Ofifi ikan ofolek ngwugwa awọ
7
“Echichi ìre ikan òfo me lek ngwugwa awọ. Ngwugwa yi ìre ngwugwa òkup mbuban ichit. 2 Ere ekigwu anam ngwugwa ewọwọp iriọk, ere ya ke ebekigwu anam ngwugwa awọ, mè iben eje ònan̄a me lek anam ngwugwa yi itọp igwook ikana me lek otutuuk agba owot ntook ngwugwa ya. 3 Mêsan̄a otutuuk okpọn̄ anam ya isa igwa ngwugwa, bene me lek echi òkup me edim kan̄ ere òkup ufuk ufuk, mè okpọn̄ òkup me emen anam ya, 4 mè ichip iba òkup me okwut ebon kan̄ mè okpọn̄ òkup me lek ichip cha, mè isan̄a si ejit anam ya mè akwaan̄ òkakana ichit ejit ya, isa igbaalek ichip kan̄ cha. 5 Ogwu ngwugwa môneniwọp inu cha ikana oduku me inyọn̄ ntook ya, kubọk ngwugwa ukan̄ inyi Okumugwem. Eyi ìre ngwugwa awọ. 6 Enerieen̄ geelek me owot iman ebi ngwugwa môkọt irie inu ngwugwa keyi. Ìbokup me ere òkup mbuban irie inu ya, mije, îre inu òkup mbuban ichit.7 “Ikan yaage òkikpulu ngwugwa ijo inu, ọmọ si okikpulu ngwugwa awọ. Ogwu ngwugwa ogwu ògwagwa ngwugwa isasa irọ esuuk ya, ọmọ ke inorie òje me lek ngwugwa ya okup inyi. 8 Ikpa anam ònan̄a me lek anam ngwugwa ewọwọp iriọk ìkup inyi ogwu ngwugwa ogwu ògwagwa ngwugwa ya. 9 Inu ngwugwa akpa geelek ewọpbe me emen orioon̄ fituru, mè eyi etapbe me otin̄ item, mè eyi etapbe me uchieen̄ ikala, ìkup inyi ogwu ngwugwa ogwu ògwagwa ngwugwa ya. 10 Inu ngwugwa akpa geelek, echi etapbe aran̄ me lek, mè echi kpetap aran̄ me lek, ìre eyi otutuuk bọn ebirieen̄ kè Erọn, kpa ogwu mè uche kan̄.
Ngwugwa esuuk
11 “Echichi ìre ikan ofolek ngwugwa esuuk, eyi ebekigwa inyi Okumugwem. 12 Ire ene inigwa ngwugwa esuuk eyi isasa ibe Okumugwem onirọ, ene ya môsa fituru unin̄i unin̄i eyi kpunube olat me lek, esabe aran̄ igbaalek ifuku, mè nchicha kpetap olat, echiọọkbe aran̄ me lek, mè fituru esabe atalek akpa ekọkọk irọ mè itap aran̄ me lek, inigwa ngwugwa ya. 13 Ene ya môsa si fituru eyi etapbe olat me lek igbaalek inu, inyi esa egbaalek egwa ngwugwa esuuk eyi onirọ ya. 14 Me etete otutuuk inu ngwugwa cha, mêsan̄a ge ge isa igwa ngwugwa ya kubọk inyinyi inyi Okumugwem. Echi òsisik ìkup inyi ogwu ngwugwa ogwu òsasa eje anam ngwugwa esuuk ya igwook me lek ntook ngwugwa ya. 15 Ogwu òsasa ngwugwa esuuk ya inu isasa ibe Okumugwem onirọ, môtaka anam ya eyi òre ọmọ lek isan̄a me usen yaage, ìkpotele okpọkọ geege me lek iwele egwe.
16 “Ire, ire ngwugwa ya ije me lek inyan̄a-ibot eyi ene ya onyan̄abe, mè ìyaka ire inyinyi ata ejit, ene ya môkọt itaka uche anam eyi òre ọmọ lek me usen ya, mè itaka eyi òsisik me ofit iwele kan̄. 17 Anam ngwugwa ya geelek òkukup ire òso usen ita, ebewọwọp itaka iriọk. 18 Ire ene ya itaka anam ngwugwa esuuk ya eyi òsisik ire òso usen ita, Okumugwem ìkpobọkọ ngwugwa ya itap, ngwugwa ya si ìkayaka ìkaan̄ oruru ìnyi ogwu ògwagwa. Ngwugwa ya îkana mbuban inu, ene geelek òtataka anam ngwugwa ya me òso usen ita ya, ufialek geelek òje me lek ìbotoon̄ me ibot kan̄.
19 “Okpọkọ anam ya òchachak me lek mbuban inu geelek, kpebetaka, ebewọwọp itaka iriọk me ukan̄. Ire, anam ya geelek eyi mbuban ìkachaka me lek, ene geelek òkup me mbuban môkọt itaka. 20 Ire, ire ene geelek òchachaka mbuban initaka anam esabe igwa ngwugwa esuuk inyi Okumugwem, ebesasan̄a ene ya isan̄a me otu ifuk ebi kiban̄. 21 Ofifi si, ire ene ichak ubọk me lek mbuban inu geelek, mè ìre mbuban inu eyi ebilene, mè ìre eyi anam, mè ìre inu geelek òkichaka ene mbuban me lek, mè initaka anam esabe igwa ngwugwa esuuk inyi Okumugwem, ebesasan̄a ene ya isan̄a me otu ifuk ebi kiban̄.”
Awaji îgban irerie okpọn̄ mè eje
22 Okumugwem onenitumu inyi Mosis ibe 23 itumu inyi ebi Ijeren ibe, “Ene geege ikataka okpọn̄ geege ònan̄a me lek eriembuuk mè ìre arọọn̄, mè ìre ebot. 24 Enyi mêkọt isa okpọn̄ ònan̄a me lek anam geelek òkwukwu me lek kan̄, mè ìre eyi anam-unye ochimbe ikpan̄, irọ inu geelek òneneme enyi. Ire, ene geege ikataka okpọn̄ keya. 25 Ogwu geelek òtataka okpọn̄ ònan̄a me lek anam geelek eyi mêkọtbe isa igwa ngwugwa ukan̄ inyi Okumugwem, ebesasan̄a ene ya isan̄a me otu ifuk ebi kiban̄. 26 Ofifi si, me ere geelek enyi elukbe, ikalululuk ìrie eje geege, mè ìre eje unọn mè ìre eje anam. 27 Ene geelek òrerie eje geelek, ebesasan̄a ene ya isan̄a me otu ifuk ebi kiban̄.”
Uche inu ngwugwa eyi ebi ngwugwa
28 Okumugwem onenitumu inyi Mosis ibe 29 itumu inyi ebi Ijeren ibe, “Ene geelek òsasa ngwugwa esuuk inu ibonigwa inyi Okumugwem môsan̄a okpọkọ emen akpan me lek inu ngwugwa esuuk kan̄ ya isa inyi Okumugwem. 30 Ene ya môsa ubọk kan̄ imọnọ okpọkọ emen akpan ya inyi esa egwa ngwugwa ukan̄ enyi Okumugwem. Inu emen akpan ya ìre ngọ ejit anam ya melek otutuuk okpọn̄ òje me lek. Môsa ngọ ejit anam ya inyi, inyi ebene efo inyọn̄ mè ewuwum kubọk ngwugwa ewuwuwum me isi Okumugwem. 31 Ogwu ngwugwa môneniwọp okpọn̄ ya ikana oduku me inyọn̄ ntook ngwugwa ya. Ngọ ejit anam ya mônenikup inyi Erọn mè ebi bọn. 32 Enyi mêsa owut-ukot agan̄ ulom eyi anam ngwugwa esuuk inyi ebi ngwugwa kubọk inyinyi kinyi, 33 mije, bọn kè Erọn ebi ìgwogwook eje anam ya mè iwọp okpọn̄ anam ya mgbọ ekigwa ngwugwa esuuk ya, ema ekaan̄ owut-ukot agan̄ ulom anam ya kubọk uche eyi kiban̄. 34 Ngọ ejit anam ya eyi ebenebe ifo inyọn̄ mè iwuwum, melek owut-ukot eyi enyibe me inyinyi, ke emi mmọnọ me ubọk ebi Ijeren me lek ngwugwa esuuk kiban̄ isa inyi Erọn ogwu ngwugwa mè ebi bọn. Eyi ìre ikan òkup mgbọ geelek.”
35 Echichi ore uche kè Erọn mè uche ebi bọn ònan̄a me lek ngwugwa ukan̄ egwabe inyi Okumugwem, bene me usen esabe ema inu me isi Okumugwem kubọk ebi ngwugwa. 36 Ikeyi ke Okumugwem onyi ida ibe ebi Ijeren ekesa enyi ema bene me usen etọkọbe ema aran̄ me ibot. Eyi ìre ikan òbokup me ukot kiban̄ geelek.
37 Îre ikan kechi obokikpulu ngwugwa ewọwọp iriọk, mè ngwugwa akpa, mè ngwugwa ijo inu, mè ngwugwa awọ, mè ngwugwa ekigwa mgbọ ekifaka ikwaan̄ itap ene me ubọk, mè ngwugwa esuuk. 38 Ikan kechi ke Okumugwem onyi Mosis me inyọn̄ ogoon̄ Saina me emen èwê me usen înyibe ebi Ijeren ida ibe ekegwa ngwugwa kiban̄ enyi Okumugwem.