Iriọọn̄-inu
Kè Solomọn
Nteme ata irọrọ
1
Enyi ebi ìkikpulu linyọn̄,ìma ata irọrọ;
ìtele ibe nkeek enyi ekaan̄be me
lek Okumugwem ire eyi atikọ,
mè ìsa me ijọn̄ ijọn̄ ejit kinyi ìweek ọmọ.
2 Mije, îre ebi kpekitọ ọmọ ikpọ
ekimun̄ ọmọ;
ìkisa lek kan̄ ijeen̄ ebi ìtotoon̄
ọmọ ejit me lek.
3 Ijo ekiket ìkekifieek ene
isan̄a me lek Awaji;
itọtọ unye Awaji ikpọ ìkisa esip
itet ogwu mbubut.
4 Iriọọn̄-inu ìkponin̄ emen ogwu ofiaan̄,
ìkpokukup si me emen ogwu
òkup me usun̄ inyi ijo inu.
5 Ogwu ekwukwu kan̄ okupbe me mbuban,
òtetet lek ikaan̄, ìkililibi lek ofiaan̄,
mè ikida lek ibọkọ me lek
ekiket òkup mbubut mbubut;
ijo irọrọ isinu,
ìkikup me lek kan̄ ifi ifi.
Awaji îriọọn̄ inu eji ekitumu
6 Iriọọn̄-inu ìre ekwukwu òkima ene,
ire, ìkpotele ogwu òtutumu
ikọ unyechieen̄ inyi Awaji,
mije, Awaji okimun̄ emen emen ejit kan̄,
mè ikiriọọn̄ ubọk ikpọ ekiket kan̄,
mè ikinọ inu îkibubuku me otu.
7 Ekwukwu Okumugwem ìjojot linyọn̄,
ọmọ ogwu ògbaan̄ otutuuk inu itet ikaan̄
îriọọn̄ inu ene okitumu.
8 Eya orọ, ogwu òtutumu ikọ
ikanenge ìkpolọ ọmọ chieen̄;
unen oyerebet ìkpolọlọ
ikpekpe ene ya useen̄.
9 Mije, mêwọlọ nkeek geelek
òkup me emen ogwu
ikariọọn̄ge Awaji ikpọ,
mè ikpa inu emun̄be me emen
usem kan̄ inyi Okumugwem,
inyi esa etip ọmọ oyerebet
me lek ikan̄ îrọn̄be.
10 Mije, utọn̄ ogwu mba-ejit ìkinọ inu geelek,
nuunuun̄ ikike ìkakilọ ọmọ utọn̄.
11 Eya orọ, gbala chieen̄ me
lek nuunuun̄ ikakaan̄ge ibot,
mè tet otu alọm kwun̄ kaan̄ me ifafiat ene,
mije, nlelet ikọ geelek ìkije melek osusut;
otu òkikan̄ ataak ìkisa
mkpa inyi ibot ejit ene.
Awaji ìkarom mkpa
12 Karọ nlilọ inu ìgwen mkpa ìnyi lek kwun̄,
kachieek ibe inu orọbe isa mfufiat ijet owu.
13 Awaji ìkarom mkpa,
mkpa inu geelek òkifuuk
efuuk ugwem ìkakitop ọmọ me lek.
14 Ìrom inu geelek ibe ikiluk ugwem;
unye Awaji osabe irom
linyọn̄ ìre unye òkinyi ugwem;
kpunu iwot òkpan̄ ene geege me emen kan̄,
mkpa ìkakaan̄ unye
ikpukpulu me linyọn̄.
15 Ata irọrọ ìkakikwu.
Ubọk ebi kperiọọn̄ Awaji emun̄be ugwem.
16 Ebi kperiọọn̄ Awaji
ekisa otu ikọ kiban̄
mè irọrọ kiban̄ igwen
mkpa inyi lek kiban̄;
ema emun̄ mkpa kubọk unene,
mè ikitak lek ita inyi,
mè igọọk mkpa inyan̄a ibot,
mè igbe si ebi ìbekaan̄
mgbaan̄-nrọ melek kan̄.