Ijo Ekiket
2
Mije, ema ekisa nlilọifuk-ibot kiban̄ itumu inyi lek kiban̄ ibe,
“Ugwem kiji ìre mgbidim,
mè ijot me ufieejit;
okputut kan̄ isire,
ililibi inwọnọ ìkakup;
ìkakaan̄ ene geege eriọọn̄be-nu
ògwugwu ikom me ama ekwukwu ika.
2 Ekpọkpọ iman eji ikeya, kpetọtọt,
ugwem keyi isiraka,
eji mêkup kubọk eji
kpesisibi inyọn̄.
Efuuk òkisibi eji me inwọm ìre oduku ikike,
ekiket kiji ìbet lek ntat-ukan̄
ònyanyan mgbọ ejit kiji okisulu.
3 Ntat-ukan̄ yi isiniin̄,
akpalek kiji îra ikana ntọn̄;
ekwukwu kiji îra ininiin̄ ichep
kubọk ukpọk ukpọk efet ikike.
4 Mgbọ isije, mêwuwuuk erieen̄ kiji,
ene geege ìkpokeek ikwaan̄ eji erọbe;
ugwem kiji môraka kubọk
oduku inyọn̄ okiraka isan̄a, kpunu akpat,
mè ininiin̄ ita kubọk àbaan̄,
eyi nseen̄ ura ogwookbe me lek,
uyok ura otetet ichiaak.
5 Usen ugwem kiji ìkiraka kubọk ogugo,
eji igwugwu ikom isibi me mkpa ìkakup,
mije, egogon ugwem kiji ikam,
mè ikeme iman̄ òriọọn̄ me lek,
ene geege ìkakigwu ìkom me mkpa ìka.
6 “Ìna, mè eji erie utop ata inu
geelek òkukup,
mè esa inu geelek Awaji
orombe erie ugwem ejot
kubọk mgbọ eji erebe ijija.
7 Eji enwọ atalek unye otu ewe miin̄,
mè eken atalek unye otu ewe
aran̄ utop olu;
eji ekachieek ibe ajakajak
otu ura geege ilọ eji ubọk.
8 Sabum ajakajak rôs ònochiaak,
eji egbem enwunwaan̄ me
ibot kiji kubọk okpibot ubọọn̄.
9 Ene geege me etete kiji
ikalọlọ igọgọọk irie ugwem;
eji etele iman̄ òriọọn̄ me ere geelek,
inyi esa eriọọn̄ ibe ke eji mîrie ugwem,
eyi ore okike inu eyi kiji,
mè ire si uche òkukup inyi eji.
10 Eji enetutuku ogwu ata
irọrọ òrere ugbọọn̄;
eji ekawuwọk ubọk me lek ogwu nwakpa;
ekanyinyi si ogwu òkakan
igwook isọọn̄ ijot ibot ulibi.
11 Ire, eji erọ inu geelek me unye,
mè etumu ibe ke înen,
mije, inu ikakaan̄ge unye ìkakaan̄ ikwaan̄.
12 “Eji enelileek ekekpọ ogwu ata irọrọ,
mije, ọmọ ìkatat me lek kiji,
ìkijeje ikeme inu eji ekirọ;
ìkifieek eji ikọ ibe ke eji ekichaka ikan,
mè ikitoon̄ eji ikọ ibe ke
eji kpekirọ orọmijọn̄ esabe ikpukpo eji.
13 Ìkimọnọ ibe ke ọmọ îriọọn̄ Awaji,
mè ikigwen lek kan̄ gwun̄ Okumugwem.
14 Ọmọ îkana ogwu òkifieek eji ikọ
mije, ekiket kiji ìkikup me lek kan̄ ijo ijo.
15 Isasa chieen̄ imun̄ ọmọ ìre ufialek inyi eji,
mije, ìkaluk ugwem kubọk
ebi ofifi ife ekiluk,
oniin̄ ugwem kan̄
ìkup atalek esese.
16 Eji ekup me lek kan̄ ifin ifin,
ọmọ si ìkije agba agba me
lek inu eji ekirọ kubọk nsak inu;
ọmọ ìkibe ke ebi ata irọrọ
ekikwu mkpa me ubelejit,
mè ikigugo lek ibe ke Awaji ìre nte kan̄.
17 Eji ekpọ-nu mè ìre ikọ kan̄ ìre atikọ,
mè ekpọ-nu ubọk okputut ugwem kan̄ obokup.
18 Ire ogwu ata irọrọ ìre gwun̄ Awaji,
Awaji môtap ubọk inyi,
mè inyan̄a ọmọ isibi
me ubọk ebi oriara kan̄.
19 Eji enerọ ọmọ nnaan̄,
mè esut ọmọ osusut esa etọ ọmọ ekpọ-nu,
mè eji esa eriọọn̄ mè ìre îkirọ inu esuuk esuuk,
mè esa eriọọn̄ ere ukarajit kan̄ oyakabe.
20 Eji enetip ọmọ oyerebet mkpa esip,
mije, îtumu ibe ke mêbem ọmọ.”
Nlilọ inu ebi ikpak
21 Ike ebi ikpak ekikeek ekiket ire eya,
ire, ema mîlọ oniin̄,
mije, inu ikpak kiban̄ îchit ema chieen̄.
22 Ema kperiọọn̄ nlelet inu eyi Awaji,
kpekpọ chieen̄ ibe ke
mkpukpe òwa inyi iluluk
ugwem òkup mbuban;
kpemumun̄ si mkpukpe
òkukup inyi ebi ìluk
ugwem kpunube nrọ-nlọ me emen.
23 Awaji ìrom eji ibe ekakwu,
ìrom eji ibet lek ubọk ọmọ okupbe,
ìkpokwu mege ire mgbọ geelek.
24 Îre ejit ile yọk okaan̄be osa
mkpa itap me linyọn̄,
ebi ìkup me ọgbọn̄ kan̄ ekikwakwaan̄.