5
Ogwu ata irọrọ mônenikeke,ejit kan̄ ìbonyenye gboi,
me isi ebi ìtututuku ọmọ ya,
mè ebi kpesa ukwook kan̄ igwen inu geege.
2 Ebi ijo ife cha isimun̄ ọmọ,
uga ukpook môtetet ema, mêkekiran;
ubọk Awaji onyan̄abe ọmọ me
ekakpọkpọge chieen̄
môkeke ema chieen̄.
3 Ema mênenikitumu ikọ inyi
lek kiban̄ ge ge me ubọnọlek,
mè ufieejit, mè itoto mfi, mè ikibe:
4 “Ene ya eji ekichak me mgbọ ya ire eyi,
ogwu eji ekisa ikichak
imọm ya ire eyi,
eji mîbubut onọ!
Eji ekikeek ibe ke ìluk ugwem ebi iraak,
ke mkpa kan̄ ìkakaan̄ umin.
5 Keke orọ efukbe ọmọ itap
me lek bọn Awaji?
Keke orọ îkaan̄be irek
me etete ebi eyi Awaji?
6 Berebet, eji ere ebi ìjeje ilọ oniin̄ eyi atikọ,
utoon̄ eyi ata irọrọ
ìkagwook eji me lek,
ura ìkabum ìre eji lek.
7 Oniin̄ ifafiat ikan
mè jakajaka geelek, eji mîje iso,
mè ije isaba emen èwê
ere kpukpunube oniin̄;
ire, oniin̄ eyi Okumugwem,
eji kperọriọọn̄.
8 Mọmọ oruru ugumulek onin̄be inyi eji?
Mọmọ nnwọn eyi inu
ubọọn̄ eji esabe ikigugo lek orọbe eji?
9 “Otutuuk kecha îniniin̄ ita kubọk ogugo,
mè iraka isan̄a kubọk okput.
10 Ìbet lek uji ile òkije itibi me emen ekoon̄,
isiraka isan̄a, kpeyaka
ikimun̄ akpat îjebe;
kpekimumun̄ si akpat ere
okwut kan̄ odutbe iraka me emen ekoon̄.
11 Ìbet lek si unọn òkiwulu ije me emen efet,
kpunu inu òbojeen̄ ibe ke îwulu iraka,
ìkisa uwop kan̄ isulu efet eyi ikakaan̄ge ulobo,
mè ikibum itibi efet
ike îkiwulu ugwat ugwat iraka,
mè ikiwele uwop isaak ikikọp
lek kan̄ ije inyi isi;
me mgburudun̄ kan̄, kpunu inu
òkijeen̄ ibe ke îje iraka me ere ya.
12 Ìkup si kubọk oraan̄ esabe isook inu,
akpat îbumbe itibi efet
ogwagwat lek ininiin̄ ichit,
ene geege ìkakikọt ìriọọn̄
akpat ere îjebe iraka.
13 Ikeya si ke îkup inyi eji,
isimaman eji isan̄a, eji kpeyaka ikikup;
eji kpekakaan̄ iman̄ ata irọrọ
geege eyi ebesa iriọọn̄ ibe
ke eji mînu linyọn̄;
ire, eji ekitak ita me emen inu
ikpak eji ekirọ.”
14 Ikpọchieen̄ ebi kperiọọn̄
Awaji ìkup kubọk mfuun̄
efet okiben iwut ije,
mè ikup kubọk senesene mun̄
ewuuk eyi efet egwijo okiben iwut ije,
mè ikup si kubọk ogwu ichen
òkup egwe ge gaalek,
mè ifo, kpeyaka ikikeek.
Mkpukpe ebi ata irọrọ
15 Ebi ata irọrọ ekiluk ugwem ire mgbọ geelek,
mkpukpe kiban̄ ìkup me
ubọk Okumugwem;
Ogwu Òbebene Ichit
okikpọ ema chieen̄ me lek.
16 Eya orọ, ema mêbọkọ
okpibot ubọọn̄ eyi umin,
mè ọgbọn ubọọn̄ òjajaan̄
me ubọk Okumugwem;
mije, môsa ubọk agan̄ ulom kan̄ ikana ichit ema,
mè isa ubọk kan̄ ikwek ema lek.
17 Ulọk îkaan̄be ititim ikpan̄
ore nroon̄ akọn̄ kan̄;
mônyi inu geelek îrombe nroon̄
akọn̄ esa ebieen̄ ebi ochicha ekpebe.
18 Môben ata irọrọ ijeen̄ me
lek isa irọ ukwek-ejit,
mè itap atalek unen oyerebet
isa irọ okpibot akọn̄;
19 mômọnọ ikukup me
mbuban isa irọ agbọ
eyi kpebetim ikpan̄;
20 môwat uga uyok uyok
unaan̄-ejit kan̄ ireke isa irọ oge akọn̄;
otutuuk inu îrombe mêjibi
igọọk ọmọ itim akọn̄ me
lek ikpak ikpak ebi ochicha kan̄.
21 Mgbọlọ omumen inyọn̄
môrọn̄ itat me lek inu
eriabe ibe itoon̄ me lek;
ìbonan̄a me emen oduku inyọn̄
iwulu inu me lek inu eriabe ibe itoon̄,
kubọk ogbaan̄ etababe ikeke itat;
22 ibot mgbọlọ môkekirep
unaan̄-ejit unaan̄-ejit kubọk ekisosook;
mun̄ okwaan̄ môkekiben
unaan̄-ejit igọọk ema,
okolo môkekimeen̄ ema,
ìkpokaan̄ nsan.
23 Unye efet môwut ibieen̄ ema,
mè igen̄ ema iben ije kubọk mfufe.
Linyọn̄ môchep bak me lek ekasun̄ge ikan,
ogboon̄ ubọọn̄ ebi mkpulu
môfaan̄ igwook bak me lek ijo irọrọ.