Mun̄ igwọk-lek
19
Okumugwem onenitumu inyi Mosis mè Erọn ibe, 2 “Eyi ìre orọmijọn̄ nteme eyi Okumugwem onyibe enyi ida ibe: Ìtumu ìnyi ebi Ijeren ibe etet eriembuuk araran̄ eyi kpunube ìroon̄ geege me lek, eyi kperarak isa isi ikwaan̄ geege me uko, 3 mè esa ejet Elieja ogwu ngwugwa. Mênenisa anam ya isibi ifo udun̄ ama, mè inigwu anam ya me isi kè Elieja. 4 Elieja ogwu ngwugwa mônenisa otubọk kan̄ ijiin̄ me emen eje anam ya, mè isa inyan mgbọ jaaba ikpọ agan̄ isi Atanga Chinichini ya. 5 Me isi kè Elieja ogwu ngwugwa, mênenitap ukan̄ iwọp ototuuk eriembuuk ya ikọọk, ibene me lek ikpa kan̄, mè ufuk kan̄, mè eje kan̄, ire lek okpu mè nkat kan̄. 6 Mgbọ ukan̄ ya okilomo, ogwu ngwugwa mômọnọ iye ilip, mè mbubet isop, mè inwọọn̄ anam òkup irio irio, mè ikpulu itọọn̄ igwook me lek anam ya me emen ukan̄. 7 Mgbọ eya isiraka, ogwu ngwugwa ya mônenigwọk ofọnti kan̄, mè iken mun̄. Isirọ isan̄a, mônenije inin̄ emen ama, mè ikaan̄ orieen̄ me lek mege ire ikakwun̄. 8 Ogwu òtatap ukan̄ iwọp eriembuuk ya si môgwọk ofọnti kan̄, mè iken si mun̄, mè ikaan̄ si orieen̄ me lek mege ire ikakwun̄.9 “Enerieen̄ ge ogwu ikakaan̄ge mbuban me lek, mônenichan ntọn̄ eriembuuk ya ititiin̄ isun̄ me udun̄ ama ya me ere ikakaan̄ge mbuban me lek. Ebi Ijeren mênenisun̄ ntọn̄ ya, mè ikikpọ chieen̄ me lek, mè ikisa irọ mun̄ igwọk-lek, eyi ema mêkisa igwọk lek kiban̄ mgbọ ema isirọ ijo inu. 10 Ogwu òchachan ntọn̄ eriembuuk ya ititiin̄ si môgwọk ofọnti kan̄, mè ikaan̄ si orieen̄ me lek mege ire ikakwun̄. Eyi môre ikan òbokup ire mgbọ geelek inyi ebi Ijeren melek otutuuk ebi ichen ìluk me etete kiban̄.
11 “Ene geelek òchachak ubọk me lek nkwukwu ebilene, môkaan̄ orieen̄ me lek usen jaaba. 12 Ene ya môgwọk lek kan̄ me òso usen ita, mè igwọk si me òso usen jaaba, sabum ìbotana. Ire ogwu ene ya ìkagwọk lek me òso usen ita mè òso usen jaaba, orieen̄ ìkpota ene ya me lek. 13 Ene geelek òchachak ubọk me lek nkwukwu ebilene, mè ìkagwọk lek, îre Atanga Okumugwem ke ene ya ochaka mbuban me lek. Ebesasan̄a ogwu òkup ikeya isan̄a me otu ifuk ebi Ijeren. Mije, ìkasa mun̄ igwọk-lek ya ìgbama lek kan̄. Ene ya ìkatana. Orieen̄ kan̄ îbia ọmọ me lek.
14 “Ire ene ikup me emen uwu ọfọ kan̄ ikwu, ene geelek òtitibi inin̄ emen uwu ọfọ ya îchaka mbuban. Ikeya si, ene geelek òkukup me emen uwu ọfọ ya îchaka si mbuban. Orieen̄ ìbokup ema me lek usen jaaba. 15 Ofifi si, inu itap-inu geelek òkup me emen uwu ọfọ ya, eyi kpechit otu ikam, mbuban îchaka me lek.
16 “Ene geelek òkup me oyet mè ìre emen oron, mè ichak ubọk me lek nkwukwu ene ogwu òkwu mkpa afa, mè iyaka ire mkpa ikike, mè ìre ìchak ubọk me lek ukwuuk ene ògọgọk, mè ìre lek udọn̄-ufuun̄, mbuban môchaka me lek ene ogwu òkup ikeya usen jaaba.
17 “Isibegwọk lek ogwu ene ya mbuban ochakabe me lek, mêgwọ ntọn̄ igwọk-lek ònan̄a me lek eriembuuk ya ewọpbe itaka ikọọk itap me emen ugọn̄, mè iben mudim igwook me lek. 18 Ene ge ogwu ìkakaan̄ mbuban me lek mônenimọnọ mbubet isop isa ijiin̄ me emen mun̄ ya, mè isa inyan igwook me lek uwu ọfọ ya, mè otutuuk inu geelek òkup me emen uwu ọfọ ya, mè inyan si me lek ebilene ebi ìkup me emen uwu ọfọ ya, mè inyan si me lek ogwu geelek òchachak ubọk me lek ukwuuk ene, mè ìre nkwukwu ogwu òkwu mkpa afa, mè ìre ogwu òkwu mkpa ikike, mè ìyaka ire udọn̄-ufuun̄. 19 Ogwu ikakaan̄ge mbuban me lek ya mônyan mun̄ igwọk-lek ya igwook me lek ogwu mbuban okupbe me lek me òso usen ita mè òso usen jaaba, mè isa me ikeya igwọk ene ya lek me òso usen jaaba ya. Ene ya mônenigwọk ofọnti kan̄, mè iken mun̄. Mbuban mônenita ọmọ me lek me ikakwun̄ usen ya. 20 Ire, ene geelek òchachaka mbuban, mè ìkagwọk lek, ebesasan̄a ogwu òkup ikeya isan̄a me etete ebi Ijeren, mije, îre Atanga Chinichini eyi Okumugwem ke îchaka mbuban me lek. Eyi kpenyan ọmọ mun̄ igwọk-lek me lek, orieen̄ òwa me lek kan̄. 21 Eyi ìre ikan òbokup inyi ema ire mgbọ geelek.
“Ogwu òkinyan mun̄ igwọk-lek ya môgwọk ofọnti kan̄. Ene geelek òchachak ubọk me lek mun̄ igwọk-lek ya, mbuban îchaka me lek mege ire ikakwun̄. 22 Inu geelek ogwu òkaan̄ mbuban me lek ochakbe ubọk me lek, mbuban îchaka me lek inu ya si. Ene geelek òchachak ubọk me lek inu ya, mbuban îchaka si me lek ene ya mege ire ikakwun̄ usen ya.”