3 “Nnenisa uwot uti akasia irọ okop ya, mè inikọ akpakpa ewuuk iba òbet lek echi adasi mgbọ cha, mè inikpulu ema ikaan̄ me ubọk isa inene inyọn̄ ogoon̄ ya. 4 Okumugwem onenige otutuuk inu îwuukbe lek ige me lek adasi akpakpa ewuuk iba cha, me lek akpakpa ewuuk iba kechi. Inu îgebe ìre Akọp Ikan cha, echi îwuukbe lek itumu inyi enyi inan̄a me emen ukan̄ me inyọn̄ ogoon̄, mgbọ enyi etitiin̄be me ebon ogoon̄ ya. Mgbọ Okumugwem ogebe inu cha isan̄a, inenisa akpakpa ewuuk iba cha inyi emi. 5 Emi mbọbọkọ, mè isa igwu ikom inan̄a me inyọn̄ ogoon̄ ya isibi, mè iniben ema itap me emen okop ya nrọbe, ike Okumugwem onyibe emi ida. Ema òwa me emen okop ya mgbọ keyi.”

6 Ebi Ijeren enanan̄a me ere udọn̄ mudim ebi Jayakan, mè ije mege isi ire Mosera. Îre me Mosera ke Erọn okup ikwu, efufuun̄ ọmọ me ere ya, Elieja ogwu gwun̄ onenibọkọ irek ikwaan̄ kan̄ kubọk ogwu ngwugwa. 7 Ema eneninan̄a me ere keya ije isi ire Gudugoda, mè iraka isi ire Jotibata, ijọn̄ ògbugbuk mun̄ ojotbe. 8 Îre me ike mgbọ ya ke Okumugwem osan̄a otoko kè Libai isun̄ esese, inyi ema ere ebi ìbekiben okop inyan̄a-ibot eyi Okumugwem, mè ikikeke me isi Okumugwem ikisi ikwaan̄, mè ikitan̄a ugbana me erieen̄ kan̄, kubọk ema ekirọ si cherekeyi. 9 Mije keya, ebi otoko kè Libai kpekaan̄ uche geege, mè ìrot geege me etete ebi ngwan̄. Okumugwem ore ìrot kiban̄, kubọk Okumugwem Awaji kinyi otumube inyi ema.

10 “Mgbọ keyi si, emi ǹkup me inyọn̄ ogoon̄ akọp egwe ini mè akọp eririeen̄ ini, kubọk nrọbe me adasi mgbọ ya. Okumugwem onọnọ ida n̄a mgbọ keyi si, ìkayaka ìweek ijijijaka enyi isan̄a. 11 Okumugwem onenitumu inyi emi ibe, ‘Nan̄a keke, mè sa ife chi je nin̄ oniin̄ ije kiban̄, inyi ema esi ebọkọ ijọn̄ ya esak, ijọn̄ eyi nnyan̄abe ibot inyi ebi nte nte kiban̄ ibe ke mâsa inyi ema.’

12 “Mgbọ keyi, enyi ebi Ijeren, ìre keke ke Okumugwem Awaji kinyi okiweek me ubọk kinyi? Okumugwem Awaji kinyi ìkiweek ibe enyi etet ukpook me lek kan̄, mè eluk ugwem egọọk me oniin̄ kan̄, mè ema ọmọ, mè etọbọ ebum enyi ọmọ me otutuuk ejit kinyi, mè otutuuk ibot ejit kinyi, 13 mè ekerọ otutuuk ikọ îtọbe, mè ekerọ orọmijọn̄ kan̄ echi emi nkinyi enyi me cherekeyi, inyi inu ikije ijaan̄ enyi me lek. 14 Mije, emen inyọn̄ ere òbebene ichit ìre eyi Okumugwem Awaji kinyi, linyọn̄ mè otutuuk inu geelek òkup me emen ìre si eyi kan̄. 15 Ire, îre ebi nte nte kinyi ke Okumugwem okaan̄ ikpele ulọk me lek, mè imọnọ ema ima, mè inigobo enyi bọn bọn kiban̄ si, me etete otutuuk ebi ido geelek, isa irọ ebi eyi kan̄, kubọk îkupbe me cherekeyi! 16 Eya orọ, ìsan̄a ijo inu òkup enyi me ejit, eyi òkirọ ibe enyi ekakigban̄ utọn̄ ìnyi Awaji ya. Ikayaka ìkikpaka ibot ofifi. 17 Mije, Okumugwem Awaji kinyi ore Awaji otutuuk awaji geelek, mè ire si Òkaan̄ otutuuk ebikaan̄-ene geelek, ọmọ ore Ikpele Awaji, ogwu òkaan̄ unye, mè ikaan̄ ukpook. Ọmọ ìre ogwu ìkakigobo ene isi, ìkakirie si ngan. 18 Ọmọ ìre ogwu òkitumu ikọ ibot ebi kpà-nte, mè ibot ebi nwakpa, mè ikima ebi ichen, mè ikinyi ebi ichen inorie mè ofọnti mè ekwut. 19 Enyi si, ìkima ebi ichen, mije, îkaan̄ mgbọ enyi erebe ebi ichen me Ijipiti. 20 Ìkitet ukpook me lek Okumugwem Awaji kinyi, mè ìkitọbọ ebum ìnyi ọmọ. Ìtet ọmọ ìnye, mè ìkisa erieen̄ kan̄ ìnyan̄a ibot. 21 Ọmọ ore Awaji kinyi, ogwu ògbegbe itọn̄ kinyi. Ọmọ ore ogwu òrọrọ ikpele uyeke uyeke ikwaan̄ òkaan̄ ukpook, echi enyi esabe chieen̄ kinyi imun̄ cha, inyi enyi. 22 Mgbọ ebi nte nte kinyi enan̄abe isi iluk me Ijipiti, ema ìre akọp ene jaaba gaalek. Mgbọ keyi, Okumugwem Awaji kinyi îrọ inyi enyi ewa kubọk ntoronyan̄ akpabin inyọn̄.