5 Etip osisi ilook ogwu Fero ibe ke ebi Ijeren mînan̄a isibi me Ijipiti ifon isan̄a kpai. Ogwu Fero mè ebi ibot ikwaan̄ kan̄ enwenwene ejit me lek ebi Ijeren, mè ibe, “Iyak, ìre kpasi nlilọ inu ire eyi eji erọbe ikeyi, mè itele inyi ebi Ijeren ekpọkpọ enan̄a efon ikeya, mè etele ikwaan̄ ekisi inyi eji?” 6 Ogwu Fero onyinyi ida, eneneen̄ uji akọn̄ kan̄ isun̄ isan̄a. Itititiin̄ ebi akọn̄ kan̄ isa igbaalek inan̄a. 7 Ogwu Fero ìsa efit uji akọn̄ gweregwen, echi ònwọnwọn ichit me ido Ijipiti, mè isa si otutuuk uji akọn̄ kechilọ geelek òkup me Ijipiti, otutuuk cha mè ebi ibot akọn̄ me emen, isa inan̄a isibi igọọk ebi Ijeren. 8 Okumugwem otetet ejit ogwu Fero ogwu ubọọn̄ Ijipiti inye, inanan̄a isibi, mè iben akọn̄ igọọk ebi Ijeren. Mgbọ ya, ebi Ijeren ekekije ikeya ukaan̄-lek ukaan̄-lek inan̄a me Ijipiti isibi, kpetet ukpook geege. 9 Ogwu Fero ogọgọọk ebi Ijeren atalek igọgọọk. Îsa otutuuk uji akọn̄ kan̄ echi inyinya okitaba ije, mè ebi akọn̄ ìkilibi me inyọn̄ inyinya, mè ebi akọn̄ kan̄ geelek, isa igọọk ebi Ijeren efuuk efuuk. Ema enenisoon̄ ebi Ijeren me agba okwaan̄ Anyiaan̄, me agba lek Pi Yayirot eyi òkibene chieen̄ ikpọ Baali-Sefon, ere ebi Ijeren ekupbe ikitap efuuk.

10 Mgbọ ogwu Fero mè urum ebi akọn̄ kan̄ ekilibi igbet ere ya, ebi Ijeren ebebene chieen̄ imun̄ ebi Ijipiti ekinin̄ ema lek efuuk efuuk. Ufieek-owot mkpa otetet ema enenen, ema etataan̄ ukpo igwen Okumugwem. 11 Ema ekekidimi me ibot kè Mosis, mè ikibe ọmọ, “Ìre mije kpunu udọn̄-ufuun̄ me Ijipiti ke owu okpulu eji inu me emen èwê, inyi eji enekwaan̄ eta? Keke ke orọ eji ikeyi? Owu okpulu eji isibi me Ijipiti isa ijet mkpa me emen èwê! 12 Ìre ìkafat ìre inu yi ke eji etumu inyi owu me Ijipiti, ibe owu òtele inyi eji ekup me usun̄ enyi ebi Ijipiti, mije, ke mônwọn eji me lek irere usun̄ inyi ebi Ijipiti, igak inenikwaan̄ ita me emen èwê!”

13 Ire, Mosis otutumu inyi ema ibe, “Ikayaka ìtet ukpook! Ìchak lek ìkeke, mè ìkikpọ! Enyi mêmun̄ unyan̄a Okumugwem, eyi ìbonyan̄a enyi isibi me cherekeyi! Ebi Ijipiti chi enyi ekimun̄ cherekeyi, enyi kpebeyaka imun̄ ema ofifi. 14 Okumugwem môtim akọn̄ me ibot kinyi. Ìriaan̄ ere ìkup ìkikpọ!”

15 Okumugwem otutumu inyi Mosis ibe, “Òjeje ikitaan̄ ukpo igwen emi? Tumu nyi ebi Ijeren ibe ekeje efo isi. 16 Owu, bene mkpat kwun̄ fo inyọn̄, mè nyana ubọk kwun̄ kpọ okwaan̄, inyi mun̄ òkup me okwaan̄ ya itọbọ ibum iba, mè ebi Ijeren eje esaba me nchat ijọn̄. 17 Emi mârọ ibe ejit ebi Ijipiti inye, mè elibi egọọk ebi Ijeren me eden̄ okwaan̄ ya. Mâbọkọ umin sa me lek ogwu Fero mè otutuuk ebi akọn̄ kan̄, mè uji akọn̄ kan̄ mè otutuuk ebi akọn̄ kan̄ cha ìkilibi me inyọn̄ inyinya. 18 Sa me inu mbarọ ogwu Fero mè otutuuk uji akọn̄ kan̄ mè ebi akọn̄ kan̄ ìkilibi me inyọn̄ inyinya, ebi Ijipiti mêneniriọọn̄ ibe ke îre emi nre Okumugwem.”

19 Ogwu osat Okumugwem, ogwu mgbọ òkije me isi urum akọn̄ ebi Ijeren ya, ojijibi inan̄a me agan̄ isi, mè iyaka ikana isi ikup me agan̄ udun̄ kiban̄. Ujọn̄ọ efit oduku inyọn̄ ya si onanan̄a me agan̄ isi kiban̄, mè ikana isi ikeke me agan̄ udun̄ kiban̄, 20 me etete urum akọn̄ ebi Ijipiti mè urum akọn̄ ebi Ijeren. Ujọn̄ọ efit oduku inyọn̄ ya otatap udun inyi urum akọn̄ ebi Ijipiti, mè itap utoon̄ inyi urum akọn̄ ebi Ijeren otutuuk eririeen̄ ya. Mije keya, urum akọn̄ iba cha, ge ìkakọt ìje ìgbet lek ge otutuuk eririeen̄ ya.

21 Mosis obebene ubọk, melek mkpat ya me ubọk, mè inyana ikpọ okwaan̄ ya. Okumugwem orọrọ inyi unye efet agan̄ mbum-ura iwut otutuuk eririeen̄ ya. Unye efet ya owuwut mun̄ okwaan̄ ya irak, mun̄ ocheche irek iba, okwaan̄ okakana nchat ijọn̄. 22 Ebi Ijeren ejeje me nchat ijọn̄ isaba okwaan̄ ya. Mun̄ okwekwek ema kubọk mgban, me agan̄ ulom mè agan̄ ujit.

23 Ebi Ijipiti cha imumun̄ ikeya, otutuuk inyinya ogwu Fero, mè otutuuk uji akọn̄ kan̄ cha, mè otutuuk ebi akọn̄ kan̄ cha egbugbuku ikigọọk ebi Ijeren efuuk efuuk, mè ilibi inin̄ emen okwaan̄ ya. 24 Me agan̄ egwe usen ya, Okumugwem okukup me emen efit ukan̄ mè oduku inyọn̄ ya isiki chieen̄ ikpọ urum akọn̄ ebi Ijipiti, mè itap wọlọwọlọ me etete urum akọn̄ kiban̄ ya. 25 Okumugwem ojijijaka ukot uji akọn̄ kiban̄ cha, inyi ikayaka ìkọt ìgwat lek ìje ìnyi isi. Ebi Ijipiti ebebene ikitumu ibe, “Ngwa, eji enegwu ekom, mè etele ebi Ijeren. Îre Okumugwem okitim akọn̄ inyi ema ikeme eji ebi Ijipiti.”

26 Okumugwem otutumu inyi Mosis ibe, “Bene ubọk kwun̄ nyana kpọ okwaan̄ yi, inyi mun̄ igwu ikom, mè ikana ichit ebi Ijipiti melek uji akọn̄ kiban̄ mè otutuuk ebi akọn̄ kiban̄ ìkilibi me inyọn̄ inyinya cha.” 27 Mosis onyanyana ubọk ikpọ okwaan̄ ya. Me agan̄ egwe, mun̄ ya ogwugwu ikom, mè ijot ichak, ubọk îwuukbe lek ikikup. Mgbọ mun̄ ya okigbuku inu, ebi akọn̄ Ijipiti cha ekekilibi inan̄a. Ire, Okumugwem odada ema otutuuk igwook me ejit okwaan̄. 28 Mun̄ ya ogwugwu ikom, mè imeen̄ otutuuk ebi akọn̄ ogwu Fero, mè otutuuk uji akọn̄ kan̄, mè otutuuk inyinya kan̄, mè otutuuk ebi akọn̄ kan̄ cha ìkilibi me inyọn̄ inyinya, mè ikpan̄ ema otutuuk isan̄a kpai. Kpunu ene geege òyayaka isik, kpukpunu kubọk ge ikeyi!

29 Ire, ebi Ijeren ejeje isaba okwaan̄ ya me nchat ijọn̄, mun̄ okwekwek ema kubọk mgban me agan̄ ulom mè agan̄ ujit kiban̄.

30 Îre sa me ikeya ke Okumugwem onyan̄a ebi Ijeren isibi me ubọk ebi Ijipiti me usen ya. Ebi Ijeren esasa chieen̄ kiban̄ imun̄ ebi Ijipiti ekwaan̄be ita kpai, mè imun̄ nkwukwu kiban̄ olilambe ijot agba okwaan̄ ya. 31 Mgbọ ebi Ijeren emun̄be ike Okumugwem osabe ijeen̄ ikpele unye kan̄ me lek ebi Ijipiti, ema etetet ukpook me lek Okumugwem, mè initoon̄ ejit me lek kan̄, mè itoon̄ si ejit me lek kè Mosis, ogwu ikwaan̄ kan̄.