3 “Enyi otutuuk mîsa chieen̄ kinyi imun̄ inu Okumugwem orọbe òfo me lek Baali ebi Peyọ. Enyi mîmun̄ ubọk Okumugwem Awaji kinyi okpan̄be otutuuk ebi ìtọtọbọ ebum inyi Baali ebi Peyọ isan̄a me etete kinyi. 4 Ire, ebi geelek ìtetet Okumugwem Awaji kinyi inye, ebiba me ugwem chereyi.

5 “Ìkpọ, nra inyi enyi orọmijọn̄ chi mè ikan chi, kubọk Okumugwem Awaji n̄a onyibe emi ida, inyi enyi ekesun̄ me mgbọ enyi isinin̄ inyọn̄ ijọn̄ ya eyi enyi ebekaan̄ me ìrot. 6 Ìgwuun̄ chieen̄ ìkisun̄ ikan chi, mije, isusun̄ ikan chi obokijeen̄ ebi ofifi ido ibe ke enyi mîkaan̄ iriọọn̄-inu, mè ikaan̄ si ngobo-ntet. Ema isikinọ inu ofolek ikan chi, ema mênenikibe, ‘Me atikọ, ebi ikpele ido keyi mîkaan̄ iriọọn̄-inu, mè ikaan̄ si ifuk-ibot.’ 7 Ìfat ìkpọ-nu! Ìre kpasi ofifi ikpele ido okaan̄ awaji òkukup igbet ema lek ike Okumugwem Awaji kiji okupbe igbet eji lek, mè ikinọ eji ida mgbọ geelek eji eriaakbe uriaak igwen ọmọ? 8 Ìre kpasi ofifi ikpele ido okaan̄ orọmijọn̄ mè ikan echi unen oyerebet mè ata irọrọ kubọk ikan kechi echi emi nkinyi enyi chereyi?

9 “Gaalek, ìkigwuun̄ chieen̄, mè ìkitap chieen̄ ìkpọ emen ugwem kinyi, inyi enyi ekawuuk inu cha enyi esabe chieen̄ kinyi imun̄. Ìtet inu cha ìkaan̄ me ejit otutuuk usen ugwem kinyi, mè ìkijeen̄ bọn kinyi mè bọn bọn kinyi inu cha. 10 Ìkeek usen ya enyi ekekebe me isi Okumugwem Awaji kinyi me ogoon̄ Orebu, mgbọ Okumugwem otumube inyi emi ibe, ‘Titiin̄ otutuuk ife chi me isi n̄a, inyi ema enenọ ikọ n̄a, mè ekween̄ ubọk ebekilibi emi me otutuuk usen ugwem kiban̄ me inyọn̄ ijọn̄ ya ema ebesi iluk, mè ejeen̄ si nsabọn kiban̄, inyi ekerọ si ikeya.’ 11 Me usen ya, enyi mîje igbet, mè inikeke me ebon ogoon̄ ya. Ukan̄ okekisak me inyọn̄ ogoon̄ ya, mè ikisook ifo akpabin inyọn̄. Oduku inyọn̄ oduduku ichit ere, uga udun ogogon ere ichit ke bùk. 12 Okumugwem onenikup me emen ukan̄ ya ikitumu ikọ inyi enyi. Enyi ekekinọ, ire, enyi kpemun̄ ọmọ. Ida ida gaalek okitaan̄! 13 Inenitumu inyan̄a-ibot kan̄ inyi enyi, òrere Akọp Ikan cha, echi înyibe enyi ida ibe enyi ekesun̄, mè inige ikan cha me inyọn̄ akpakpa ewuuk iba inyi enyi. 14 Okumugwem oneninyi emi ida, me ike mgbọ ya, ibe emi ǹjeen̄ enyi otutuuk orọmijọn̄ kan̄ mè ikan kan̄, inyi enyi ekesun̄ me inyọn̄ ijọn̄ ya eyi enyi ebesaba inin̄ isi ibọkọ isak.

15 “Me usen ya Okumugwem okupbe me emen ukan̄ ikitumu ikọ melek kinyi me inyọn̄ ogoon̄ Orebu, enyi kpesa chieen̄ imun̄ ọmọ. Eya orọ, ìgbala chieen̄ ìkpọ ugwem kinyi, 16 inyi enyi ekafiat lek kinyi, mè ìsi ìrọ mkpọmfaka ìnyi lek kinyi me mbet inu geelek, mè ìre mbet enerieen̄ mè ìyaka ire mbet enenwaan̄, 17 mè ìre mbet anam geelek òkup me linyọn̄, mè ìyaka ire mbet unọn òwulu me inyọn̄ geelek, 18 mè ìre mbet inu geelek òkinyinyọnọ me ijọn̄, mè ìyaka ire mbet irin̄ geelek òkup me okwaan̄. 19 Mgbọ enyi isibene chieen̄ ikpọ isinyọn̄, mè imun̄ ura mè onyan̄ mè ntoronyan̄, òrere otutuuk urum inu òkup me akpabin inyọn̄, ìgbala si chieen̄, inyi inu chi ikaleke enyi, mè enyi eketọbọ ebum enyi ema. Ema ìre inu Okumugwem osun̄be ibe ekesi ikwaan̄ enyi otutuuk ido geelek me linyọn̄. 20 Ire me lek kinyi, Okumugwem ìsasa me unye itaba enyi isibi me Ijipiti, me emen ukan̄ òkikala okwukwut, inyi enyi enekana ebi kan̄ me ìrot, kubọk enyi erebe mgbọ keyi.

21 “Mije kinyi, Okumugwem înaan̄ ejit inyi emi, mè inyan̄a ibot ibe ke emi m̀kpasaba okwaan̄ Jodan inin̄ ata ijọn̄ ya, eyi ọmọ Okumugwem Awaji kinyi obosa inyi enyi me ìrot. 22 Emi mâkwu me inyọn̄ ijọn̄ keyi, m̀kpasaba okwaan̄ Jodan. Ire, eyi kinyi, enyi mênisaba okwaan̄ Jodan, mè isi ibọkọ ata ijọn̄ ya me ìrot. 23 Ìgbala chieen̄, inyi enyi ekawuuk inyan̄a-ibot eyi Okumugwem Awaji kinyi onyan̄abe melek kinyi, mè ìsi ìrọ mkpọmfaka geege ìnyi lek kinyi me mbet inu geelek, kubọk Okumugwem Awaji kinyi ogbanbe enyi. 24 Ìriọọn̄ ibe ke Okumugwem Awaji kinyi ìre ukan̄ òkitaka inu geelek iriọk, mè ire si Awaji mba-ejit.

25 “Enyi isiluk ijọn̄ọ mgbọ me inyọn̄ ijọn̄ ya, mè ikaan̄ bọn mè bọn bọn, ikafiat lek kinyi, mè ìrọ mkpọmfaka ìnyi lek kinyi me mbet inu geelek, mè ìsa me ikeya ìrọ ijo inu me isi Okumugwem Awaji kinyi, eyi môrọbe ibe ọmọ inaan̄ ejit. 26 Ǹkigwen inyọn̄ mè ijọn̄ me ata-ikọ ikeme enyi cherekeyi, ibe ire enyi irọ, ke enyi ebechechep isan̄a dìp dìp me inyọn̄ ijọn̄ ya eyi enyi ebesaba okwaan̄ Jodan isi ibọkọ isak. Enyi kpebeluk ijọn̄ọ mgbọ me inyọn̄ ijọn̄ ya. Enyi ebekwakwaan̄ ita kpai. 27 Okumugwem ìboyiyiyala enyi isi itaak me etete ebi ofifi ife. Enyi ibot ene inen mè inen gaalek ebeyaka inisik me etete ebi ido ere Okumugwem oborieen̄ enyi isi itaak. 28 Me ere cha, enyi mênenikitọbọ ebum inyi awaji ebilene esabe ubọk kiban̄ irom, òrere awaji uti mè ewuuk echi kpekimọọn̄ inu, kpekinọ ikọ, kpekirie inu, kpekinọ si olu. 29 Enyi mênenikup me ere cha ikiweek Okumugwem Awaji kinyi. Ire enyi iweek ọmọ me otutuuk ejit kinyi mè otutuuk ibot ejit kinyi, enyi mêweek ọmọ imun̄. 30 Mgbọ enyi isikup me uga ufialek, mè otutuuk inu chi isinirọn̄ ikeme enyi, me mgburudun̄ mgbọ kan̄, enyi mênenigwu ikom ika inu me lek Okumugwem Awaji kinyi, mè inigban̄ utọn̄ me ida kan̄. 31 Mije, Okumugwem Awaji kinyi ìre Awaji ejit nsan, ìkpotele enyi, ìkpojijaka enyi. Ìkpowuuk si use îchieekbe ebi nte nte kinyi ukot ikaan̄, mè inyan̄a ibot inyi ema isa irọ use ya inye.

32 “Ìdido ìweek ìriọọn̄ inu ofolek ukot oka mgbọ òraraka cha, me akat kè akat sabum ukot kinyi, ibene me mgbọ Awaji orombe ene me linyọn̄. Ìbene me agan̄ ge me linyọn̄ ìdo ikeya ìsi ìre agan̄ keyilọ. Ìre îkaan̄ ikpele inu òmimin ikup ikeyi òrarak irọ me linyọn̄ keyi, sà ìre ebilene mîwuuk lek inọ inu òkup ikeyi? 33 Ìre îkaan̄ ebi ofifi ife ìrarak inọ ida Awaji otumube ikọ inan̄a me emen ukan̄, kubọk enyi enọbe, mè ikup si me ugwem, kpekwaan̄? 34 Sà ìre îkaan̄ awaji geege òrarak inu inimọnọ ido ge isibi me etete ofifi ido isa irọ eyi kan̄, sa me owuwa ufialek, mè nke nke inu ijejeen̄, mè owuwa uyeke uyeke ikwaan̄, mè akọn̄, mè unye ubọk, mè ikpele unye, mè owuwa esese ikpele inu ukpook, kubọk otutuuk inu Okumugwem Awaji kinyi orọbe me Ijipiti me chieen̄ kinyi? 35 Okumugwem ìrọ otutuuk inu chi ijeen̄ enyi, inyi enyi esa eriọọn̄ ibe ke Okumugwem ore Awaji, ke kpunu ofifi awaji ilọ me lek kan̄. 36 Îkup me emen inyọn̄ itumu ikọ inyi enyi, enyi enọnọ ida kan̄, mè ibọkọ nteme. Me linyọn̄, îjeen̄ enyi ikpele ukan̄ kan̄, enyi enọnọ ikọ kan̄ me emen ukan̄ ya. 37 Mije îmabe ebi nte nte kinyi ukot ikaan̄, igogobo enyi ebi owot iman kiban̄ inyi lek kan̄ mgbọ ukot kiban̄ orakabe, mè inisa me isi kan̄ mè ikpele unye kan̄ isan̄a enyi isibi me Ijipiti. 38 Me oniin̄ ije kinyi, ìlalap ebi owuwa ikpele ido ìnyenye lek enenen igak enyi isan̄a me isi kinyi, inyi ọmọ isa enyi initap me inyọn̄ ijọn̄ kiban̄, mè enyi ebọkọ ijọn̄ cha me ìrot, ike îkupbe si cherekeyi. 39 Eya orọ, ìriọọn̄ chereyi, mè ikawuuk ibe ke Okumugwem ore Awaji me emen inyọn̄ ere òbebene, mè ire si Awaji me linyọn̄ me agan̄ irak. Ofifi awaji ìkakup! 40 Ìkirọ orọmijọn̄ kan̄, mè ìkirọ otutuuk ikọ geelek îtọbe, echi emi me lek n̄a nnyibe enyi ida mgbọ keyi ibe enyi ekerọ, inyi inu inwọn melek kinyi, mè inwọn si melek bọn kinyi me mgbọ ukot kinyi isiraka. Sa me ikeya, enyi mêfuk ugwem me inyọn̄ ijọn̄ ya eyi Okumugwem Awaji kinyi obosa inyi enyi, ibe ikana eyi kinyi ire mgbọ geelek.”

41 Mosis onenisan̄a ama ile ita isun̄ esese me agan̄ mbum-ura okwaan̄ Jodan. 42 Ene geelek òkpakpan̄ ogwu melek kan̄ me mfat, me ìkagegen ibak, ìkawuwuuk lek ìre si ogwu ochicha ìnyi ogwu îkpan̄be ya, ene ya môkọt ilibi isi itap ibot me ama ge me lek ama ita cha, mè inwọnọ mkpa. 43 Ama ita cha ìre: Beseri òkup me lek òla ijọn̄ me emen èwê ìkup inyi ebi otoko kè Ruben. Ramot òkup me agan̄ Giliadi ìkup inyi ebi otoko kè Gadi, sà Golan òkup me agan̄ Basan okup inyi ebi otoko kè Manasi.

44 Echichi ore ikan Mosis osan̄abe isibi inyi ebi Ijeren. 45 Echichi ore ijejeen̄ mè orọmijọn̄ mè ikan echi Mosis onyibe ebi Ijeren mgbọ ema enan̄abe me Ijipiti isibi, 46 me mgbọ ema ekupbe me iteke òkup me agba lek Bet Peyọ, me agan̄ mbum-ura okwaan̄ Jodan, me inyọn̄ ijọn̄ kè Siyon ogwu ubọọn̄ Amọ òkiluk me Esibon, ogwu Mosis mè ebi Ijeren etimbe ikpan̄ me oniin̄ mgbọ ema enan̄abe me Ijipiti isibi. 47 Ema mîbọkọ ijọn̄ kan̄, mè ibọkọ si ijọn̄ kè Ôgu ogwu ubọọn̄ ido Basan. Ema ene iba chi ere ebi ubọọn̄ iba ebi Amọ, ebi ìluk me agan̄ mbum-ura okwaan̄ Jodan. 48 Ijọn̄ yi ìbene me Aroweri me agba iteke ijọn̄ okwaan̄ Anọn, mè isa ikeya isi ire lek ogoon̄ Siyon, òrere ogoon̄ Emọn, 49 mè isa ikeya iraka isi itet otutuuk iteke ijọn̄ Araba eyi òkup me mbum-ura okwaan̄ Jodan, mege isi ire lek okwaan̄ Araba, òrere okwaan̄ Uchi, me ebon ogoon̄ Pisiga.