Awaji înyi ebi kan̄ mana mè anam ekun̄kun̄
16
Otutuuk ebi Ijeren eneninan̄a me Elim, mè ije isi inin̄ emen èwê Sin. Èwê ya ìkup me etete Elim mè ogoon̄ Saina. Ema ere emen èwê ya me òso akọp mè usen go, me òso onyan̄ iba ema enan̄abe isibi me Ijipiti. 2 Me emen èwê ya, otutuuk ebi Ijeren ebebene ikinunuun̄ ikeme Mosis melek Erọn, 3 mè ikitumu inyi ema ibe, “Mebe ke Okumugwem îsa ubọk kan̄ gaalek ikpan̄ eji me Ijipiti, ere eji ekiyik otin̄ inorie mè anam me isi kiji irie ijot owot ubọk òneneme eji, kè ònwọn ogak eyi. Mgbọ keyi, ìkpọ ubọk enyi ekpulube eji, otutuuk otu ifuk ene ìwa ikup ikeyi, inu me emen èwê keyi, inyi enekwaan̄ esan̄a me uraafiọọn̄.”4 Okumugwem onenitumu inyi Mosis ibe, “Kpọ, mârọ inyi inorie irep kubọk ibot inan̄a me isinyọn̄ igwook me ijọn̄, inyi ebi ene ekesi ekpulu me usen me usen. Usen geelek, ogwu ikup, môsi ikpulu eyi môsobe ọmọ me usen keya. Mâsa me ikeya iroon̄ ema ikpọ mè ìre ema mêgban̄ utọn̄ me lek nteme n̄a, mè ìre kpebegban̄. 5 Me òso usen gweregwen, mgbọ ema mêrọbe inorie echi ema eteen̄be me usen ya, ema mêmun̄ ibe ke môso inorie usen iba.”
6 Mosis mè Erọn enenititiin̄ ebi Ijeren, mè itumu inyi ema ibe, “Me agan̄ ikakwun̄ chereyi, enyi mêriọọn̄ ibe ke îre Okumugwem osan̄a enyi isibi me Ijipiti. 7 Me ewelegwe iyakwut, enyi mêmun̄ ujamgbugbo Okumugwem, mije, ọmọ înọ nuunuun̄ enyi ekinunuun̄ ikeme ọmọ. Ire emi melek kè Erọn, ìre keke ke eji ere, eyi enyi ekinunuun̄ ikeme eji?” 8 Mosis onenitumu inyi ebi Ijeren ibe, “Ìkpọ, îre Okumugwem me lek kan̄ obonyi enyi anam enyi ebetaka me ikakwun̄, mè fituru enyi eberie me ewelegwe, mije, ọmọ înọ nuunuun̄ enyi ekinunuun̄ ikeme ọmọ. Ire me lek kiji, ìre keke ke eji ekup me lek? Ìkare eji ke enyi ekinunuun̄ ikeme, îre Okumugwem.”
9 Mosis onenitumu inyi Erọn ibe, “Si tumu nyi otutuuk ebi Ijeren ibe enu enetitiin̄ me isi Okumugwem, mije, Okumugwem îra inọ nuunuun̄ ema ekinunuun̄.”
10 Erọn òkitutumu ikọ ya me otu inyi ebi Ijeren, ebi Ijeren ekakana chieen̄ ikpọ agan̄ emen èwê, mè imun̄ utoon̄ eyi ujamgbugbo Okumugwem otoon̄be me emen ujọn̄ọ efit oduku inyọn̄. 11 Okumugwem onenitumu inyi Mosis ibe, 12 “Nra inọ otutuuk nuunuun̄ ebi Ijeren ekinunuun̄. Tumu nyi ema ibe, ke ema mêtaka anam me otu ikakwun̄, mè irie fituru ijot owot me ewelegwe, inyi esa eriọọn̄ ibe ke îre emi nre Okumugwem Awaji kiban̄.”
13 Me otu ikakwun̄ usen ya, ogbogbo ekun̄kun̄ enenigwook ichit otutuuk ere m̀gba-ǹgwele ukan̄ ere ebi Ijeren elukbe. Me ofit iwele kan̄, mbat otu ewelegwe ogwogwook ichit ijọn̄ me ere m̀gba-ǹgwele ukan̄ ya. 14 Mgbọ mbat ya ochatbe isan̄a, inu òkup kubọk ikpọk irin̄ ogwogwook ichit ijọn̄ me emen èwê ya, kubọk senesene mun̄ ewuuk. 15 Mgbọ ebi Ijeren emun̄be inu ya, ema kperiọọn̄ inu îrebe. Ema ebebene ikidido lek kiban̄ ibe, “Ìre keke ke îre?”
Mosis ofọfọọk ema ibe, “Îre inorie Okumugwem onyibe enyi ibe enyi erie. 16 Ire, ìgban̄ Ikan Okumugwem onyibe enyi. Ene geelek iteen̄ eyi môjotbe iko ge, òrere inu ene ge môkọtbe irie isan̄a. Ìteen̄ ìso otutuuk ene. Ene geelek iteen̄ eyi môsobe otutuuk ebi ìluk me uwu kan̄.”
17 Ebi Ijeren erọrọ ike Mosis otemebe ema. Usini ene eteteen̄ iwa, usini ene eteteen̄ sọntiik. 18 Ire, mgbọ ema esabe iko itọ, ema emumun̄ ibe ke ebi ìteteen̄ iwa kpekaan̄ iwa igak eyi òboso ema, ebi ìteteen̄ sọntiik si kpekaan̄ ise igak eyi òboso ema. Ene geelek ìteen̄ eyi òsoso ọmọ.
19 Mosis îtumu si inyi ema ibe, “Ene geege ikasik inorie ya geege ìwele egwe.” 20 Ire, usini kiban̄ enyenye ibot, kpegban̄ ikọ Mosis otumube. Ema esisik usini inorie ya iwele egwe. Mkput oninin̄ igak lek, ijọjọ, mè ikidun̄u olu. Mosis onanaan̄ ejit inyi ema.
21 Bene me mgbọ ya nyi isi, ewelegwe geelek, ene geelek ìkiteen̄ eyi òboso ọmọ me usen ya. Ura isinye, inorie ya îra itọk ita. 22 Me òso usen gweregwen ema eteteen̄ inorie eyi môsobe ema usen iba, òrere ene ge iko iba. Ebi ibot otoko ebi Ijeren enunu initumu inyi Mosis ibe ke ema mîrọ ubọk etemebe ema ibe erọ. 23 Mosis onenitumu inyi ema ibe, “Okumugwem ìnyi ida ibe ke iyakwut ìbore usen itap-efuuk, usen òkup mbuban isa inyi Okumugwem. Kpeberọ ikwaan̄ geege me usen ya. Eya orọ, inu geelek enyi eweekbe ikakala, ìkala. Geelek enyi eweekbe itetem, ìtem. Ire ikaan̄ eyi òsisik, ìsun̄ ìban ewelegwe iyakwut.”
24 Ema erọrọ ike Mosis otemebe ema, mè isun̄ usini iwele egwe. Me ofit iwele kan̄, geege ìkajọ ìdun̄u olu. Mkput si ìkanin̄. 25 Mosis onenitumu inyi ebi Ijeren ibe, “Ìrie eyi enyi esun̄be iwele chereyi, mije, chereyi ìre Usen Mbuban inyi Okumugwem. Enyi kpebemun̄ inorie yi geege me ijọn̄ iteen̄ chereyi. 26 Usen gweregwen ke enyi ebekiteen̄ inorie ya. Ire, me òso usen jaaba, eyi òrere Usen Mbuban, enyi kpebemun̄ geege.”
27 Ire, me òso usen jaaba ya, usini ebi Ijeren mîsibi ibesi iteen̄ inorie ya. Ire, kpemun̄ geege. 28 Okumugwem onenido Mosis ibe, “Ìre si re mgbọ owa ke enyi ebekijit irọrọ ikọ ntọbe, mè ikijit isusun̄ ikan n̄a? 29 Ìkpọ, Okumugwem înyi enyi Usen Mbuban ibe enyi esa esiki efuuk. Îre mije keya ke îkinyi enyi inorie òboso enyi usen iba me òso usen gweregwen. Me òso usen jaaba ya, ene geelek ìbokup me ere îkupbe. Ene geege ikatele ere îkupbe, mè ìsibi ìsi ofifi ere me òso usen jaaba.” 30 Eya orọ, ebi Ijeren etatap efuuk me òso usen jaaba ya, kperọ ikwaan̄ geege.
31 Ebi Ijeren egwen inorie ya mana.a Mana ya ìtatana okuket, mè ikup ibot kpiri kpiri kpiri kubọk ukwuuk uti kọrianda, mè ikitop kubọk akpakpa nchicha esabe aran̄ akwọọk igbaalek irọ. 32 Mosis onenitumu inyi ebi Ijeren ibe, “Okumugwem ìbe enyi etọ inorie ya iko ge esan̄a esun̄, inyi nsabọn kinyi me ukot geelek enu enemun̄ inorie ọmọ Okumugwem osabe ikpukpo enyi me emen èwê me mgbọ ọmọ osan̄abe enyi isibi me Ijipiti.”
33 Mije keya, Mosis otutumu inyi Erọn ibe, “Tọ iko mana yi ge tap me emen gwun̄ ugọn̄ ge, mè ben yik me isi Okumugwem, inyi ebi ukot geelek òkinu me isi enemun̄.”
34 Erọn orọrọ ike Okumugwem onyibe Mosis ida. Ike mgbọ okije, ibeben gwun̄ ugọn̄ mana ya isi iyik me emen okop inyan̄a-ibot, inyi ikup me ere keya. 35 Ebi Ijeren erie mana me emen èwê otuuk kè akọp acha ini, mege ire mgbọ ema erebe inyọn̄ ijọn̄ ere ebi ene elukbe. Ema erie mana mege ema erebe oke ijọn̄ Kenan.
36 Me ubọk itọ-inu kiban̄, îre akọp iko okijot ogbokot itọ inu ge.