3 “ ‘Ire ngwugwa ya ire eyi eriembuuk ebewọwọp itaka iriọk, ene ya isa me otutuuk ejit kan̄ itet orie anam eyi kpunube ìroon̄ me lek isa inu me isotu Atanga Chinichini ya, isa inigwa ngwugwa me isi Okumugwem. 4 Ene ya môtoon̄ ubọk kan̄ me ibot anam ya, eyi ebesa igwa ngwugwa ewọwọp iriọk, sabum mênibọkọ anam ya me useen̄ kan̄, mè isa irọ esuuk me ibot kan̄. 5 Ene ya mônenigwu gwun̄ eriembuuk ya me isi Okumugwem, sabum bọn kè Erọn ebi ngwugwa mênenisa eje anam ya itọp igwook ikana me lek otutuuk agba owot ntook ngwugwa ya, me isotu Atanga Chinichini ya. 6 Ene ya môneninwuun̄ ikpa me lek anam ya, mè inibak ubọk ekibak anam. 7 Bọn kè Erọn ogwu ngwugwa mênenisọk ukan̄ me inyọn̄ ntook ngwugwa, mè itap iye me lek. 8 Bọn kè Erọn, ebi ngwugwa, mênenineen̄ okpọkọ anam cha me inyọn̄ ntook ngwugwa ya. Mêben ibot anam ya mè okpọn̄ kan̄ cha igwook me inyọn̄ iye esabe isọk ukan̄ ya me inyọn̄ ntook ngwugwa. 9 Ogwu ene ya mônenisa mun̄ igwọk otutuuk inu emen owot anam ya mè ukot kan̄ cha. Isigwọk isan̄a, ogwu ngwugwa mônenibọkọ otutuuk inu cha iwọp ikana oduku òkibubaan̄ olu me inyọn̄ ntook ngwugwa ya, inyi ire ngwugwa eyi ukan̄, eyi òkidun̄u utop olu òkibele Okumugwem ejit.

10 “ ‘Ire anam ene ya obosa inigwa ngwugwa inyi Okumugwem ìre gwun̄ arọọn̄ mè ìre gwun̄ ebot, anam ya môre orie eyi kpunube ìroon̄ me lek. 11 Ene ya môgwu anam ya me isi Okumugwem, me udun̄ ntook ngwugwa ya me agan̄ inyọn̄. Bọn kè Erọn, ebi ngwugwa, mênenisa eje anam ya itọp igwook ikana me lek otutuuk agba owot ntook ngwugwa ya. 12 Ene ya mônenibak anam ya igọọk me ubọk ekibak anam. Ogwu ngwugwa mônenineen̄ ibot anam ya melek okpọn̄ kan̄ me inyọn̄ iye òkup me ukan̄ me inyọn̄ ntook ngwugwa ya. 13 Ene ya môsa mun̄ igwọk inu emen owot anam ya melek ukot kan̄ cha. Ogwu ngwugwa mônenikpulu otutuuk cha iwọp ikana oduku òkibubaan̄ olu me inyọn̄ ntook ngwugwa ya, inyi ire ngwugwa eyi ukan̄, eyi òkidun̄u utop olu òkibele Okumugwem ejit.

14 “ ‘Ire ebesa unọn igwa ngwugwa ewọwọp iriọk inyi Okumugwem, ene ya môsa ekerekwukwu mè ìre gwun̄ elesia inigwa ngwugwa kan̄. 15 Ogwu ngwugwa mônenibọkọ unọn ya isa inu me inyọn̄ ntook ya, mè iniyaka ebek ifieek, mè itet ikaan̄, inyi eje kan̄ isibi isan̄a igwook me agba owot ntook ya, mè iniwọp ibot unọn ya itaka iriọk me inyọn̄ ntook ya. 16 Ene ya mônenisan̄a okpu unọn ya, mè otutuuk inu emen owot, mè itọp igwook me agba lek ntook ngwugwa ya me agan̄ mbum-ura me ere ekida ntọn̄ ònan̄a me inyọn̄ ntook ya igwook. 17 Ene ya mônenitet unọn ya me lek uwop agan̄ iba itaba igwaka, ire, ìkpogwaka isan̄a isi ge. Ogwu ngwugwa mônenibọkọ unọn ya itoon̄ me inyọn̄ iye òkup me ukan̄ me inyọn̄ ntook ngwugwa ya, mè iwọp ikana oduku òkibubaan̄ olu. Eyi ìre ngwugwa ewọwọp iriọk, mè ire si ngwugwa eyi ukan̄, eyi òkidun̄u utop olu òkibele Okumugwem ejit.