Kawuuk Okumugwem
8
“Ìgbala chieen̄ ìkirọ otutuuk inu chi nkinyi enyi ida chereyi ibe enyi ekerọ, inyi enyi efuk ugwem, mè emumana ewa, mè ekọt ebọkọ inyọn̄ ijọn̄ ya eyi Okumugwem onyan̄abe ibot inyi ebi nte nte kinyi ibe ọmọ môsa inyi ema. 2 Ìkeek otutuuk ujọn̄ọ ije Okumugwem Awaji kinyi osabe enyi ije itibi emen èwê otuuk kè akọp acha ini kechi, inyi ọmọ isa me ikeya irọ mè enyi esiki ibot, mè ọmọ iroon̄ si enyi ikpọ. Okumugwem ìrọ ikeyi, inyi ọmọ iriọọn̄ inu òkup enyi me emen ejit, mè iriọọn̄ si mè ìre enyi mêkirọ ikọ îtọbe, mè ìre kpebekirọ. 3 Okumugwem îrọ ibe enyi esiki ibot, mè iran̄ enyi ọfiọọn̄, mè inisan̄a mana isibi inyi enyi erie, òrere inorie enyi kperarak iriọọn̄, ebi nte nte kinyi si kperarak iriọọn̄, inyi enyi esa eriọọn̄ ibe ke ìkare inorie gaalek ke ene obosa iluk ugwem, ire, ke ene ìbosa otutuuk ikọ geelek ònan̄a me otu Okumugwem isibi iluk ugwem. 4 Ofọnti kinyi ìkagwak ìta enyi me lek, ukot kinyi si ìkayiki ìtoon̄ me otutuuk akọp acha ini cha. 5 Eya orọ, ìriọọn̄ ibe ke ike ute okisulu ebi bọn osusut isasa ijeen̄ ema inu, ke îre si ikeya ke Okumugwem Awaji kinyi okisulu enyi osusut.6 “Ìgbala chieen̄ ìkirọ otutuuk ikọ geelek Okumugwem Awaji kinyi otọbe ibe enyi erọ, mè ìkiluk ugwem ìkpọ me lek oniin̄ kan̄, mè ìkitet ukpook me lek kan̄. 7 Mije, Okumugwem Awaji kinyi ìkisa enyi ije ibosi itap me atalek ata ijọn̄, ijọn̄ ere okolo mè ogbuuruk mè ògbugbuk mun̄ irak ijọn̄ okigbuk, inan̄a me iteke ijọn̄ mè inyọn̄ ogoon̄, inikigwook. 8 Ijọn̄ ya ìre si ijọn̄ akpa wit mè akpa balì mè gerep mè figi mè pomegaranet mè aran̄ olifu mè aran̄ akwọọk okisibi ijaan̄. 9 Inorie ìkpobonan me inyọn̄ ijọn̄ ya, kpunu inu geege ikeyi òbonanan enyi. Me ere ya, ewuuk geelek îkaan̄ okwukwut me emen. Mêkirọkọ ekwe me inyọn̄ ogoon̄ geelek me inyọn̄ ijọn̄ ya. 10 Enyi isirie inorie, mè owot kinyi isijot, ìnyi Okumugwem Awaji kinyi itọn̄, mije ata ijọn̄ eyi înyibe enyi.
11 “Ìgbala chieen̄, inyi enyi ekawuuk Okumugwem Awaji kinyi, mè ìtele ikekirọ ikọ îtọbe inyi enyi, mè isusun̄ ikan kan̄ mè orọmijọn̄ kan̄ echi emi nkinyi enyi chereyi. 12 Ire ìkare ikeya, mgbọ enyi isirie inorie ijot owot, mè inama ujuja uwu inyi lek kinyi, mè ikiluk me ere ya, 13 eriembuuk kinyi mè arọọn̄ mè ebot kinyi okekimumana, ikpoko alata okuket mè alata araran̄ kinyi okekiwa, otutuuk inu geelek enyi ekaan̄be okekimumana iwa, 14 mgbọ ya, ugumulek môneninin̄ ijot enyi ejit, enyi mêneniwuuk Okumugwem Awaji kinyi, ogwu òsasan̄a enyi isibi me usun̄ me ido Ijipiti. 15 Îre ọmọ osa enyi ije itibi emen èwê ya òmimin mè ikaan̄ ukpook, ere ijijinu òkikpan̄ ene mè eferen̄ ojotbe, ere òkpọkpọ ichat, kpunu mudim ebenwọ. Îre ọmọ si osan̄a mudim inan̄a me emen nchat ewuuk isibi inyi enyi. 16 Îre ọmọ osan̄a inorie isibi isa ikpukpo enyi me emen èwê, inorie ebi nte nte kinyi kperarak iriọọn̄ inu ofolek, isasa irọ ibe enyi esiki lek enyi ọmọ, inyi inu ije ijaan̄ me lek kinyi me òta kan̄. 17 Enyi mêkọt itumu me ejit kinyi ibe, ‘Unye n̄a mè ubọk iba n̄a ke nsa isi ikwaan̄, mè ikaan̄ otutuuk inu chi nkaan̄be.’ 18 Ikawuuk Okumugwem Awaji kinyi, mije, îre ọmọ onyi enyi unye enyi esabe ibọm mbọm, mè ibọọn̄ ubọọn̄. Okumugwem ìrọ inu yi isasa irọ inyan̄a-ibot kan̄, eyi înyan̄abe inyi ebi nte nte kinyi, iso me chereyi.
19 “Ìriọọn̄ ibe, ire enyi iwuuk Okumugwem Awaji kinyi me atikọ, mè isi ikikana igọọk ofifi awaji cha, mè ikitọbọ ebum inyi ema, mè ikitọbọ ibot inyi ema, emi nkeke ata-ikọ ikeme enyi chereyi ibe ke enyi ebekwakwaan̄ ita kpai. 20 Ike Okumugwem okpan̄be ebi ido cha isan̄a me isi kinyi, ikeya si ke ìbokpan̄ enyi, ire enyi kpegban̄ utọn̄ me ida Okumugwem Awaji kinyi.