4
Înwọn ibe ene ikakaan̄ bọn,mè ire ene ya ikirọ ata irọrọ;
mije, ikekeek ata irọrọ ene
orọbe ìre isusun̄ ene ya me
ugwem kubọk ke ìkakwu;
bak me lek, Awaji îriọọn̄ ata
irọrọ ene ya orọbe,
ebilene si mîriọọn̄.
2 Ata irọrọ isikup, ebi ene
mîra ikikpọ me lek isa irọ inu;
ire ata irọrọ ìkakup,
ebi ene mîra ikiweek.
Ìkikukup ire mgbọ geelek,
ebi ene mîra ikisa ọmọ
ikaan̄ ntim-mkpan̄;
ọmọ okitim ikpan̄ me ntọ-mkpọ
eyi mkpukpe kan̄ ikakaan̄ge okpa geege me lek.
3 Ire, ogbogbo urum bọn ebi
kperiọọn̄ Awaji cha kpebesibi oruru,
bọn kiban̄ cha ejebe ugan ikaan̄,
kpebetibi ugwun̄ ijọn̄ idọk,
kpebekaan̄ ebon ònyenye me ijọn̄.
4 Ema mêkọt itibi agọọk
môkupbe sọntiik mgbọ,
ire, mije ema ekakaan̄ge ata ugwun̄ ijọn̄,
efet môkinyinyen̄e ema;
egwijo isiwut afa afa,
ìbojijibi ema ebon ebon itọọn̄ igwook.
5 Agọọk kiban̄ ìbofafaan̄
igwook sabum ònomiin̄,
mfut kiban̄ ìbojijijit;
ìbokup mkpukpem mkpukpem,
kpekọkọt irie,
kpunu inu geege ebekọt isa irọ.
6 Me usen oyerebet Awaji,
bọn ejebe ugan imaan̄ ebere inu ata-ikọ,
ofolek ijo inu ebi nte kiban̄
mè nga kiban̄ erọbe.
Mkpa nsek ogwu ata irọrọ
7 Ire, ogwu ata irọrọ,
ikerere ìkup nsek nsek ikwu,
ìbosisiki efuuk.
8 Kpekinyi ogwu ugane umin
mije usen ugwem kan̄ ojọn̄ọbe,
ìkarere si mije îlukbe
owuwa acha ke ekinyi umin;
9 iriọọn̄-inu ore isọọn̄ inyi ene,
iluluk ugwem kpunube
nrọ-nlọ me emen ore
ikakan inin̄ ugane.
Enọk
10 Enọk îrọ inu òbebele Awaji ejit,
Awaji omama ọmọ;
eya orọ, mgbọ ọmọ okiluk me etete ebi ijo,
ebeben ọmọ isan̄a ifo emen inyọn̄.
11 Eben ọmọ isan̄a inyi ijo inu
ikawuwọlọ ọmọ ifuk-ibot,
mè ofiaan̄ si ikafiaan̄ ibot ejit kan̄.
12 Uja chieen̄ òkup me lek ijo
inu ikpak ìkekichit ata inu,
inyi ekamun̄;
ulọk òbet lek egwijo ìkekifiat
ejit ogwu ìkarọ inu geege ìlọ.
13 Enọk îsa mgbidim mgbọ
eyi ọmọ onwọnbe isan̄a
ikaan̄ inu ekikaan̄ inan̄a me
lek elukbe ujọn̄ọ ugwem.
14 Mije, ibot ejit kan̄ îneme Okumugwem,
eya orọ îgwatbe lek imọnọ
ọmọ isan̄a me lek inu
ikpak ekirọ ikana ọmọ.
15 Ebi ene mîmun̄,
ire, kpegobo itet;
kpemọmọnọ si itap me ekiket,
ibe ke atata nwọn mè nsan
Awaji ìkup inyi ebi
Okumugwem ogobobe,
ke Awaji ìkibem ebi kan̄ ebi ìkup mbuban.
16 Ogwu ata irọrọ òkwukwu
môtip ogwu òkup me
ugwem ikariọọn̄ge Awaji oyerebet;
ogbaragbat ene ògwagwat lek inwọn isan̄a
môtip ogwu ikpak òluluk
ujọn̄ọ ugwem oyerebet.
17 Ebi ijo ife mêmun̄ ogwu
òriọọn̄ inu okwube,
ire, kpeberiọọn̄ inu
Okumugwem okaan̄be me ejit inyi ọmọ,
kpeberiọọn̄ si inu òrọrọ
îsabe ọmọ isi isun̄ me utelelek.
18 Ebi ijo irọrọ mêmun̄ ene ya okwube,
mè ikpọ isiki chieen̄,
ire, Okumugwem môchak ema me imọm.
Sọntiik mgbọ isiraka,
ema mêkakana ibat ikakaan̄ge umin,
mè ikana inu ochak ire mgbọ
geelek me etete ebi ìkwakwaan̄.
19 Okumugwem môsan̄a ema itọbọ me ijọn̄,
ema mêninin̄ mbuuk;
ìbobene me ebon kiban̄
ikisisik ema kubọk uwu;
ema mêjijijaka igwook ikana nchat ǹrioon̄,
ofaak môtetet ema, erieen̄ kiban̄ môchechep.
Mgburudun̄ oyerebet
20 Ema mênu, mè ikiran,
mgbọ mêkisibi oyerebet inyi ema;
ikan ema erọn̄be môkup me isi
kiban̄ itip ema oyerebet.