Akọp Ikan
20
Awaji onenitumu otutuuk ikọ kechi ibe,2 “Emi nre Okumugwem Awaji kinyi, ogwu òsasan̄a enyi isibi me ido Ijipiti me irek usun̄.
3 Kakaan̄ ofifi awaji geege ìgbaalek n̄a.
4 Karọ mkpọmfaka geege ìnyi lek kwun̄, me mbet inu geelek òkup me isinyọn̄, mè ìre inu òkup me linyọn̄ keyi, mè ìre inu òkup me emen mun̄ me irak linyọn̄. 5 Katọbọ ebum ìnyi mkpọmfaka chi, kasi ikwaan̄ geege si ìnyi ema. Mije, emi, Okumugwem Awaji kinyi, emi ìre Awaji mba-ejit. Emi ǹkisa mkpukpe ijo inu ebi ute ikpe nsabọn kiban̄ ire lek ebi òso ukot ita mè òso ukot ini me uwu ebi ìchacha emi. 6 Ire me lek ebi ìmumun̄ emi me chieen̄ mè ikirọ inu nnyibe ida ibe erọ, ǹkikakaan̄ ata ejit me lek kiban̄ mè bọn kiban̄ mege ire òso obop ukot.
7 Kasa erieen̄ Okumugwem Awaji kinyi ìrọ inu ikagbege. Mije, Okumugwem ìkpolọlọ isusulu ene geelek òsasa erieen̄ kan̄ irọ inu ikagbege osusut.
8 Kikeek Usen Mbuban, inyi owu òkosun̄ usen ya me mbuban. 9 Usen gweregwen ke owu okaan̄ isasa irọ otutuuk ikwaan̄ kwun̄ geelek. 10 Ire, òso usen jaaba ya ìre Usen Mbuban isa inyi Okumugwem Awaji kinyi. Owu òkaborọ ikwaan̄ geege me usen ya, owu mè bọn ebirieen̄ kwun̄, mè bọn ebibaan̄ kwun̄, mè ebi usun̄ kwun̄ ebirieen̄ mè ebibaan̄, mè anam kwun̄, mè ogwu ichen geelek òluk melek kwun̄. 11 Mije, îre usen gweregwen ke Okumugwem osa irom inyọn̄ mè ijọn̄ mè okwaan̄ mè otutuuk inu geelek òkup me emen kiban̄, mè itap efuuk me òso usen jaaba. Mije keya ke Okumugwem ogbana Usen Mbuban ya, mè irọ inyi ikup me mbuban.
12 Kilibi nte kwun̄ mè nga kwun̄, inyi usen ugwem kwun̄ ijọn̄ọ me inyọn̄ ijọn̄ eyi Okumugwem Awaji kinyi obonyi enyi.
13 Kakpan̄ ene.
14 Kagan nwa ene.
15 Kachiin̄ inọ.
16 Kakeke ata-ikọ ataak ìkeme ogwu melek kwun̄.
17 Kakaan̄ ijo ulọk me lek uwu ogwu melek kwun̄. Kakaan̄ ijo ulọk me lek nwa ogwu melek kwun̄, mè ebi usun̄ kan̄ ebirieen̄ mè ebibaan̄, mè orie eriembuuk kan̄, mè inyinya akpan kan̄, mè inu geelek ogwu melek kwun̄ okaan̄be.”
18 Mgbọ otutuuk ebi Ijeren emun̄be ike isinyọn̄ okimumen mè ikisook, mè inọ ida otita ya okitaan̄, mè imun̄ si oduku okanabe ichit ogoon̄ Saina bùk, ukpook otetet ema enenen. Ema ekekiran, mè ida lek ibọkọ isi ikeke me ujọn̄ọ ere. 19 Ema etutumu inyi Mosis ibe, “Owu me lek kwun̄ tumu ikọ nyi eji, ke eji mênọ. Awaji ikayaka ìtumu ikọ ìnyi eji, inyi eji ekakwaan̄ ìta.”
20 Mosis onenifọọk ema ibe, “Ikayaka ìtet ukpook. Awaji ìnu ineniroon̄ enyi ikpọ, mè ijeen̄ enyi unye kan̄, inyi enyi eketet ukpook kan̄, mè ekayaka ìkirọ ijo inu.”
21 Ebi Ijeren ekekeke me ujọn̄ọ ere. Ire, Mosis ojeje igbet emen ekpuk udun ya ere Awaji okupbe.
Ikan ofolek mkpọmfaka mè ntook ngwugwa
22 Okumugwem onenitumu inyi Mosis ibe itumu inyi ebi Ijeren ibe, “Enyi me lek kinyi mîmun̄ ibe ke ǹkup me emen inyọn̄ ikitumu ikọ inyi enyi. 23 Eya orọ, ikarom awaji geege ìsa ìgbaalek n̄a. Ikarom awaji eyi alata okuket mè ìre eyi alata araran̄ ìnyi lek kinyi.
24 “Ìsa ntitaak ijọn̄ ìnama ntook ngwugwa ìnyi emi. Me inyọn̄ ntook ya ke enyi ebekigwa ngwugwa ewọwọp iriọk mè ngwugwa esuuk, echi enyi mêkisa arọọn̄ kinyi mè eriembuuk kinyi igwa. Ere geelek mârọbe inu isasa ikeek erieen̄ n̄a, ere ya ke mâchichini melek kinyi, mè igbana enyi. 25 Ire enyi ibesa ewuuk inama ntook inyi emi, ikasa ewuuk eyi enyi ebubum ìnama ntook ya. Mije, mbuban îchaka me lek ewuuk geelek esabe okwukwut ibum. 26 Ikaje me lek otitop ìnene inyọn̄ ntook ya, inyi ene ikakup me irak ìbene chieen̄ ìmọọn̄ njak kinyi mgbọ enyi mêkinene.”