2 Me ere ya, ebi Ijeren kpemun̄ mudim inwọ. Mije keya, ema egbagbaan̄ ititiin̄, mè ikigugọlọ melek kè Mosis mè Erọn, 3 mè ito ibaak me lek kè Mosis, mè ikitumu ibe, “Kpan̄asi ikeyi, mebe otutuuk kiji mîgọọk ebi ngwan̄ kiji ikwaan̄ isan̄a isi ge me mgbọ ema ekwaan̄be me isi Okumugwem, eya kè ònwọn. 4 Tumu-nu! Ìre keke orọ enyi ekpulube eji ebi eyi Okumugwem isa inigwook me emen èwê keyi, ibe eji enekwaan̄ esan̄a, eji melek anam kiji? 5 Sà ìre bak me lek keke ke enyi ekpulu eji inan̄a me Ijipiti isibi isa inigwook me ijo ere òkup ikeyi? Kpunu kubọk akpa geege, kpunu mfut figi, mè mfut gerep, kpukpunu si mfut pomegaranet. Ukpọk ukpọk lek mudim ebenwọ, kpunu!”

6 Mosis mè Erọn enanan̄a me etete ebi ife cha ije inu me isotu Atanga Chinichini, mè inan̄a irọn̄ me ijọn̄, mè ikana isi ichit. Mgbọ yaage, ujamgbugbo Okumugwem okakana isibi me isi kiban̄. 7 Okumugwem otutumu inyi Mosis ibe, 8 “Mọnọ mkpat kwun̄ ya kaan̄ me ubọk. Owu melek ngwan̄ kwun̄ Erọn, ìgwen otutuuk ebi Ijeren ìtitiin̄. Ìkup me isi kiban̄ otutuuk ìtumu ikọ ìnyi ewuuk yi, ke mudim mônan̄a me emen ewuuk yi igbuk isibi. Sa me ikeyi, owu môsan̄a mudim me lek ewuuk isibi inyi otutuuk ebi ido Ijeren enwọ, ema melek anam kiban̄.”

9 Mosis onenisi imọnọ mkpat kan̄ òkup me isi okop inyan̄a-ibot me isi Okumugwem ikaan̄ me ubọk, kubọk Okumugwem onyibe ọmọ ida. 10 Ọmọ mè Erọn enenigwen otutuuk ebi ene ititiin̄ me agba lek ewuuk ya. Mosis onenitumu inyi ema ibe, “Ìgban̄, enyi ife unye-ibot kechi. Ìre mudim môkọt inan̄a me lek ewuuk yi igbuk isibi inyi enyi njei?” 11 Mosis obebene ubọk, mè isa mkpat ya isulu ewuuk ya mgbọ iba. Mudim onanan̄a me emen ewuuk ya ikigbuk isibi. Otutuuk ebi ido Ijeren melek anam kiban̄ enwọnwọ.

12 Ire, Okumugwem otutumu inyi Mosis mè Erọn ibe, “Mije enyi kpetoon̄ emi ejit me lek, enyi kpesun̄ si emi me mbuban me isi otutuuk ebi Ijeren, enyi kpebesa ebi ife chi isi itap me inyọn̄ ijọn̄ ya nnyibe ema.” 13 Ekigwen ere mun̄ yi Meriba,^a mije, îre me ere keyi ke ebi Ijeren egugọlọ melek Okumugwem, Okumugwem si ojejeen̄ lek kan̄ me etete kiban̄ kubọk ogwu òkup mbuban.

14 Mosis onenikup me Kades iria osat ibe esi elook ogwu ubọọn̄ ido Edọm etip ibe,

“Eji ebi ngwan̄ kinyi ebi Ijeren ekilook enyi ibe: Enyi mîriọọn̄ otutuuk uga ujaralek eji ejebe itibi me ugwem kiji. 15 Ebi nte nte kiji enan̄a ije isi Ijipiti isi iluk ibia owuwa acha mege eji esibibe inimun̄. Ebi Ijipiti erọrọ ebi nte nte kiji melek kiji nnaan̄. 16 Eji etataan̄ ukpo ito ito inyi Okumugwem, inọnọ ida ito kiji, mè iria ogwu osat kan̄ ijet eji. Ogwu osat ya onenitaba eji inan̄a me Ijipiti isibi.

“Mgbọ keyi, eji mîje inire Kades me okike otubọk ijọn̄ ido kinyi. 17 Soso, tele mè eji eneje eraka me inyọn̄ ijọn̄ ido kwun̄ esi ere eji ebesi. Eji kpebeje itibi emen uko geege, kpebelọ ukot ije inin̄ emen uko gerep geege. Eji kpebegba otu udọn̄ mun̄ geege ichibi mun̄ inwọ. Eji ebetetet isi kiji itat me lek uga oniin̄ ogwu ubọọn̄ gaalek. Eji kpebegwaka inin̄ agan̄ ulom mè ìre agan̄ ujit, mege eji mêjebe itibi iraka ido kinyi.”

18 Ire, ebi Edọm efọfọọk ema ibe, “Ikaje ìtibi ìraka me inyọn̄ ijọn̄ kiji. Ire enyi itọ ikpọ, eji mêjibi akọn̄ inichichini enyi.”

19 Ebi Ijeren efọfọọk ema ibe, “Eji ebeje iraka me uga ejit oniin̄ gaalek. Ire eji mè ìre anam kiji inwọ mudim kinyi, eji mêkpe ewe inyi enyi. Eji ebeje ukot ukot gaalek iraka me inyọn̄ ijọn̄ kinyi. Ìkakaan̄ ofifi inu eji eberọ.”

20 Ebi Edọm ekpọkpọk itumu inyi ebi Ijeren ibe, “Ikaje ìraka me inyọn̄ ijọn̄ kiji.” Ebi akọn̄ Edọm enenigbọọk isibi me unye, melek nroon̄ akọn̄ kiban̄, ibesi ichichini ebi Ijeren. 21 Mije ebi Edọm kpechieek ibe ebi Ijeren eje eraka me inyọn̄ ijọn̄ kiban̄, ebi Ijeren egwugwu ikom, mè itele oniin̄ keya.

22 Otutuuk ebi Ijeren enenijibi ije ije inan̄a me Kades, mè ije inire lek ogoon̄ Ôru. 23 Ogoon̄ yi ìkup me agba lek okike ijọn̄ ebi Edọm. Me lek ogoon̄ ya, Okumugwem onenitumu inyi Mosis mè Erọn ibe, 24 “Erọn môkwu ifo igọọk ebi nte nte kan̄. Ọmọ ìkpogọọk inin̄ inyọn̄ ijọn̄ ya nsabe inyi ebi Ijeren, mije, enyi ene iba mîkpaka ibot, mè ijit irọrọ ida n̄a òfo me lek mudim Meriba. 25 Gwen Erọn melek Elieja ogwu gwun̄ enerieen̄ gbaalek sa je nene inyọn̄ ogoon̄ Ôru. 26 Me inyọn̄ ogoon̄ ya, wọọk ofọnti ikwaan̄ san̄a me lek kè Erọn, mè kpulu tap Elieja ogwu gwun̄ enerieen̄. Erọn môkwu me inyọn̄ ogoon̄ ya.”

27 Mosis orọrọ ike Okumugwem onyibe ọmọ ida ibe irọ. Ema ejeje isi inene inyọn̄ ogoon̄ Ôru ya me isi otutuuk ebi Ijeren. 28 Mosis oneniwọọk ofọnti ikwaan̄ ngwugwa cha isan̄a me lek kè Erọn, mè ikpulu itap Elieja ogwu gwun̄ enerieen̄. Erọn okwukwu me inyọn̄ ogoon̄ ya. Mosis melek Elieja gaalek enenigwu ikom inan̄a me inyọn̄ ogoon̄ ya ije isibi ijọn̄. 29 Mgbọ ebi Ijeren eriọọn̄be ibe ke Erọn îkwu, ema etoto ito mije kè Erọn. Otutuuk ebi uwu kè Ijeren ekukup me ufieejit ototuuk akọp usen ita.