3 Mosis oneninene ogoon̄ Saina ya isi lek Awaji. Okumugwem okukup me inyọn̄ ogoon̄ ya igwen Mosis, mè itumu inyi ibe, “Ikeyi ke obotumu inyi ebi Ijeren, bọn kè Jekọp. 4 ‘Enyi mîsa chieen̄ kinyi imun̄ inu nrọbe ebi Ijipiti, mè ibeen̄ enyi isibi me Ijipiti inyi lek n̄a, kubọk igo okiben ebi bọn me inyọn̄ uwop iwulu. 5 Me mgbọ yi, ire enyi igban̄ utọn̄ inyi emi, mè ikisun̄ otutuuk ikan inyan̄a-ibot n̄a, enyi mêre atalek ebi n̄a ìsisibi esese me etete otutuuk ido geelek. Mije, otutuuk linyọn̄ ìre eyi n̄a. 6 Sa me ikeya, enyi mêkana ama ubọọn̄ ebi ngwugwa isa inyi emi, mè ire si ido òkup mbuban isa inyi emi.’ Echichi ore inu owu môtumube inyi ebi Ijeren.”

7 Mosis oneninan̄a me inyọn̄ ogoon̄ ya isibi, mè inititiin̄ ebi ugane Ijeren, mè iben otutuuk ikọ Okumugwem otumube inyi ọmọ cha ito me isi kiban̄. 8 Otutuuk ebi Ijeren egbagbaan̄ ifọọk ibe, “Otutuuk inu geelek Okumugwem otumube, eji mêrọ.” Mosis onenisa ufọọk-otu kiban̄ igwu ikom isi ikpa inyi Okumugwem.

9 Okumugwem onenitumu inyi Mosis ibe, “Kpọ, emi mâje me emen oduku inyọn̄ òdudun inu me lek kwun̄, inyi ebi Ijeren enọ ida n̄a mgbọ mâkitumu ikọ melek kwun̄, melek si, inyi ema eketoon̄ owu ejit me lek mgbọ geelek.” Mosis oneniben otutuuk inu ebi Ijeren etumube ikpa inyi Okumugwem.

10 Okumugwem oneniyaka itumu inyi Mosis ibe, “Gwu kom si lek ebi Ijeren, mè tumu nyi ema ibe egwọk lek chereyi mè iyakwut, mè esun̄ lek kiban̄ me mbuban, mè egwọk ofọnti kiban̄. 11 Be ema ebem lek me òso usen ita ya, mije, emi Okumugwem mâgele isibi inu me òso usen ita ya, me inyọn̄ ogoon̄ Saina me isi otutuuk ebi Ijeren. 12 Tap oke kana ogoon̄ yi, inyi ema ekasaba ìraka, mè tumu nyi ema ibe, ‘Ìgbala chieen̄! Ene geege ikanene ogoon̄ yi ìraka oke ere keyi. Ene geege ikachak ubọk me oke ebon ogoon̄ yi. Ene geelek òchachak ubọk me lek ogoon̄ yi, ekpakpan̄. 13 Mè ìre ebilene mè ìre anam orọn̄ ikan ya, ekatele ibe igat ugwem. Ekachak ubọk me lek, esa ewuuk etọbọ ekpan̄. Ilọ ewuuk, esa oraan̄ esook ekpan̄.’ Îtata otita iko anam isitaan̄ ida ujọn̄ọ ujọn̄ọ, mgbọ ya ke ema mêtolek inene inyọn̄ ogoon̄ ya.”

14 Mosis oneninan̄a me inyọn̄ ogoon̄ ya isibi, mè inen̄e ebi Ijeren isun̄, inyi ema ekup me mbuban. Ema egwọgwọk si ofọnti mè ekwut kiban̄. 15 Mosis otutumu inyi ema ibe, “Ìsa usen ita ìnen̄e lek kinyi ìsun̄. Ikaje ìgbet lek ebibaan̄.”

16 Me òso usen ita ya, me ewelegwe kan̄, isinyọn̄ okekisook, omumen inyọn̄ okekimumen, mè ikikebe. Oduku inyọn̄ okakana inyọn̄ ogoon̄ ya ichit ke bùk. Ida otita iko anam okekitaan̄ atalek unye unye. Otutuuk ebi Ijeren ekekiran mije ukpook me ere m̀gba-ǹgwele ukan̄ ya ema elukbe. 17 Mosis onenisa ebi Ijeren inan̄a me ere m̀gba-ǹgwele ukan̄ ya ije isibi isi ichichini Awaji. Ema ekekeke me ebon ogoon̄ ya.

18 Me ike mgbọ ya uga oduku îkana otutuuk ogoon̄ Saina ya ichit, mije Okumugwem ogelebe isiki inu me inyọn̄ ogoon̄ ya, mè ikisak kubọk ukan̄. Oduku ukan̄ ya okekiyak ifo inyọn̄ kubọk oduku òkinan̄a me okpot uti isibi. Otutuuk ogoon̄ ya okekisisik atalek unye unye. 19 Ida otita okekitaan̄, mè ikitaan̄ inye enenen. Mosis okekitumu ikọ inyi Awaji, Awaji okekibọkọ Mosis otu me ida òkitaan̄ kubọk isinyọn̄ òkisosook. 20 Okumugwem onenigele isibi inu me inyọn̄ ogoon̄ Saina, me inyọn̄ ibot ogoon̄ ya, mè igwen Mosis ibe inene inu me inyọn̄ ibot ogoon̄ ya. Mosis onenene igọọk. 21 Okumugwem onenitumu inyi Mosis ibe, “Sibi ijọn̄, si taba ebi Ijeren ubọk me utọn̄, inyi ekabum ìtibi ìsaba ìraka oke etapbe inyi ema, inyi ema enemun̄ Okumugwem. Mije, ire ema ilululuk irọ, ke owuwa kiban̄ mêkwaan̄ irurọn̄ọ. 22 Ikerere si ebi ngwugwa ebi ìkinu me isi Okumugwem, ema si ekalọlọ isusun̄ lek kiban̄ me mbuban. Ire ìkare ikeya, Okumugwem môkpọk ichit ema kubọk orukan̄ mkpa.”

23 Mosis otutumu inyi Okumugwem ibe, “Ife chi kpebekọt inene inu me inyọn̄ ogoon̄ Saina, mije, îre owu me lek kwun̄ otaba eji ubọk me utọn̄ ibe etap oke ekana lek ogoon̄ yi, mè esun̄ lek ogoon̄ yi me mbuban.”

24 Okumugwem onenifọọk Mosis ibe, “Sibi ijọn̄, mè si sa Erọn gbaalek kwun̄ nene na. Ire, ebi ngwugwa mè otutuuk ebi Ijeren geege ekasaba ìraka oke etapbe ya ìnu me lek Okumugwem. Ire ema ilululuk isaba iraka, Okumugwem môkpọk ichit ema kubọk orukan̄ mkpa.”

25 Mosis onanan̄a me inyọn̄ ogoon̄ ya isibi ijọn̄ inu me lek ebi Ijeren, mè initumu ikọ cha inyi ema.