Îgbe ibe ebi ubọọn̄ eweek iriọọn̄-inu
6
Enyi ebi ubọọn̄, ìgban̄, mè ìgobo ìtet;enyi ebi ìkikpulu linyọn̄, ìkween̄ inu.
2 Enyi ebi ìkikpulu urum ebi ene,
ìgban̄ utọn̄,
enyi ebi ìkisa owuwa ido
òkup me irak kinyi igugo lek.
3 Îre Okumugwem onyi enyi
unye ekisa ikpulu ene,
Ogwu Òbebene Ichit oto enyi me ibot mkpulu;
ọmọ oboweek ikwaan̄ enyi erọbe isibi,
mè iwọlọ emen inu enyi edọmọbe.
4 Enyi kubọk ebi otuchieen̄ me mkpulu kan̄,
enyi kpekpulu ijaan̄,
enyi kpesun̄ ikan,
enyi kperọ inu kubọk Awaji oweekbe.
5 Eya orọ, ọmọ môsulu enyi
ikpele osusut gidim,
me ekakpọge chieen̄,
mije, oyerebet ebi ìkup me irek ile ìkinyenye.
6 Mije mêkọt isa me ejit nsan
itele ijo inyi ebi irek kiban̄ osikibe ichit,
ire, ebi ìmimiin̄ mêbọkọ osusut òmimiin̄.
7 Mije, Ogwukaan̄ Inu Geelek
ìkaboran me isi ene geege,
ìkabofieek owot me lek umin ene geege;
bak me lek, îre ọmọ me lek kan̄
orom ogwu sọntiik mè ogwu ilile,
mè ikikpọ otutuuk ene
chieen̄ me lek ìkike.
8 Ire, ebi geelek ìrere ebi ilile,
ìbowọwọlọ emen ikọ kiban̄ itibi.
9 Îre enyi ebi ubọọn̄ ìkikpulu
ke nkitumu ikọ n̄a ikpọ isi,
inyi enyi ekween̄ iriọọn̄-inu,
mè ekakirọ inu ìlọ.
10 Mije, ebi ìsun̄ inu mbuban me mbuban
mêkup me mbuban;
ebi ìsasa inu chi ikween̄ inu
mêkaan̄ inu ema mêsabe ikput lek.
11 Eya orọ, kaan̄ ulọk me lek ikọ n̄a,
week ikọ n̄a, ke owu môsa ikween̄ inu.
Inu iriọọn̄-inu orebe
12 Iriọọn̄-inu ìkitotoon̄, ìkakigwọk;
ebi ìmama ọmọ ekigwat
lek iriọọn̄ ọmọ lek,
ebi ìweweek ọmọ ekimun̄ ọmọ.
13 Ọmọ ìkigwagwat lek isasa lek kan̄ ijeen̄
ebi ìmama ọmọ.
14 Ogwu ògwagwat lek inan̄a
ikeke ewelegwe ewelegwe iweek ọmọ,
ìkpomun̄ ufialek iweweek ọmọ imun̄;
mije, mômun̄ ọmọ osikibe
ikweek irek me otunchit.
15 Igwugwuun̄ ekiket me lek kan̄
ìkirọ ene ekaan̄ òjot òjot ngobo-ntet;
ogwu ògwọgwọk chieen̄ iweek ọmọ
ìkpoyaka ikaan̄ wọlọwọlọ ekiket.
16 Mije, ọmọ ìkijeje ikana
ikiweek ebi ìgbegbe ikakaan̄ ọmọ,
mè osa me ata ejit
òkosa lek kan̄ òjeen̄ ema ike ema ekije;
mè ochichini ema me emen
ekiket kiban̄ geelek.
17 Iriọọn̄-inu ìkibene me lek
ikakaan̄ ata ulọk ikwekween̄ inu,
ulọk ikwekween̄ inu ìre imama iriọọn̄-inu.
18 Imama iriọọn̄-inu ìre isusun̄ ikan kan̄,
ulọk ikan kan̄ ìre
ikpọchieen̄ ibe ke ene ìkpokwu mkpa.
19 Ikpọkpọ chieen̄ ibe ene ìkpokwu mkpa
ìkitaba ene igbet lek Awaji.
20 Eya orọ, ikakaan̄ ulọk iriọọn̄-inu
môrọ ibe ene ikpulu ido.
21 Eya orọ, enyi ebi ubọọn̄ ìkikpulu ido,
ire enyi ima ogboon̄ ubọọn̄ mè okuba,
ìkaan̄ ulibi ìnyi iriọọn̄-inu,
ufuna enyi ekekpulu ere mgbọ geelek.
22 Mânitumu inu iriọọn̄-inu orebe
mè ubọk îjebe isibi inyi enyi,
m̀kpalet enyi nlelet inu
geege òfo me lek iriọọn̄-inu.
Mâtumu ubọk îjebe bene me
ibebene mgbọ erombe linyọn̄,
mè ichili inu ofolek
irọriọọn̄ ọmọ ibook,
m̀kpabakọọn̄ iraka me lek atikọ.
23 M̀kpasasa si ejit mba
ichichit ifuk-ibot eyi
akpalek n̄a itet inu geege ikaan̄,
mije, ejit mba melek iriọọn̄-inu
kpekigbaan̄ ije.
24 Ebi ìriọọn̄ inu isiwa,
unyan̄a îra ikikup me linyọn̄;
ogwu ubọọn̄ isikaan̄ ifuk-ibot,
utelelek îra ikup inyi ebi ene.
25 Eya orọ, ìsa ikọ n̄a ìkween̄ inu,
ke enyi mêkaan̄ oruru me lek.