5 Mosis onenitumu inyi ema ibe, “Inu chi geelek ìre inu Okumugwem onyibe ida ibe erọ.” 6 Mosis onenigwen Erọn melek ebi bọn ebirieen̄ isibi me isi ebi ama, mè inisa mun̄ igwọk ema lek, 7 mè inimọnọ àwurukù irak itap Erọn, mè initobo ọmọ fanti me ebon, mè initap ọmọ àwurukù inyọn̄, mè iniben mgbidim ofọnti ikwaan̄ itap itoon̄ me inyọn̄, mè inisa fanti òje me lek mgbidim ofọnti ikwaan̄ ya itobo ofọnti ya ikam me lek kan̄, 8 mè iniben ekwut isi ejit ikwaan̄ ọmọ me lek, mè initeen̄ inu iba ebekisa iroon̄ nriroon̄, echi ekigwen Urim mè Tumim, itap me emen ekwut isi ejit ya, 9 mè iniben okpibot ogwu ngwugwa ichit ọmọ me ibot, mè inimọnọ akpakpa uwot alata araran̄ ya, òrere ọgbọn ubọọn̄ òkup mbuban, itobo me lek okpibot ya me agan̄ isi. Mosis ìrọ otutuuk inu chi igọọk me ike Okumugwem onyibe ọmọ ida.

10 Mosis onenisa aran̄ mbuban igbama me lek Akpatan̄ Mbuban melek otutuuk inu òje me lek, inyi ikup me mbuban inyi Okumugwem. 11 Înyan aran̄ ya mgbọ jaaba igwook me lek ntook ngwugwa isa igbama lek ntook ngwugwa ya, mè igbama si lek otutuuk nroon̄ òje me lek, mè isa si aran̄ ya igbama lek okwa igwọk-lek mè urak kan̄, inyi inu chi ikup me mbuban inyi Okumugwem. 12 Inenitọkọ si aran̄ ya igwook Erọn me ibot, inyi ire itọtọkọ ọmọ aran̄ me ibot, isa isun̄ ọmọ mbuban inyi Okumugwem.

13 Mosis onenisan̄a bọn ebirieen̄ kè Erọn isibi me isi ebi ama, mè initap ema àwurukù inyọn̄, mè itobo ema fanti me ebon, mè ifiaka ema akisi me ibot, ike Okumugwem onyibe ọmọ ida.

14 Mosis onenisa orie eriembuuk ngwugwa ijo inu isibi inu, Erọn mè ebi bọn enenitoon̄ ubọk kiban̄ me ibot eriembuuk ya. 15 Mosis onenikpan̄ eriembuuk ya, mè isa otubọk ilaka-aran̄ kan̄ ijiin̄ me emen eje anam ya, mè inisa ichak me lek iko ini òkup me lek ntook ngwugwa ya, isasa igwọk lek ntook ya, mè iniben eje eyi òsisik ifiin̄ me ebon ntook ya, inyi ikup me mbuban inyi Okumugwem, mè isa me ikeya irọ esuuk me lek ntook ya. 16 Inenisan̄a otutuuk okpọn̄ òkup me emen anam ya, mè isan̄a si akwaan̄ òchichit ejit anam ya, mè ichip iba kan̄ melek otutuuk okpọn̄ òje me lek kiban̄, mè ikpulu isi iwọp ikana oduku òkibubaan̄ olu me inyọn̄ ntook ya. 17 Ire, ikpukpulu otuuk eriembuuk ya, bene me lek ikpa kan̄, mè ufuk kan̄, mè otutuuk ifin emen okpu kan̄, isa isibi udun̄ ere m̀gba-ǹgwele ukan̄ ya isi iwọp itaka iriọk, ike Okumugwem onyibe ọmọ ida.

18 Mosis onenitaba orie arọọn̄ ngwugwa ewọwọp iriọk isibi inu, Erọn mè ebi bọn etotoon̄ ubọk me ibot orie arọọn̄ ya. 19 Mosis onenigwu arọọn̄ ya, mè inisa eje kan̄ itọp igwook ikana me lek otutuuk agba owot ntook ngwugwa ya, 20 mè inibak anam ya igọọk me ubọk ekibak anam, mè iben ibot kan̄ mè otutuuk okpọkọ anam cha mè okpọn̄ kan̄ iwọp ikana oduku òkibubaan̄ olu me inyọn̄ ntook ya. 21 Inenisa mun̄ igwọk inu emen owot kan̄ cha, mè ukot kan̄ cha, mè iniwọp si echicha iriọk. Sa me ikeya ke Mosis owọp otutuuk orie arọọn̄ ya ikana oduku me inyọn̄ ntook kubọk ngwugwa ewọwọp iriọk eyi òkidun̄u utop olu, mije, îre ngwugwa ukan̄ ewọpbe inyi Okumugwem. Mosis ìrọ otutuuk inu chi kubọk Okumugwem onyibe ọmọ ida.

22 Mosis onenitaba orie arọọn̄ eyi òso iba inu. Eyi ìre anam ebekpan̄ isa ifaka ikwaan̄ itap Erọn mè ebi bọn me ubọk. Erọn mè ebi bọn enenitoon̄ ubọk kiban̄ me ibot anam ya. 23 Mosis onenigwu arọọn̄ ya, mè inisa usini eje kan̄ ichak me agan̄ ijọn̄ inwan̄ utọn̄ agan̄ ulom kè Erọn, mè isa ichak si me otubọk ile agan̄ ulom kan̄, mè isa si ichak me otukot ile agan̄ ulom kan̄. 24 Mosis onenisan̄a bọn ebirieen̄ kè Erọn isibi, mè inisa si eje ya ichak me agan̄ ijọn̄ inwan̄ utọn̄ agan̄ ulom kiban̄, mè isa si ichak me otubọk ile agan̄ ulom, mè isa ichak si me otukot ile agan̄ ulom kiban̄, mè iniben eje eyi òsisik itọp igwook ikana me lek otutuuk agba owot ntook ngwugwa ya. 25 Mosis onenisan̄a okpọn̄ ònan̄a me lek arọọn̄ ya, mè edim kan̄ ere ufuk ufuk, mè okpọn̄ òkup me lek otutuuk inu emen owot kan̄, mè akwaan̄ òchichit ejit kan̄, mè ichip iba arọọn̄ ya melek okpọn̄ òje me lek, mè ukot kan̄ agan̄ ulom. 26 Inenikpọ me emen okwun ekisa itap fituru kpunube olat me lek eyi òkup me isi Okumugwem, mè imọnọ owut fituru unin̄i unin̄i ge eyi kpetap olat me lek, mè fituru ge eyi etapbe aran̄ me lek, mè akpọk nchicha ge, mè inikpulu otutuuk inu cha itoon̄ me inyọn̄ okpọn̄ mè ukot agan̄ ulom arọọn̄ ya, 27 mè inikpulu otutuuk inu cha itap me akajit ubọk iba kè Erọn, mè akajit ubọk ebi bọn. Erọn mè ebi bọn enenibene inu cha ifo inyọn̄ mè iwuwum kubọk ngwugwa ewuwuwum me isi Okumugwem. 28 Mosis onenibọkọ inu cha me ubọk kiban̄ isa igbaalek ngwugwa ewọwọp iriọk òkup me inyọn̄ ntook ngwugwa ya, mè iniwọp ikana oduku. Eyi ìre ngwugwa isasa ifaka ikwaan̄ itap ene me ubọk, mè ire si ngwugwa ukan̄ ewọpbe inyi Okumugwem, eyi òkidun̄u utop olu òkibele Okumugwem ejit. 29 Mosis onenimọnọ ngọ ejit arọọn̄ ya ibene ifo inyọn̄ mè iwuwum kubọk ngwugwa ewuwuwum me isi Okumugwem. Eya ìre uche òkup inyi Mosis me lek arọọn̄ ngwugwa esabe ifaka ikwaan̄ itap ene me ubọk, kubọk Okumugwem onyibe Mosis ida.

30 Mosis onenitọkọ aran̄ mbuban ya, mè isa si usini eje ònan̄a me inyọn̄ ntook igbaalek, mè inisa inyan igwook me lek kè Erọn mè lek ofọnti kan̄, mè isa inyan si me lek ebi bọn mè lek ofọnti kiban̄. Sa me ikeyi ke Mosis ogbama Erọn lek, mè igbama si lek ofọnti kan̄, mè igbama si lek ebi bọn mè lek ofọnti kiban̄, inyi ema ekup me mbuban enyi Okumugwem.

31 Mosis onenitumu inyi Erọn mè ebi bọn ibe, “Ìtem anam ya eyi òsisik me isotu Atanga Chinichini, mè ìsa si fituru òkup me emen okwun esabe itap fituru ngwugwa ifafaka ikwaan̄ itap ene me ubọk ya ìgbaalek, mè ìkup me isotu Atanga Chinichini ya ìrie. Ikeyi ke Okumugwem onyi emi ida ibe Erọn mè ebi bọn erie inorie ngwugwa yi. 32 Anam mè fituru geelek òsisik, ebewọwọp iriọk. 33 Owu melek nsabọn kwun̄, ikanan̄a me Atanga Chinichini yi ìsibi oyet, mege usen jaaba môsobe me lek erọbe enyi ebi ngwugwa. Mije, mfaka eyi isasa ifaka ikwaan̄ itap enyi me ubọk ìre usen jaaba. 34 Îre Okumugwem onyi ida ibe eji erọ inu chi geelek eji erọbe cherekeyi, inyi esa erọ esuuk me ibot kinyi. 35 Enyi ebekup me agba lek isotu Atanga Chinichini yi, eririeen̄ mè ikarek, mege usen jaaba ya môsobe, mè ikirọ otutuuk inu Okumugwem onyibe ida ibe enyi ekerọ, inyi enyi ekakwaan̄. Îre ikeyi ke Okumugwem onyi emi ida ibe emi ǹlook enyi.” 36 Erọn mè ebi bọn erọrọ otutuuk inu cha geelek Okumugwem onyibe ida inan̄a me otu kè Mosis.