Akọp Ikan
5
Mosis onenititiin̄ otutuuk ebi Ijeren, mè initumu inyi ema ibe,“Enyi ebi Ijeren, ìgban̄ utọn̄, mè ìnọ orọmijọn̄ mè ikan chi echi emi nkitan̄a itap enyi me utọn̄ cherekeyi. Ìkween̄ ema, mè ìgbala chieen̄ ìkisun̄ ema. 2 Îre eji ke Okumugwem Awaji kiji onyan̄a ibot inyi me lek ogoon̄ Orebu. 3 Ìkare ebi nte nte kiji ukot ikaan̄ ke Okumugwem onyan̄a ibot yi inyi. Îre eji ke înyan̄a ibot inyi. Ìnyan̄a ibot inyi otutuuk kiji ebi ìkup me ògat ugwem chereyi. 4 Isi mè isi ke Okumugwem okup me emen ukan̄ ikitumu ikọ melek kinyi. 5 Me mgbọ ya, emi ǹkekeke me etete Okumugwem melek kinyi, ikibọkọ ikọ me otu Okumugwem isa ikitumu inyi enyi. Mije, enyi kpekọt inene inyọn̄ ogoon̄ ya, bak me lek ufieek-owot ukan̄ ya. Okumugwem ìtumu inyi enyi ibe ikeyi:
6 ‘Emi nre Okumugwem Awaji kinyi, ogwu òsasan̄a enyi isibi me ido Ijipiti, mè irek usun̄.
7 Kakaan̄ ofifi awaji geege ìgbaalek n̄a.
8 Karọ mkpọmfaka geege ìnyi lek kwun̄, me mbet inu geelek òkup me isinyọn̄, mè ìre inu òkup me linyọn̄ keyi, mè ìre inu òkup me emen mun̄ me irak linyọn̄. 9 Katọbọ ebum ìnyi mkpọmfaka chi, kasi ikwaan̄ geege si ìnyi ema. Mije, emi, Okumugwem Awaji kinyi, emi ìre Awaji mba-ejit. Emi ǹkisa mkpukpe ijo inu ebi ute inikpe nsabọn kiban̄ ire lek ebi òso ukot ita mè ukot ini, me lek kiban̄ ebi ìchacha emi. 10 Ire me lek ebi ìmumun̄ emi me chieen̄ mè ikirọ inu nnyibe ida ibe erọ, ǹkikakaan̄ ata ejit me lek kiban̄ mè bọn kiban̄ mege ire òso obop ukot.
11 Kasa erieen̄ Okumugwem Awaji kinyi ìrọ inu ikagbege. Mije, Okumugwem ìkpolọlọ isusulu ene geelek òsasa erieen̄ kan̄ irọ inu ikagbege osusut.
12 Kisun̄ Usen Mbuban, mè kisun̄ usen ya me mbuban, kubọk Okumugwem Awaji kinyi onyibe ida. 13 Usen gweregwen ke owu okaan̄ isasa irọ ikwaan̄ kwun̄ geelek. 14 Ire, òso usen jaaba ìre Usen Mbuban isa inyi Okumugwem Awaji kinyi. Owu òkaborọ ikwaan̄ geege me usen ya, owu mè bọn ebirieen̄ kwun̄ mè bọn ebibaan̄ kwun̄, mè ebi usun̄ kwun̄ ebirieen̄ mè ebibaan̄, mè orie eriembuuk kwun̄, mè inyinya akpan kwun̄, mè otutuuk anam kwun̄ geelek, mè ogwu ichen geelek òluk melek kwun̄, inyi ebi usun̄ kwun̄ ebirieen̄ mè ebibaan̄, esiki efuuk kubọk owu okirọ. 15 Keek ibe ke îkaan̄ mgbọ owu orebe usun̄ me ido Ijipiti. Okumugwem Awaji kwun̄ onenisa me unye ubọk melek ikpele unye kan̄ itaba owu isibi me Ijipiti. Îre mije keyi ke Okumugwem Awaji kinyi otọ ibe enyi ekesun̄ Usen Mbuban.
16 Kilibi nte kwun̄ mè nga kwun̄, ike Okumugwem Awaji kwun̄ onyibe owu ida, inyi usen ugwem kwun̄ ijọn̄ọ, mè inu ije ijaan̄ me lek kwun̄ me inyọn̄ ijọn̄ Okumugwem Awaji kinyi obonyi enyi.
17 Kakpan̄ ene.
18 Kagan nwa ene.
19 Kachiin̄ inọ.
20 Kakeke ata-ikọ ataak ìkeme ogwu melek kwun̄.
21 Kakaan̄ ijo ulọk me lek nwa ogwu melek kwun̄. Kakaan̄ chieen̄ ile me lek uwu ogwu melek kwun̄, mè lek ijọn̄ uko kan̄, mè lek usun̄ kan̄ enerieen̄, mè usun̄ kan̄ enenwaan̄. Kakaan̄ si chieen̄ ile me lek orie eriembuuk kan̄, mè ìre inyinya akpan kan̄, mè ìyaka ire me lek otutuuk inu geelek ogwu melek kwun̄ okaan̄be.’
22 “Echichi ore inu Okumugwem otumube inyi enyi, mgbọ enyi etitiin̄be me ebon ogoon̄ ya. Okumugwem ìkup me emen ukan̄ mè oduku inyọn̄ mè emen ekpuk udun ikisa ikpele ida ikitumu ikọ chi inyi enyi. Ìkasọkọ inu geege me lek ìgak ikeyi. Ìgege ikan chi me inyọn̄ akpakpa ewuuk iba, mè inisa ewuuk cha inyi emi.
23 “Mgbọ enyi enọbe ida ya okitaan̄ inan̄a me emen udun ya, mè imun̄ si ike ukan̄ okibumu me inyọn̄ ogoon̄ ya, otutuuk ebi ibot otoko kinyi geelek mè ebi ugane kinyi enunu me lek n̄a, 24 mè initumu inyi emi ibe, ‘Kpọ, Okumugwem Awaji kiji îra ijeen̄ eji ujamgbugbo kan̄, mè umin ubọọn̄ kan̄, eji mînọ si ida kan̄ okitaan̄ me emen ukan̄. Cherekeyi, eji mîmun̄ ibe ke Okumugwem ìkekitumu ikọ melek ene, mè ene ya ògat ugwem. 25 Mgbọ yi, ìjeje itat ibe eji ekwaan̄ esan̄a? Ukan̄ ile yi môtaka eji ikpan̄ isan̄a, ire eji ikeke igak ikeyi ikinọ ida Okumugwem Awaji kiji. 26 Ìre ekene ene òkup me anam akpalek ikike orak inọ ida Awaji òkup me ugwem otumube ikọ me ejit ukan̄, kubọk eji enọbe, mè ikpọk igat ugwem? 27 Owu je gbet, mè si gban̄ otutuuk inu Okumugwem Awaji kiji okitumu, mè sa inu geelek îtumube inyi owu na tumu nyi eji, ke eji mênọ, mè irọ.’
28 “Okumugwem onọnọ inu ya enyi etumube inyi emi, mè initumu inyi emi ibe, ‘Nra inọ inu ife chi etumube inyi owu. Otutuuk inu ema etumube înwọn. 29 Jei, mebe ke ema mêkikaan̄ ejit òkup ikeyi mgbọ geelek, mè ikitet ukpook me lek n̄a, mè ikirọ otutuuk ikọ geelek nkitọ ibe ema erọ, eya kè ònwọn, inyi inu môkije ijaan̄ me lek kiban̄, mè ije ijaan̄ si me lek bọn kiban̄ ire mgbọ geelek! 30 Si tumu nyi ema ibe egwu ekom efon uwu ọfọ kiban̄. 31 Ire, owu kup me ere keyi melek n̄a, inyi mânyi owu otutuuk ikọ ntọbe, mè orọmijọn̄, mè ikan n̄a, inyi owu môsa isi ijeen̄ ema, inyi ema mêkirọ mgbọ ema isire inyọn̄ ijọn̄ ya eyi emi mbanyi ema, inyi inire eyi kiban̄.’
32 “Eya orọ, ìgbala chieen̄, mè ìrọ inu geelek Okumugwem Awaji kinyi onyibe ida ibe enyi erọ. Ikatele inu cha geege, mè ìsi ìrọ ofifi inu. 33 Ìluk ugwem ìkpọ me lek otutuuk oniin̄ Okumugwem Awaji kinyi onyibe enyi ida ibe enyi eluk, inyi enyi efuk ugwem, mè inu inwọn inyi enyi otutuuk usen geelek enyi ebeluk me inyọn̄ ijọn̄ ya eyi enyi ebebọkọ isak.