3 Mosis onenisa otutuuk inu Okumugwem otumube mè otutuuk ikan înyibe inikpa inyi ebi Ijeren. Ema egbagbaan̄ ifọọk me ida ge ibe, “Otutuuk inu geelek Okumugwem otumube, eji mêrọ.” 4 Mosis onenige otutuuk inu Okumugwem otumube isun̄. Me ofit iwele kan̄, inanan̄a ikeke me ata otu ewelegwe, mè inama ntook ngwugwa me ebon ogoon̄ ya, mè ibene akọp mè ewuuk iba igwuun̄ me erieen̄ akọp mè otoko iba ebi Ijeren. 5 Mosis oneniria nsabọn irieen̄ ebi Ijeren ibe esi egwa ngwugwa ewọwọp iriọk me inyọn̄ ntook ya, mè esa si eriembuuk egwa ngwugwa esuuk enyi Okumugwem. 6 Mosis ofefele eje anam cha irek iba, mè itap agan̄ ge me emen okwa, mè iniben agan̄ keyilọ ifiat igwook me lek ntook ya. 7 Ineniben ikpa îgebe inyan̄a-ibot Okumugwem me emen ya ifuk isibi me utọn̄ otutuuk ebi Ijeren. Ema efọfọọk ibe, “Otutuuk inu geelek Okumugwem otumube, eji mînọ. Eji mêrọ ubọk îtumube.”

8 Mosis oneniben eje òkup me emen okwa ya inyiaan̄ igwook me lek ebi Ijeren, mè itumu ibe, “Ìkpọ, eyiyi ìre eje inyan̄a-ibot eyi Okumugwem onyan̄abe melek kinyi, igọọk me lek otutuuk ikọ chi îtumube.”

9 Mosis mè Erọn mè Nadabu mè Abiyu, melek akọp ebi ugane jaaba ebi Ijeren, eneninene inyọn̄ ogoon̄ ya, 10 mè imun̄ Awaji ebi Ijeren osabe obubot ibene ukot. Obubot ya, esa ewuuk unye otu ewe safaya, òkup oluku oluku mè ikitoon̄ kubọk akpa isinyọn̄, irom. 11 Ebi ugane Ijeren cha emumun̄ Awaji, mè ikup me isi kan̄ irie inorie, mè inwọ miin̄. Ire, Awaji ìkasulu ife cha osusut geege.

12 Okumugwem onenitumu inyi Mosis ibe, “Nene na me lek n̄a me inyọn̄ ogoon̄, mè na kup me ere keyi. Mânyi owu akpakpa ewuuk iba echi ngebe ikan n̄a mè ikọ ntọbe me lek, inyi owu òsa òkojeen̄ ebi Ijeren.” 13 Mosis onanan̄a ikeke, mè isa Josuwa, ogwu ntap-ubọk kan̄, igbaalek inene inyọn̄ ogoon̄ Awaji. 14 Mosis onenitumu inyi ebi ugane Ijeren ibe, “Ìkup me ere keyi ìban eji ire mgbọ eji mêkabe igọọk enyi. Erọn mè Uru ere eba melek kinyi, ikaan̄ ebi ikaan̄ gọlọgọlọ, esa esi lek kiban̄.”

15 Mosis onenene ifo inyọn̄ ogoon̄ ya, oduku inyọn̄ okakana ichit ogoon̄ ya. 16 Ujamgbugbo Okumugwem ogegele inikup me inyọn̄ ogoon̄ Saina ya, oduku inyọn̄ ya okakana ichit ogoon̄ ya bùk ototuuk usen gweregwen. Me òso usen jaaba, Okumugwem okukup me emen oduku ya igwen Mosis. 17 Ike ebi Ijeren ekikpọ, ujamgbugbo Okumugwem osisibi itoon̄ me ibot ogoon̄ ya kubọk ukan̄ òkisasak. 18 Mosis onenene inyọn̄ ogoon̄ ya inin̄ me emen oduku inyọn̄ ya, mè ikup me inyọn̄ ogoon̄ ya akọp egwe ini, mè akọp eririeen̄ ini.