Mun̄ îsibi me lek ewuuk
17
Otutuuk ido ebi Ijeren enenijibi inan̄a me emen èwê Sin, mè ikije ije kiban̄ inyi isi, inan̄a me ere ge isi ofifi ere, kubọk Okumugwem onyibe ema ida, mè inire ere ekigwen Refidim. Ire, ema kpemun̄ mudim inwọ me Refidim ya. 2 Eya orọ, ema etoto ibaak me lek kè Mosis, mè ikigana inyi ọmọ ibe, “Ìnyi eji mudim enwọ.”Mosis ofọfọọk ema ibe, “Ìre keke orọ enyi ekiben ibaak igọọk emi? Sà ìre keke orọ enyi ekitọ Okumugwem ikpọ?” 3 Ire, ebek mun̄ îrak ema enenen me ere ya. Ema ekekinunuun̄, mè ikitumu inyi Mosis ibe, “Ìre keke orọ okpulube eji mè bọn kiji mè anam kiji inan̄a isibi me Ijipiti ibosa inikpan̄ isan̄a mije urak-ebek mun̄?”
4 Mosis onenito ito inyi Okumugwem ibe, “Ìre m̀barọrọ melek ife chi? Ìsik sọnja mêteen̄be ewuuk itọbọ emi ikpan̄.”
5 Okumugwem ofọfọọk Mosis ibe, “Je raka fo agan̄ isi ebi Ijeren, mè gwen usini ebi ugane Ijeren gbaalek kwun̄. Mọnọ mkpat kwun̄ ya, eyi osabe isulu mun̄ okwaan̄ Nali ya kaan̄ me ubọk, mè ìje ìnyi isi. 6 Kpọ, emi mâkeke me isi kwun̄ me inyọn̄ ewuuk òkup me agba lek ogoon̄ Orebu. Sa mkpat kwun̄ sulu ewuuk ya, ke mun̄ môgbuk isibi me lek ewuuk ya, inyi ebi Ijeren enwọ.” Mosis orọrọ si ike Okumugwem otemebe ọmọ me isi otutuuk ebi ugane Ijeren. 7 Ema enyinyi ere ya erieen̄, Masaa mè Meriba,b mije, ebi Ijeren mîbaak ibaak me lek kè Mosis, mè ido Okumugwem erieen̄ ibe, “Ìre Okumugwem òwa me etete kiji mọnọ, sà ìre kpunu?”
Ebi Ijeren mîtim akọn̄ ikpan̄ ebi Amalek
8 Ebi Amalek eninijibi akọn̄ inu me lek ebi Ijeren me Refidim. 9 Mosis onenitumu inyi Josuwa ibe, “Gobo ene me etete ebi kiji sa si tim akọn̄ me lek ebi Amalek. Iyakwut, emi mâkeke me inyọn̄ ibot orioon̄ yi, mè ikaan̄ mkpat Awaji me ubọk.”
10 Josuwa ogogobo ebi ene isa isibi isi itim akọn̄ me lek ebi Amalek, ike Mosis onyibe ọmọ ida. Mosis mè Erọn mè Uru enenene ifo inyọn̄ ibot orioon̄ òkup me ere ya. 11 Mosis obebene ubọk kan̄ mè mkpat ya me ubọk ifo inyọn̄. Ubọk kè Mosis isibene ifo inyọn̄, ebi Ijeren mîra ikitim ikpan̄ ebi Amalek. Mosis isisiki ubọk kan̄ me ijọn̄, ebi Amalek mîra ikitim ikpan̄ ebi Ijeren. 12 Ìkafiin̄, ubọk kè Mosis owọwọ. Erọn mè Uru ebeben ewuuk ge ito inyi Mosis isiki ikweek. Erọn mè Uru erarak ubọk kan̄ ibene, ene ge me agan̄ ge, ene ge me agan̄ ge. Ikeya ke ubọk kè Mosis obene ikeke ifo inyọn̄ mege ire mgbọ ura onimbe. 13 Sa me ikeyi, Josuwa otitim akọn̄ ikpan̄ ebi Amalek.
14 Okumugwem onenitumu inyi Mosis ibe, “Ge inu yi òrọrọ tap me ikpa, inyi mêkisa ikeek ntim-mkpan̄ keyi, mè fuk sibi nyi Josuwa inọ. Mije, m̀kpalọlọ ijijijaka ebi Amalek isan̄a kpai, inyi inu geege ikayaka ìsik, eyi ebi ene ebesa ikikeek ema me otutuuk linyọn̄ keyi.”