuk ntoronyan̄;
isa itọ me lek utoon̄, ọmọ ogak,
30 mije, utoon̄ ìkinyi eririeen̄ irek,
ire, ijo inu ìkakinye lek ìgak iriọọn̄-inu.