33
Okumugwem onenitumu inyi Mosis ibe, “Ngwa, ìnan̄a ìtele ere keyi, owu mè otutuuk ebi owu osabe inan̄a me Ijipiti isibi. Ìje ìsi inyọn̄ ijọn̄ ere nnyan̄abe ibot inyi Ebereyam mè Ajiki mè Jekọp ibe ke mâsa inyi bọn owot iman kiban̄. 2 Mâria ogwu osat n̄a ibe ikije enyi me isi. Mârieen̄ si ebi Kenan, mè ebi Amọ, mè ebi Et, mè ebi Pereji, mè ebi Ifi, mè ebi Jebus isan̄a enyi me isi. 3 Ìje ìsi inyọn̄ ata ijọn̄ ya òkisibi anam mè mfut uti kubọk mun̄. Ire, mije enyi erebe ife unye-ibot mè ìnan-utọn̄, emi m̀kpagọọk enyi ije isi ere ya, mije, ire ngọọk enyi ije, mâkpan̄ enyi isan̄a me oniin̄.”4 Mgbọ ebi Ijeren enọbe ikọ chi òkitap ene ukpook me emen, ema ebebene ikifieek ejit. Ene geege ìkayaka ìjijen mkputọn̄ mè asi ebek mè mkpọtubọk me lek. 5 Okumugwem ìtumu inyi Mosis ibe itumu inyi ebi Ijeren ibe, “Enyi ìre ife unye-ibot mè ìnan-utọn̄. Ire ngọọk enyi ije me oniin̄ sọnja mgbọ gaalek, mâjijaka enyi isan̄a kpai. Mgbọ keyi, ìjene otutuuk mkputọn̄ mè asi ebek mè mkpọtubọk enyi esabe ibala lek ìsan̄a, inyi m̀kpọ-nu inu mbarọ melek kinyi.” 6 Eya orọ, ebi Ijeren esasan̄a ebi kè mkputọn̄ mè asi ebek mè mkpọtubọk kiban̄ isan̄a, bene me ogoon̄ Orebua fo isi.
Atanga Chinichini
7 Me ere geelek ebi Ijeren ekupbe itap efuuk, Mosis îra iben atanga ge isibi isi igwuun̄ ida ibọkọ me ere m̀gba-ǹgwele ukan̄ ya ere otutuuk ebi ene elukbe. Mosis ìgwen atanga ya, atanga chinichini. Ene geelek òweweek ibọbọkọ etip me otu Okumugwem ìbosibi me ere m̀gba-ǹgwele ukan̄ ya isi lek atanga chinichini ya. 8 Mgbọ geelek Mosis isije isi atanga chinichini ya, otutuuk ebi ene mîra isibi ikeke me isotu uwu ọfọ kiban̄, mè ikikpọ Mosis mege ire mgbọ môjebe iraka inin̄ emen atanga chinichini ya. 9 Mosis isije iraka inin̄ atanga chinichini ya, ujọn̄ọ efit oduku inyọn̄ ya îra igele isiki inu, mè inikeke me otu isotu atanga chinichini ya. Okumugwem îra ikitumu ikọ melek kè Mosis. 10 Ebi Ijeren isimun̄ ujọn̄ọ efit oduku inyọn̄ ya okekebe me otu isotu atanga chinichini ya, ema otutuuk ene mîra itọbọ ibot me ijọn̄ inyi Okumugwem, kpa ogwu me otu isotu uwu ọfọ kan̄. 11 Okumugwem îra ikitumu ikọ melek kè Mosis isi mè isi kubọk ene okitumu ikọ isi mè isi melek ogwu melek kan̄. Ema isi itumu ikọ isan̄a, Mosis îra ika inu me ere m̀gba-ǹgwele ukan̄ ya ere otutuuk ene elukbe. Ire, Josuwa gwun̄ kè Nun, gwun̄ enerieen̄ ogwu òkitap ubọk inyi Mosis, îra ibia me emen ere atanga chinichini ya.
Mosis îmun̄ ujamgbugbo Okumugwem
12 Mosis onenitumu inyi Okumugwem ibe, “Kpọ, owu òkitumu inyi emi ibe emi m̀kpulu ife chi ǹsa ǹje. Ire, owu òkatumu ìjeen̄ emi ogwu owu oboria ibe ije melek n̄a. Owu otumu si ibe ke owu oriọọn̄ emi ijaan̄ lek, mè ibe si ke owu obele ejit me lek n̄a. 13 Me mgbọ yi, ire obele ejit me lek n̄a me atikọ, soso jeen̄ emi nkeek kwun̄, mè ǹriọọn̄ owu ǹjaan̄, inyi mâkirọ inu òbokibele owu ejit. Kawuuk ibe ke ido yi ìre ebi kwun̄.”
14 Okumugwem onenifọọk ọmọ ibe, “Mâkup melek kwun̄ me oniin̄ ije kinyi, mè inyi enyi utelelek.”
15 Mosis onenitumu inyi Okumugwem ibe, “Ire owu òkpoje melek kiji, soso kabe eji enan̄a me ere keyi eje. 16 Mọmọ ike ebi ene mêsabe iriọọn̄ me atikọ ibe ke owu oma emi mè ebi kwun̄, ire owu òkaje melek kiji? Ìre kpasi inu obojeen̄ ibe ke emi mè ebi kwun̄ ìre ife ìsibi esese me etete ebi ene me linyọn̄ keyi?”
17 Okumugwem otutumu inyi Mosis ibe, “Inu keyi si eyi owu obeekbe, mârọ, mije, mbele ejit me lek kwun̄, mè iriọọn̄ owu ijaan̄ lek.”
18 Mosis onenibeek Okumugwem ibe, “Mgbọ keyi, soso, jeen̄ emi ujamgbugbo kwun̄.”
19 Okumugwem obebe Mosis, “Mârọ inyi otutuuk nnwọn n̄a iniraka owu me isi. Mâkitan̄a erieen̄ n̄a, Okumugwem, me isi kwun̄. Mârọ nsan me lek ene geelek òneneme emi irọrọ nsan. Mâkaan̄ njijin me lek ene geelek òneneme emi ikakaan̄ njijin.”
20 Okumugwem îtumu si inyi Mosis ibe, “Ire, owu òkpokọt imun̄ isi n̄a, mije, kpunu ogwu òbomun̄ emi, mè igat ugwem.”
21 Okumugwem onenitumu inyi Mosis ibe, “Kpọ, ere ge òwa me agba lek n̄a, na na keke me ere keyi me inyọn̄ ewuuk. 22 Mgbọ ujamgbugbo n̄a môkiraka, mâtap owu me agbagba ewuuk, mè isa ubọk n̄a ikana ichit owu, mege ire mgbọ mârakabe isan̄a. 23 Nsiraka isan̄a, mânenisan̄a ubọk n̄a isan̄a, owu mônenimun̄ udun̄ n̄a. Ire, isi n̄a, owu òkpomun̄.”