3 Mosis onenitumu inyi otutuuk ebi Ijeren ibe, “Ìkikeek usen cherekeyi, eyi enyi enan̄abe isibi me Ijipiti, mè inan̄a isibi si me usun̄. Ìkeek ibe ke Okumugwem ìsa me ikpele unye ubọk itaba enyi isibi me ijọn̄ ido Ijipiti. Mije keya, ikarie inu geege olat okupbe me lek. 4 Me usen cherekeyi, me adasi onyan̄, òrere onyan̄ Abibu,^a ke enyi enan̄a isibi me Ijipiti. 5 Okumugwem môsa enyi isi itap me inyọn̄ ijọn̄ ebi Kenan, mè ebi Et, mè ebi Amọ, mè ebi Ifi, mè ebi Jebus, òrere ijọn̄ Okumugwem onyan̄abe ibot inyi ebi nte nte kinyi ibe ke ọmọ môsa inyi enyi. Ijọn̄ yi ìre ata ijọn̄ òkisibi anam mè mfut uti. Mgbọ Okumugwem isisa enyi isi itap me inyọn̄ ijọn̄ yi, enyi mêkifaka mfaka yi me onyan̄ keyi me acha geelek. 6 Ikeyi ke enyi ebekifaka mfaka yi: Ototuuk usen jaaba, enyi ebekitaka fituru kpunube olat me lek. Me òso usen jaaba ya, enyi mêrie ijọk inyi Okumugwem. 7 Enyi mêkitaka fituru kpunube olat me lek otuuk kè usen jaaba. Inorie geege etapbe olat me lek ikakup me etete kinyi. Ekamumun̄ si inu geege olat okupbe me lek me ere geege me inyọn̄ ijọn̄ enyi elukbe. 8 Me usen enyi mêkirie ijọk yi, ene geelek itumu inyi ogwu gwun̄ ibe, ‘Ǹkirie ijọk yi acha geelek isasa ikikeek inu Okumugwem orọbe inyi emi me mgbọ nnan̄abe me Ijipiti isibi.’ 9 Ijọk yi môkup kubọk inu ijejeen̄ òkup enyi me ubọk, mè ikup si kubọk inu ǹkeek me inyọn̄ okwut isi kinyi me agbagba chieen̄ iba kinyi. Sa me ikeyi, ikọ Ikan Okumugwem ìkponan̄a enyi me otu. Mije, îre me unye ubọk ke Okumugwem osa isan̄a enyi isibi me Ijipiti. 10 Eya orọ, enyi mêkifaka mfaka yi me ibot mgbọ kan̄ me acha me acha.

11 “Okumugwem môsa enyi isi itap me inyọn̄ ijọn̄ ebi Kenan, kubọk înyan̄abe ibot inyi enyi mè ebi nte nte kinyi ibe ke ọmọ môrọ. Mgbọ Okumugwem isisa enyi isi itap me inyọn̄ ijọn̄ ya, mè isa ijọn̄ ya inyi enyi, 12 enyi mêsan̄a otutuuk bọn uchili-owot kinyi geelek^b isun̄ esese inyi Okumugwem, mè isun̄ si orie anam kinyi geelek òchili owot ogwu uga esese inyi Okumugwem. 13 Gwun̄ inyinya akpan geelek òchili owot ogwu uga, enyi mêsa gwun̄ arọọn̄ inwene ibot. Ire, adasi gwun̄ inyinya akpan geelek eyi enyi kpeweek, ìfan̄a ebek kan̄, inyi ikwu. Otutuuk adasi bọn ebirieen̄ kinyi geelek, enyi ebenwenwene si ibot.

14 “Me mgbọ òkup me isi, ire gwun̄ kwun̄ inido owu ibe, ‘Mfaka keyi okifaka ìsibi keke?’ Owu môfọọk ibe, ‘Mfaka yi ìkirọ inyi emi ǹkeek ubọk Okumugwem osabe unye ubọk kan̄ itaba eji isibi me Ijipiti, ere eji ekupbe me emen usun̄. 15 Mije, mgbọ ogwu ubọọn̄ Ijipiti osabe me unye-ibot ijit itetele ibe eji enan̄a me Ijipiti esibi efon, Okumugwem ìkpakpan̄ adasi bọn ebilene mè adasi bọn ebirieen̄ anam geelek me Ijipiti.’ Owu môtumu si inyi ibe ke îre mije keyi ke owu okisa gwun̄ uchili-owot kwun̄ geelek, òrere enerieen̄, mè ìre eyi ebilene, mè ìre eyi anam, igwa ngwugwa inyi Okumugwem, ire, mè ikinwene ibot otutuuk adasi bọn ebirieen̄ kwun̄ geelek. 16 Mfaka yi môkup kubọk inu ijejeen̄ òkup enyi me ubọk, mè inu ǹkeek me inyọn̄ okwut isi kinyi me agbagba chieen̄ iba kinyi, eyi môkijeen̄ ibe ke îre sa me unye ubọk ke Okumugwem osan̄a eji isibi me Ijipiti.”

17 Me mgbọ ogwu Fero otelebe ibe ebi Ijeren enan̄a me ido kan̄ esibi, Awaji ìkasa ema ìje me oniin̄ agan̄ ido ebi Filisia, ubọk geelek oniin̄ keya orebe ufieek. Awaji ìbe, ire ema inije ichichini me lek akọn̄, ke mênwene ejit, mè igwu ikom ifo Ijipiti. 18 Mije keya, Awaji osasa ema ije isi ikana me oniin̄ emen èwê, me agan̄ okwaan̄ Anyiaan̄. Ebi Ijeren mîkpulu nroon̄ akọn̄ kiban̄ ikaan̄ me ubọk isa igbaalek isibi me ido Ijipiti.

19 Mosis îkpulu ukwuuk kè Josefu ikaan̄ me ubọk isa igbaalek isibi me Ijipiti. Mije, Josefu îrọ inyi bọn kè Ijeren, ebi ngwan̄ kan̄, enyan̄a ibot enyi ọmọ, ibe ke ema mêkpulu ukwuuk kan̄ ikaan̄ me ubọk isa isibi me Ijipiti ifo. Josefu ìtumu inyi ema ibe ke Awaji ìkpolọlọ inunu initap ubọk inyi ema, mè isan̄a ema isibi me ido Ijipiti. Mgbọ ya isire, mè ema ekalọ ikpukpulu ukwuuk kan̄ ikaan̄ me ubọk isa igbaalek inan̄a me Ijipiti ifo.

20 Ebi Ijeren enenibene ije inan̄a me ama Sukot, mè inigba ama Etam òkup me agba èwê, mè igwugwuun̄ uwu ọfọ kiban̄ me ama ya, mè ikup itap efuuk. 21 Okumugwem okekijeen̄ ema oniin̄, mè ikije me isi kiban̄ kubọk ujọn̄ọ efit oduku inyọn̄ me ikarek. Egwe isifit, îra ikije me isi kiban̄ kubọk ujọn̄ọ efit ukan̄, inyi ema ekemọọn̄ inu. Sa me ikeya, ebi Ijeren ekọkọt ikije ije kiban̄ ikarek mè eririeen̄. 22 Ujọn̄ọ efit oduku inyọn̄ ya òkisibi me ikarek mè ujọn̄ọ efit ukan̄ ya òkisibi me eririeen̄ ìkatele ebi Ijeren mgbọ geege me otutuuk oniin̄ ije kiban̄.