4 Mosis onenikwaak akpakpa ewuuk iba òbet lek echi adasi cha, mè isa ikaan̄ me ubọk inene inyọn̄ ogoon̄ ya me ata otu ewelegwe, ike Okumugwem onyibe ọmọ ida. 5 Okumugwem ogegele isibi inu me emen ujọn̄ọ efit oduku inyọn̄, mè inikeke melek kè Mosis me ere ya, mè ikitik erieen̄ kan̄, Okumugwem. 6 Okumugwem onenije iraka me isi kè Mosis, mè ikitik erieen̄ kan̄ ibe, “Okumugwem! Okumugwem! Awaji ogwu ejit njijin mè ejit nsan! Ogwu òkaan̄ ujọn̄ọ ukarajit, mè ijot me atata nnwọn, mè igbe utoon̄-ejit! 7 Ogwu òkijeen̄ atata nnwọn kan̄ me lek obop obop ebi ene! Ogwu òkitele inu ikpak mè unye-ibot mè ijo inu geelek inyi ebi ene! Ire, ìkakilọlọ isusulu ogwu òrọrọ ijo inu osusut ògbegbe! Ogwu òkisa mkpukpe ijo inu eyi ute orọbe ikpe nsabọn kan̄ mè bọn bọn kan̄, mege ire ukot òso ita mè ukot òso ini.”

8 Mosis ogwagwat lek igele igwook me ijọn̄ mgbọ yaage, mè itọbọ ibot inyi Okumugwem, 9 mè itumu inyi Okumugwem ibe, “Soso, Ogwukaan̄ n̄a, ire owu obele ejit me lek n̄a me atikọ, na gọọk eji je. Owu oriọọn̄ ibe ke ebi Ijeren ìre ife unye-ibot mè ìnan-utọn̄. Soso, tele otutuuk ijo ugwem kiji mè ijo inu kiji nyi eji, mè bọkọ eji tap kubọk ebi kwun̄ ebi owu okaan̄be me ìrot.”

10 Okumugwem onenitumu inyi Mosis ibe, “Kpọ, mgbọ keyi, emi ǹkinyan̄a ibot melek ebi Ijeren. Mârọ uyeke inu me isi otutuuk ebi kinyi, echi enyi kperarak imun̄ me otutuuk ido ebi linyọn̄. Otutuuk ebi enyi elukbe me etete mêsa chieen̄ kiban̄ imun̄ inu echi emi, Okumugwem, mârọbe melek kinyi, mè imun̄ ibe ke îre ikwaan̄ ukpook. 11 Gaalek ìsiki ibot, mè ìsun̄ otutuuk ikan nnyibe enyi cherekeyi, ke enyi mêmun̄ ibe ke mârieen̄ otutuuk ebi Amọ, mè ebi Kenan, mè ebi Et, mè ebi Pereji, mè ebi Ifi, mè ebi Jebus isan̄a me oniin̄ inyi enyi. 12 Ìmun̄ ibe ke enyi kpegbaan̄ inyan̄a ibot melek ebi ife chi, ebi ìluk me inyọn̄ ijọn̄ ya ere enyi ebesi iluk. Mije, ire enyi igọọk ema igbaan̄ inyan̄a ibot, ema mêkana ufe mkpa me etete kinyi. 13 Kpan̄asi ikeya, ìgbugbọ ntook ngwugwa kiban̄ geelek, mè ìgbugbọ si ewuuk mfaka kiban̄ cha egwugwuun̄be, mè ìchon otutuuk uti yọk Asera^a kiban̄ cha ìgwook. 14 Mije, enyi kpebetọbọ ebum inyi ofifi awaji geege, bak me lek, emi Okumugwem, ìre Awaji mba-ejit. Erieen̄ n̄a ìre Mba-ejit. 15 Ikagbaan̄ ìnyan̄a ibot melek ebi ìluk me inyọn̄ ijọn̄ yi. Ire enyi irọ, mgbọ geelek ema mêbekifaka mfaka, mè ikigwa ngwugwa inyi awaji kiban̄ cha, ema mêgwegwen enyi ibe enerie inorie ngwugwa kiban̄ cha, enyi mêgọgọọk ema irie. 16 Mgbọ ya si, enyi mêbebene ikido bọn ebibaan̄ kiban̄ inyi bọn ebirieen̄ kinyi me lek nwa. Bọn ebibaan̄ kiban̄ cha mênenikitọbọ ebum inyi awaji kiban̄, mè itaba bọn ebirieen̄ kinyi cha, inyi ekegọọk ema eketọbọ ebum enyi ebi kè awaji kiban̄ cha.

17 “Awaji ekitọtọkọ cha, ikarọ ìnyi lek kinyi.

18 “Ìkirie ijọk Fituru Kpunu Olat. Me otuuk usen jaaba eyi ijọk ya, enyi mêkirie fituru kpunube olat me lek, kubọk mwuukbe lek itumu ibe enyi ekerọ me ibot mgbọ kan̄, me onyan̄ Abibu. Mije, îre me emen onyan̄ ya ke enyi enan̄a me Ijipiti isibi.

19 “Gwun̄ uchili-owot^b geelek ìre eyi n̄a. Ikeya si, uchili-owot anam geelek òrere orie ìre eyi n̄a, mè ìre gwun̄ eriembuuk mè ìyaka ire gwun̄ arọọn̄. 20 Ire, orie gwun̄ uchili-owot eyi inyinya akpan, mêsa orie gwun̄ arọọn̄ ininwene ibot isa ifaka ọmọ isibi. Ire, ire kpeweek inwenwene, ebefafan̄a ebek kan̄, inyi ikwu. Otutuuk bọn ebirieen̄ uchili-owot kinyi geelek, enyi mêfaka ema isibi.

“Ene geege me etete kinyi ikaje ukpọk ubọk ìnu me isi n̄a.

21 “Usen gweregwen ke enyi mêkisa irọ otutuuk ikwaan̄ kinyi geelek, mè isa òso usen jaaba iwọ efuuk. Mè ìre mgbọ iwop inu me uko, mè ìre mgbọ irọkọ inu me uko, enyi kpebesi ikwaan̄ geege me òso usen jaaba ya.

22 “Ìkisa adasi mfut akpa wit enyi erọkọbe me uko ìkirie ijọk Nde, mè ìkirie si ijọk Ikpukpulu Inu Uko itap me uwu me ibot acha geelek. 23 Mgbọ ita me acha geelek ke otutuuk ebirieen̄ ebi Ijeren ebekinu me isi Ogwukaan̄-ene Okumugwem, òrere Awaji ebi Ijeren. 24 Mârieen̄ owuwa ido isan̄a enyi me isi, mè irọ inyi oke ijọn̄ kinyi iwele enenen, ire lek, me mgbọ ita cha echi enyi mêbekinan̄a inu me isi n̄a, emi Okumugwem Awaji kinyi, kpunu ene geege òboweek ibọbọkọ ijọn̄ kinyi.

25 “Enyi isigwu anam isa igwa ngwugwa inyi emi, ikachieek ibe inu geege olat okupbe me lek ichak me lek eje ngwugwa ya. Ikatele si ibe inu geege òje me lek ijọk Iraraka isik iwele egwe.

26 “Ìsa adasi mfut uko kinyi echi ònwọnwọn ichit ìna me Uwu Mbuban Okumugwem Awaji kinyi. Ikatem gwun̄ ebot me emen mun̄ ebe ogwu uga.”

27 Okumugwem onenitumu inyi Mosis ibe, “Ge otutuuk ikọ chi onọbe sun̄, mije, îre gọọk me lek ikọ chi ke emi nnyan̄a ibot melek kwun̄ melek ebi Ijeren si.” 28 Mosis ìkup melek Okumugwem me inyọn̄ ogoon̄ ya akọp egwe ini mè akọp eririeen̄ ini, ìkarie inorie geege, ìkanwọ si inu geege. Ere ya ke îkup ige otutuuk ikọ inyan̄a-ibot cha, òrere Akọp Ikan, me lek akpakpa ewuuk iba cha.

29 Mgbọ Mosis onan̄abe me inyọn̄ ogoon̄ Saina isibi inu, melek akpakpa ewuuk iba egebe akọp ikan cha me lek me ubọk kan̄ agan̄ iba, ìkariọọn̄ ibe ke isi kan̄ ìyaka ikitoon̄ kubọk ura, mije îkpabe ukpatu melek Okumugwem. 30 Mgbọ Erọn mè otutuuk ebi Ijeren emun̄be Mosis, mè imun̄ ike isi kan̄ okitoon̄, ukpook otetet ema ijeje igbet ọmọ lek. 31 Ire, Mosis ogwegwen ema ibe eje egbet ọmọ lek. Erọn mè otutuuk ebi ugane otutuuk otoko ebi Ijeren enenigwu ikom ije inu me lek kè Mosis. Inenitumu ikọ melek kiban̄. 32 Me mgbọ eya orakabe, otutuuk ebi Ijeren enenikọt ije iriaak me lek kè Mosis. Mosis oneninyi ema otutuuk Ikan Okumugwem onyibe ọmọ me inyọn̄ ogoon̄ Saina.

33 Mgbọ Mosis otumube ikọ inyi ema isan̄a, inenisa ekwut ikana ichit isi kan̄. 34 Ire, mgbọ geelek îweekbe isisi isi Okumugwem isi itumu ikọ melek kan̄, îra isan̄a ekwut ya isan̄a me isi kan̄, mè itele isi kan̄ ikeya mege ire mgbọ ìbonan̄a me isi Okumugwem ika. Mgbọ geelek Mosis isinan̄a me isi Okumugwem ika, îra isa ikan îbọkọbe inan̄a me ida Okumugwem inikpa inyi ebi Ijeren. 35 Ebi Ijeren mîra imun̄ ubọk isi kan̄ okitoon̄ kubọk ura. Mosis îra isa ekwut ikana ichit isi kan̄, mege ire mgbọ ìboyaka isi isi Okumugwem isi ikpa ukpatu melek kan̄.