2 “Ire etet ogwu inọ mgbọ îkibum inin̄ uwu, mè isulu, ikwukwu, eje kan̄ ìkatoon̄ me ibot ogwu òsusulu ikpan̄. 3 Ire, ire ke îre mgbọ ura obumbe ke ogwu inọ ya okibum inin̄ uwu, etetet, mè isulu ikpan̄, eje kan̄ îtoon̄ me ibot ogwu òkpakpan̄.

“Ogwu inọ geelek môkpe useen̄ inu îchiin̄be inyi ogwukaan̄ inu ya. Ire ìkakaan̄ ìsa ìkpe, mêtet ọmọ inyam, mè isa ikpoko ibot kan̄ ikpe me useen̄ inọ kan̄.

4 “Ire etet ogwu inọ melek anam îchiin̄be me ubọk, anam ya ìkakwu, ogwu inọ ya ìbokpe anam iba mije anam ge îchiin̄be, mè ìre orie eriembuuk, mè ìre inyinya akpan, mè ìyaka irere arọọn̄.

5 “Ire ene isa anam kan̄ isi ibe isi itaka mbubet, mè itele mè anam ya isi inin̄ uko ofifi ene, mè ìyaka ire uko gerep ofifi ene, mè ifiat otutuuk inu ene ya owopbe isan̄a, ogwukaan̄ anam cha ìbosa inu ònwọnwọn ichit me uko kan̄, mè ìyaka ire me uko gerep kan̄, inikpe inyi ogwukaan̄ uko ya, me useen̄ inu anam kan̄ ofiatbe.

6 “Ire ene itap ukan̄, ukan̄ ya otataka iyat iwele, mè ije me lek ukpak isaba isi inin̄ uko ofifi ene, mè itaka akpa efefieek iyiyik me efit me efit, mè ìyaka ire akpa echi kpefefieek-nu, ene ya ìbokpekpe useen̄ inyi ogwukaan̄ uko.

7 “Ire ene inyi ogwu melek kan̄ ikpoko mè ìyaka ire ofifi inu ibe isun̄ inyi ọmọ, mè ire echiin̄ inu ya me uwu ogwu îsabe inyi, etetet ogwu inọ ya, ogwu inọ ya môkpe inu ya mgbọ iba inyi ogwukaan̄. 8 Ire, ire kpetet ogwu inọ ya, mêsa ogwu enyibe inu ya isun̄ inu me isi ebi oyerebet,^a inyi eweek eriọọn̄ mè ìre îchak ubọk me lek inu ogwu melek kan̄, mè ìre ìkachak.

9 “Ire inu ene okaan̄be ichep, mè ìre orie eriembuuk, mè ìre inyinya akpan, mè ìre arọọn̄, mè ìre ofọnti mè ekwut, ogwukaan̄ onenisi imun̄ inu ya me ubọk ofifi ene, mè itumu ibe ke inu ya ìre eyi kan̄, ema agan̄ iba mêsa ikọ ya inu me isi ebi oyerebet.^b Ogwu geelek oyerebet otipbe môkpe inu ya inyi ogwu melek kan̄ mgbọ iba.

10 “Ire ene isa inyinya akpan kan̄, mè ìre orie eriembuuk kan̄, mè ìre arọọn̄ kan̄, mè ìyaka ire ofifi anam kan̄ geelek, inyi ogwu melek kan̄ ibe ibọkọ ikpọ inyi ọmọ, anam ya onenikwu, mè ìre unan osak me lek, mè ìre ofifi ene onitet isa ifo, me ene geege ikamun̄ge, 11 ogwu etapbe anam ya me ubọk môsi inyan̄a ibot me isi Okumugwem, isasa ijeen̄ ibe ke ọmọ ìkamọnọ inu ogwu melek kan̄ ìsak. Ogwukaan̄ anam ya môbọkọ ikọ ya itap ikeya, mè ogwu etapbe anam ya me ubọk ikakpe useen̄. 12 Ire, ire iweek iriọọn̄ ibe ke echichiin̄ anam ya me ubọk ogwu ene ya, ene ya môkpe useen̄ inyi ogwukaan̄. 13 Ire ke îre unye anam otet anam ya igwak itaka, ogwu anam ya okupbe me ubọk môsa okpọkọ nkwukwu anam ya inijeen̄ kubọk inu ata-ikọ. Ìkpokpe useen̄ inyi ogwukaan̄.

14 “Ire ene ifọọk anam me ubọk ogwu melek kan̄, mè ire anam ya inigak ikwu, mè ìyaka ire unan osak me lek mgbọ kpunube ogwukaan̄, ene ya ìbokpekpe useen̄ inyi ogwukaan̄. 15 Ire, ire anam ya ikwu me isi ogwukaan̄, ene ya ìkpokpe useen̄. Ire ene ya ìbọbọkọ anam ya me ọkọ, mè ikpe ikpoko me lek, ikpoko îkpebe ya môchit ichep ogwukaan̄ anam ya ochepbe.”

16 “Ire enerieen̄ imun̄ obaak enenwaan̄ ikariọọn̄ge enerieen̄, ogwu kpetet ikaan̄ ibedo me lek nwa, mè itet igọọk ilaak, ogwu enerieen̄ ya môkpe ikpoko ibot nwa me ibot ogwu enenwaan̄ ya, mè imọnọ isa irọ nwa kan̄. 17 Ire, ire nte gwun̄ enenwaan̄ ya ijit inye ibe ọmọ ìkposa gwun̄ kan̄ iche olom inyi ogwu enerieen̄ ya, ogwu enerieen̄ ya ìbokpe ikpoko ekikpe me ibot obaak enenwaan̄ ikariọọn̄ge enerieen̄.

18 “Ikatele ibe ogwu enenwaan̄ òdo inu iluk ugwem, ìkpakpan̄.

19 “Ogwu igọọk anam ilaak ilaak olom mè nwa, ebekpakpan̄.

20 “Ogwu igwa ngwugwa inyi ofifi awaji geelek, ilọ me lek Okumugwem, ekpakpan̄.

21 “Ikarọ inu uyọt uyọt me lek ebi ichen, ikatututuku si ema. Mije, enyi si mîre ebi ichen me ido Ijipiti.

22 “Ikatutuku ebi nwakpa, mè ebi kpà-nte. 23 Me atikọ, ire enyi itutuku ema, mè ire ema ito ito igwen emi, emi m̀kpalọlọ inọnọ ida ito kiban̄. 24 Unaan̄-ejit n̄a mônenikpọk igwook enyi me lek, mâsasa oge akọn̄ ikpan̄ enyi isan̄a, inyi ebi nwa kinyi ekana si nwakpa, mè nsabọn kinyi si ekana ebi kpà-nte.

25 “Ire enyi ifọọk ikpoko inyi ebi ugbọọn̄ me etete ebi n̄a, ikarọ ema me lek kubọk ebi ìkinyam ikpoko ekirọ. Ikabọkọ oruru me inyọn̄ ikpoko geege enyi efọọkbe inyi ema. 26 Ire ogwu melek kwun̄ isa ofọnti utọọk kan̄ inifọọk owu inu me ubọk, yaka ofọnti ya sa jet sabum ura obonim me usen yaage. 27 Mije, îre ofọnti ya gaalek ke îkaan̄ isasa ichit lek. Ire onye ejit me lek kan̄, ìre keke ke ìboyaka isa ikwek utọọk me lek? Ire ene ya ito ito igwen emi, mânọ ida kan̄. Mije, emi ìre ogwu ejit njijin.

28 “Katumu Awaji ìlọ, mè kafieek otu ìnyi ebi oyerebet kinyi.^c

29 “Me lek ogbogbo mfut uko kinyi, ikawuuk isasa akpa mè miin̄ ijet emi. Adasi bọn ebirieen̄ kinyi mêkire si echi n̄a. 30 Ikeya si ke enyi eberọ me lek adasi bọn eriembuuk kinyi mè arọọn̄ kinyi. Usen jaaba gaalek ke ema ebekup melek nga kiban̄. Me òso usen jeeta, enyi mêsa ema ijet emi.

31 “Ebi ìkup mbuban ke enyi ebere isa inyi emi. Eya orọ, anam geelek unye anam ochimbe ikpan̄, ikataka. Ìben ìtọp ìto ìnyi ibo itaka.