Ntim-mkpan̄ ìnan̄a me ejit nsan Awaji
9
“Enyi ebi Ijeren, ìgban̄ utọn̄! Me mgbọ keyi, enyi mênisaba okwaan̄ Jodan itoon̄, mè ije inin̄ isi ibọkọ ijọn̄ me ubọk owuwa ido ìwawa enenen igak enyi, mè inye lek si igak enyi. Enyi mêbọkọ si ama ile òmimiin̄, echi enamabe mgban òbebene ichep me inyọn̄ ikana okokop. 2 Ife cha ìre ebi Anak, ìrere ebi ìnyenye lek enenen, mè ijijọn̄! Enyi mîriọọn̄ ema, mè ikinọ si inu ekitumu ofolek kiban̄ ibe, ‘Ìre ekene obokọt ikeke me isi ebi Anak?’ 3 Ire, ìriọọn̄ cherekeyi ibe ke îre Okumugwem Awaji kinyi okije me isi kinyi isaba okwaan̄ ya kubọk ukan̄ òkitataka inu ikọọk. Îre ọmọ obojijaka ema isan̄a, mè ikeme ema isiki me isi kinyi. Sa me ikeya, enyi mêrieen̄ ema isibi, mè ijijaka ema isan̄a ugwat ugwat, kubọk Okumugwem otumube.4 “Okumugwem Awaji kinyi isirieen̄ ema isibi me isi kinyi, ikatumu me ejit kinyi ìbe, ‘Îre bak me lek ata irọrọ kiji ke Okumugwem osa eji inu, inyi eji enebọkọ ijọn̄ yi esak.’ Mije, îre bak me lek inu ikpak ebi ido chi ekirọ ke Okumugwem oborieen̄ ema isan̄a me isi kinyi. 5 Ìkare mije enyi erebe ebi ata irọrọ, ìkarere si mije enyi erebe ebi unen eru, ke enyi eberaka inin̄ inyọn̄ ijọn̄ ife cha isi ibọkọ ikaan̄. Îre mije ebi ido chi erebe ebi ikpak ke Okumugwem Awaji kinyi oborieen̄ ema isan̄a me isi kinyi, isasa irọ inyan̄a-ibot eyi înyan̄abe inyi ebi nte nte kinyi, Ebereyam mè Ajiki mè Jekọp, iso. 6 Ìriọọn̄ ibe ke ìkare mije ata irọrọ kinyi ke Okumugwem Awaji kinyi okinyi enyi ata ijọn̄ yi, ibe enyi ebọkọ esak, mije, enyi ìre ife unye-ibot.
Ebi Ijeren mîrọ awaji eriembuuk alata araran̄
7 “Ìkeek, ikawuuk ubọk enyi erọbe inyi Okumugwem Awaji kinyi inaan̄ ejit me lek kinyi me emen èwê. Bene me usen enyi enan̄abe me Ijipiti isibi, mege enyi ejebe inire ere keyi, enyi ekpọkpọ ikikpaka ibot inyi Okumugwem. 8 Me Orebu, enyi mîrọ inyi Okumugwem inaan̄ ejit enenen me lek kinyi, ire lek îbojijaka enyi isan̄a. 9 Mgbọ nnenebe isi inyọn̄ ogoon̄ mbasi ibọkọ akpakpa ewuuk iba cha, echi egebe ikan inyan̄a-ibot eyi Okumugwem onyan̄abe melek kinyi me lek, nkup me inyọn̄ ogoon̄ ya akọp egwe ini mè akọp eririeen̄ ini, ǹkarie inorie geege, ǹkanwọnwọ si mudim. 10 Okumugwem oneninyi emi akpakpa ewuuk iba cha, echi ọmọ Awaji me lek kan̄ osabe otubọk kan̄ gaalek ige inu me lek. Okumugwem ìgege otutuuk ikan kan̄ isibi me lek ewuuk cha iso, òrere ikọ îtumube inyi enyi me inyọn̄ ogoon̄ ya me emen ukan̄, me usen ya enyi etitiin̄be ikana ebon ogoon̄ ya. 11 Me òta usen me lek akọp egwe ini mè akọp eririeen̄ ini cha, Okumugwem oneninyi emi akpakpa ewuuk iba cha îgebe inyan̄a-ibot kan̄ me lek, 12 mè itumu inyi emi ibe, ‘Nan̄a keke, mè gwat lek kwala sibi, mije, ebi kinyi ebi owu osabe inan̄a me Ijipiti isibi mîfiat lek kiban̄ isan̄a. Me ikafiatge mgbọ, ema mîtele irọrọ inu nnyibe ida ibe ema erọ, mè iyaka isi itọkọ mkpọmfaka inyi lek kiban̄.’
13 “Okumugwem onenibe emi, ‘Nra imun̄ ibe ke ife chi ìre atalek ebi m̀kpaka ibot! 14 Juuk emi tele, inyi ǹjijaka ema ǹsan̄a, mè ǹtutuku erieen̄ kiban̄ ǹsan̄a me linyọn̄, mè ǹsa me lek kwun̄ ǹsan̄a ofifi ido ònyenye lek mè iwa enenen igak ema ǹsibi.’
15 “Mije keya, ngwugwu ikom, mè inan̄a me inyọn̄ ogoon̄ ya isibi ijọn̄, melek akpakpa ewuuk inyan̄a-ibot iba cha me ubọk iba n̄a. Me ike mgbọ ya, ukan̄ ya òkiseme me inyọn̄ ogoon̄ ya. 16 Nnenikpọ, mè imun̄ ibe ke enyi mîrọ ijo inu ikeme Okumugwem Awaji kinyi. Mmun̄ ibe ke enyi mîtọkọ mkpọmfaka òbet lek gwun̄ eriembuuk inyi lek kinyi. Me ikafiatge mgbọ, enyi mîtele oniin̄ Okumugwem Awaji kinyi onyibe enyi ida ibe enyi egọọk. 17 Emi imumun̄ ikeya, mbeben akpakpa ewuuk iba cha òkup emi me ubọk agan̄ iba itọbọ me ijọn̄ me chieen̄ kinyi gaalek, ewuuk cha okpọkpọk isan. 18 Nnenikpọk irọn̄ inyana me isi Okumugwem, kubọk nrọbe me adasi mgbọ, mè ikup ikeya otuuk kè akọp egwe ini mè akọp eririeen̄ ini, ǹkarie inorie geege, ǹkachachak si mudim me otu. Ǹrọ ikeya mije otutuuk ijo inu enyi erọbe, mè ojelek inu ikpak enyi erọbe me chieen̄ Okumugwem, isasa irọ ibe ejit inaan̄ ọmọ. 19 Mgbọ ya, ukpook unaan̄-ejit Okumugwem îtet emi enenen mije kinyi, ògak ge, uyok uyok unaan̄-ejit kan̄ ya eyi înaan̄be ire lek îweekbe ijijijaka enyi isan̄a kpai. Ire, Okumugwem onọnọ emi ida, ikerere me mgbọ keyi si. 20 Me mgbọ ya si, Okumugwem înaan̄ ejit enenen inyi Erọn, ire lek îweekbe ikpakpan̄ ọmọ. Ire, nrariaak si uriaak me ibot kè Erọn me mgbọ ya. 21 Nnenimọnọ ijo inu kinyi, òrere gwun̄ eriembuuk ya enyi erọbe, mè itap ukan̄ me lek iwọp, mè itun̄ ikpukpuku, mè ikọk iriọk ikana ntọn̄, mè iben ntọn̄ ya itọp igwook me ògbugbuk mun̄ òkigbuk inan̄a me lek ogoon̄ ya ilibi isibi ikwala igwook.
22 “Ubọk yaage si ke enyi erọ ibe Okumugwem inaan̄ ejit me Tabera, mè Masa, mè Kiborot Atayaba. 23 Ikeya si, me mgbọ Okumugwem oriabe enyi isibi me Kades Bania, ìtutumu inyi enyi ibe, ‘Ìnan̄a ìje, mè ìsi ìbọkọ ijọn̄ nnyibe enyi ya ìsak.’ Ire, enyi ekpakpaka ida Okumugwem Awaji kinyi. Enyi kpetoon̄ ọmọ ejit me lek, kpegbagban̄ si utọn̄ me ida kan̄. 24 Bene me karake usen nriọọn̄be enyi, enyi ìre ebi ìkikpaka ibot inyi Okumugwem.
25 “Eya orọ nrọn̄be inyana me isi Okumugwem akọp egwe ini mè akọp eririeen̄ ini ya, mije îtumube ifieek ibe ke ọmọ ìbojijijaka enyi isan̄a, 26 mè ikiriaak Okumugwem ibe, ‘Ogwukaan̄-ene Okumugwem, soso kajijaka ebi kwun̄, mè ìrot kwun̄, ebi owu osabe me ikpele unye kwun̄ inyan̄a isibi, mè isa me unye oguga kwun̄ itaba isibi me Ijipiti. 27 Nye lek keek ebi usun̄ kwun̄ Ebereyam, mè Ajiki, mè Jekọp, mè tọn̄ọ mije kiban̄ kpọ chieen̄ lọ me lek unye-ibot ife chi, mè afa kiban̄, mè ijo inu kiban̄. 28 Ire ìkare ikeya, ebi ido ere owu okpulube eji isibi ya mênikitumu ibe, “Îre mije Okumugwem ìkakọt ìsa ema ìsi ìtap me inyọn̄ ijọn̄ îchieekbe ema use, melek si mije îchabe ife chi, orọ îkpulube ema isibi isasa isi ikpan̄ me emen èwê.” 29 Ire, ema ìre ebi kwun̄, mè ìrot kwun̄, ebi owu osabe unye ubọk kwun̄ mè ikpele unye kwun̄ isan̄a isibi.’ ”