4 “Ire owu omun̄ orie eriembuuk mè ìyaka ire inyinya akpan ogwu ochicha kwun̄ okije ilọ oniin̄, kalọlọ itetet isa ijet ogwukaan̄. 5 Ire owu omun̄ inyinya akpan ogwu ochicha kwun̄ onan̄abe irọn̄ me irak ulobo efit inu îbemebe, kakpọkpọ ìje ìraka. Gọọk tap ubọk san̄a anam ya me irak ulobo akpan kan̄.

6 “Kafeen̄ ogwu ugbọọn̄ me etete kinyi me emen oyerebet kan̄. 7 San̄a lek kwun̄ me lek itotoon̄ ene ikọ ataak. Ogwu òrọ ata inu mè ogwu ìkarọ ìlọ, kakpan̄. Mije, m̀kpatele ibe ogwu oyerebet otipbe ifo me ikike.

8 “Kabọkọ ikpoko udun̄. Mije, ikpoko udun̄ ìkitap ebi chieen̄ ochilibe ǹnàan̄, mè òkowuwọlọ ikọ ebi ata irọrọ.

9 “Katutuku ogwu ichen, bak me lek enyi mîriọọn̄ inu irere ebi ichen orebe. Mije, enyi mîwuuk lek ire ebi ichen me ido Ijipiti.”

10 “Me acha gweregwen, owu môkiwop inu me inyọn̄ ijọn̄ kwun̄, mè ikirọkọ mfut uko kwun̄. 11 Ire, me òso acha jaaba, tele inyi ijọn̄ ya iwọ efuuk, kawop inu geege me inyọn̄ ijọn̄ ya. Tele mè ebi kinyi ebi ugbọọn̄ erọkọ inorie me ijọn̄ ya erie. Ire ikaan̄ inu geelek òsisik, eya ikup inyi ebi kè anam oron. Ubọk yaage ke owu oborọ me lek uko gerep kwun̄, mè uko olifu kwun̄.

12 “Me usen gweregwen, owu môrọ ikwaan̄ kwun̄ geelek. Ire, me òso usen jaaba, owu môtap efuuk. Owu òkporọ ikwaan̄ geege, inyi orie eriembuuk kwun̄ mè inyinya akpan kwun̄ iwọ efuuk, mè ugwem iyaka inin̄ me emen ogwu usun̄ emanbe me uwu kwun̄ mè ogwu ichen kwun̄ si.

13 “Otutuuk inu geelek ntemebe enyi, ìmun̄ ibe ke enyi mîrọ. Ikariaak ofifi awaji. Ikababak erieen̄ ofifi awaji cha, ekanọnọ si erieen̄ kiban̄ geege me otu kinyi.

14 “Mgbọ ita me acha geelek ke enyi ebekirie ijọk mfaka inyi emi.

15 “Ìkirie ijọk Fituru Kpunu Olat. Me otutuuk usen jaaba eyi ijọk ya, enyi mêkirie fituru kpunube olat me lek, kubọk mwuukbe lek itumu ibe enyi ekerọ me ibot mgbọ kan̄, me onyan̄ Abibu. Mije, îre me emen onyan̄ ya ke enyi enan̄a me Ijipiti isibi. Ire, ene geege ikaje ukpọk ubọk ìnu ìnimun̄ emi isi.

16 “Ìkisa adasi mfut enyi erọkọbe me uko kinyi ìkirie Ijọk Irọrọkọ Inu Uko. Me ibot acha geelek, ìkirie si Ijọk eyi Ikpukpulu Uko me mgbọ enyi isikikpulu mfut uko, òrere oruru kwulukwulu kinyi, inan̄a me uko isa ika initap me uwu isun̄-inorie.

17 “Mgbọ ita me acha geelek, otutuuk ebirieen̄ ebi Ijeren mêkinu me isi Ogwukaan̄-ene Okumugwem.

18 “Ikasa inu olat okupbe me lek ìgbaalek eje anam ìsa ìnigwa ngwugwa ìnyi emi. Ikasun̄ okpọn̄ anam enyi esabe igwa ngwugwa inyi emi ìwele egwe.

19 “Ìsa adasi mfut uko kinyi, echi òjajaan̄ lek ichit, ìna me Uwu Mbuban Okumugwem, Awaji kinyi. Ikatem gwun̄ ebot me emen mun̄ ebe ogwu uga.”

20 “Kpọ, emi gwa ǹkiria ogwu osat n̄a ibe ije me isi kinyi, mè ikibem enyi me oniin̄ ije kinyi, mè isa enyi isi itap me ere nnen̄ebe isun̄ inyi enyi. 21 Ìriọọn̄ lek kinyi me isi kan̄, mè ìgban̄ utọn̄ me ida kan̄. Ikarọ inyi ejit inaan̄ ọmọ. Mije, ìkpotele unye-ibot kinyi inyi enyi, bak me lek, Erieen̄ n̄a òwa me emen kan̄ okupbe. 22 Ire, ire enyi igban̄ utọn̄ me ida kan̄ me atikọ, mè ikirọ otutuuk inu geelek mâtumube inyi enyi, mâkana ogwu ochicha isa inyi ebi ochicha kinyi, mè irọ ikeme si ife geelek ìkirọ ikeme enyi. 23 Ogwu osat n̄a môje me isi kinyi, mè isa enyi isi itap me inyọn̄ ijọn̄ ebi Amọ, mè ebi Et, mè ebi Pereji, mè ebi Kenan, mè ebi Ifi, mè ebi Jebus. Emi mâjijaka ema isan̄a kpai. 24 Mgbọ enyi isire ere ya, ikatọbọ ebum ìnyi awaji kiban̄, ikafaka mfaka geege ìnyi ema, ikagọọk ìrọ orọmijọn̄ kiban̄ geege. Enyi ebegwagwak mkpọmfaka kiban̄ cha, mè ibak ewuuk mfaka kiban̄ igwook.

25 “Ìkitọbọ ebum ìnyi emi, Okumugwem Awaji kinyi, ke mâgbana enyi, mè inyi enyi owuwa inorie mè mudim, mè isan̄a orukan̄ isan̄a me etete kinyi. 26 Owot ìkposibi ebi nwa kinyi. Enenwaan̄ geege ìkpore òra me ido kinyi. Otu ifuk acha ugwem kinyi ìbokire òjot òjot.

27 “Mâria ukpook n̄a itap me emen ebi ido geelek me isi kinyi. Mâtap si wọlọwọlọ me etete otutuuk ebi geelek enyi mêjebe inin̄ ido kiban̄, mè irọ inyi otutuuk ebi ochicha kinyi egwu ekom, mè elim me isi kinyi. 28 Mâria ogbogbo uwuson, inyi ikije me isi kinyi, mè isi ililaba ebi Ifi, mè ebi Kenan, mè ebi Et isan̄a me isi kinyi. 29 Ire, m̀kpalap ema isan̄a me isi kinyi me acha ge gaalek, inyi ijọn̄ ya ikajijaka, mè anam oron ikawa enenen ìgak enyi ubọk. 30 Mâkilap ife cha isan̄a sọnja sọnja, mege ire mgbọ enyi mêmumanabe iwa me otu ifuk, mè iluk ichit inyọn̄ ijọn̄ ya, inyi ikana eyi kinyi.

31 “Mâsun̄ oke ijọn̄ kinyi iwele ibene me lek okwaan̄ Anyiaan̄ isi ire lek okwaan̄ ile Mediterenia,^a mè inyana ibene me emen èwê isi ire lek okwaan̄ Yuferetis. Mije, mâkana ebi ìluk me inyọn̄ ijọn̄ ya itap enyi me ubọk, mè enyi elap ema esan̄a me inyọn̄ ijọn̄ ya me isi kinyi. 32 Ikagọọk ema mè ìyaka ire awaji kiban̄ ìgbaan̄ ìnyan̄a ibot. 33 Ikachieek ibe ema enegọọk enyi eluk me inyọn̄ ijọn̄ kinyi, inyi ema ekarọ ibe enyi etọbọ ebum enyi awaji kiban̄, mè esa me ikeya erọ emi ijo inu. Mije, itọtọbọ ebum inyi awaji kiban̄ cha môkana ufe isa inyi enyi.”