Inyọn̄ ebi ata irọrọ
3
Ibot ejit ebi ata irọrọ ìkup me ubọk Awaji,ema kpebemun̄ ofaak geege.
2 Me chieen̄ ebi mbubut,
ema ekup kubọk mîkwaan̄,
mkpa kiban̄ ìkup kubọk ke ìre uga mfufiat;
3 itetele ema etelebe eji
îra ikikup kubọk ke ema mînin̄ jakajaka,
ire, ema ekup me esuuk.
4 Ìkup me chieen̄ ebi ene
kubọk ema mîbọkọ osusut,
ire, ikpọchieen̄ ema ekaan̄be
ibe ke ene ìkpokwukwu, ìjojot.
5 Ukwook kiban̄ ìfefet, ugbana kiban̄ ìbololobo,
Awaji ìtọtọ ema ikpọ,
mè imun̄ ibe ke ema mîgbe
ikukup melek kan̄.
6 Ìtọ ema ikpọ kubọk alata
araran̄ esabe ukan̄ itọ ikpọ,
mè ibọkọ ema itap kubọk ìre
ngwugwa ewọwọp.
7 Mgbọ Awaji isinu inenikpe
ebi ata irọrọ mkpukpe,
ema ebekitotoon̄,
mè ikilomo mgbọ yaage wei
ikije kubọk ntat-ukan̄ ònin̄ lek mfurufu.
8 Ema mêre ebi ibot
inyi owuwa ido,
mè ikikpulu ebi ife geelek;
Okumugwem môkekikpulu ema
ire mgbọ geelek.
9 Ebi ìtotoon̄ ọmọ ejit me lek
mêgobo atikọ kan̄ itet;
ebi ìkekeke inye mêkup ibia
melek kan̄ me imumechieen̄;
mije, atata nnwọn kan̄ melek
nsan kan̄ ìkikup me lek ebi kan̄ ìkup mbuban,
ọmọ si ìkikpọ chieen̄ me
lek ebi kan̄ ebi ọmọ ogobobe.
Mkpukpe òkup inyi ebi kperiọọn̄ Awaji
10 Ire, ebi kperiọọn̄ Awaji
mêbọkọ osusut ikpọ me lek ifuk-ibot kiban̄,
mije, ema mîkpọ ebi ata irọrọ chieen̄ isiki,
mè ikpaka ibot inyi Okumugwem.
11 Ebi ìchacha iriọọn̄-inu
mè ikween̄-inu mêkup me ufieejit;
ikpọchieen̄ kiban̄ ìre ikike,
kwulukwulu kiban̄ ìchechep,
ikwaan̄ kiban̄ ìkasibi oruru;
12 ebi nwa kiban̄ ebere ebi mbubut,
bọn kiban̄ ebere ijo bọn,
13 bọn bọn kiban̄,
ufieek-otu okup inyi.
Ogwu ìkakaan̄ gwun̄
Ubelejit môkup inyi enenwaan̄ ora
ogwu ìkafiat lek kan̄,
ogwu ìkariọọn̄ inyọn̄
mkpilaak ofifi ene.
Me Usen Oyerebet, mgbọ Awaji
môwọlọbe ibot ejit ene ikpọ,
ọmọ môkaan̄ mfut.
14 Ubelejit môkup si inyi
ogwu esan̄abe òsok,
ogwu ubọk kan̄ ikafiatge ikan,
ogwu ikarọge inu ikpak
geege ìkeme Okumugwem;
mije îkekebe inye me lek Awaji,
mênyi ọmọ ọkpọkpọ nnwọn,
mè inyi ọmọ ere ikpele
ubelejit me Uwu Mbuban Okumugwem.
15 Mfut ata ikwaan̄ ene orọbe
îkaan̄ umin me lek;
iriọọn̄-inu ìkitibi me lek ebon
uti eyi òkisesek mgbọ geelek, ìkakikwu.
16 Bọn ugan kpebemiin̄ inin̄ ene,
nsabọn ejebe me inyọn̄
mkpilaak ofifi ene imaan̄
ebechechieen̄ ita.
17 Ikerere ema eluluk ugwem ijọn̄ọ,
ema kpebekup me lek inu geege;
me òta kan̄, ema isikan,
kpebekaan̄ ulibi.
18 Ire ema ikwaan̄ nsek,
ikpọchieen̄ geege ìkpokup inyi ema;
me usen oyerebet,
ema kpebekaan̄ ukarajit geege.
19 Mije, òta mgbọ me ukot ebi ijo irọrọ
ìbokup ikpak ikpak.