Ebi ngwugwa mîbene ikwaan̄ kiban̄
9
Me òso usen jeeta, Mosis onenigwen Erọn mè ebi bọn, mè igwen si ebi ugane Ijeren ititiin̄, 2 mè initumu inyi Erọn ibe, “Tet gwun̄ orie eriembuuk ge eyi owu môsabe igwa ngwugwa ijo inu, mè tet si orie arọọn̄ ge eyi owu môsabe igwa ngwugwa ewọwọp iriọk, mè sa ema na me isi Okumugwem. Anam iba chi mêre echi kpekaan̄ ìroon̄ geege me lek. 3 Tumu nyi ebi ugane Ijeren ibe etet orie ebot ge ebesa igwa ngwugwa ijo inu, mè etet si gwun̄ orie eriembuuk ge òsoso acha ge, mè gwun̄ arọọn̄ ge òsoso acha ge, echi kpunube ìroon̄ geege me lek, echi mêsabe igwa ngwugwa ewọwọp iriọk, esa enu. 4 Tumu nyi ema si ibe etet eriembuuk ge, mè arọọn̄ ge echi mêsabe igwa ngwugwa esuuk me isi Okumugwem. Be ema esa si akpa ekọkọk etapbe aran̄ me lek enu, inyi mêsabe igwa ngwugwa akpa inyi Okumugwem. Tumu nyi ema ibe ekalọ irọrọ otutuuk inu chi, mije ke Okumugwem môsibi inichichini melek kiban̄ cherekeyi.”5 Ema esasa otutuuk inu cha inu me isi Atanga Chinichini, ike Mosis onyibe ema ida. Otutuuk ebi Ijeren etititiin̄ me isi Okumugwem. 6 Mosis onenitumu inyi ema ibe, “Eyi ìre inu Okumugwem otumube ibe enyi erọ, inyi ujamgbugbo kan̄ isibi inu inichichini melek kinyi.”
7 Mosis onenitumu inyi Erọn ibe, “Je si lek ntook ngwugwa si gwa ngwugwa ijo inu mè ngwugwa ewọwọp iriọk me ibot kwun̄, mè sa me ikeya rọ esuuk me ibot kwun̄ mè ibot ebi Ijeren. Sa si inu ngwugwa ebi Ijeren esabe inu cha gwa ngwugwa me ibot kiban̄ sa rọ esuuk me ibot kiban̄, ike Okumugwem onyibe ida.”
8 Erọn onunu me lek ntook ngwugwa ya, mè inigwu gwun̄ eriembuuk ya ge isa igwa ngwugwa ijo inu eyi ibot kan̄. 9 Ebi bọn esasa eje anam ya îgwube ijet ọmọ, isasa otubọk ilaka-aran̄ kan̄ ijiin̄ me emen eje ya, mè isa ichak me lek iko ini eyi ntook ngwugwa ya, mè iniben eyi òsisik igwook me ebon ntook ngwugwa ya. 10 Inenisan̄a okpọn̄ anam ngwugwa ijo inu ya mè ichip iba kan̄ mè akwaan̄ òchit ejit kan̄ iwọp ikana oduku òkibubaan̄ olu me inyọn̄ ntook ya, kubọk Okumugwem onyibe Mosis ida, 11 mè inikpulu ufuk anam ya mè ikpa kan̄ isibi ifo udun̄ ere m̀gba-ǹgwele ukan̄ ya isi itap ukan̄ iwọp itaka iriọk.
12 Erọn onenigwu anam ngwugwa ewọwọp iriọk ya, ebi bọn esasa eje anam ya ijet ọmọ, ibọbọkọ itọp igwook ikana me lek otutuuk agba owot ntook ngwugwa ya. 13 Ebi bọn esasa si anam ngwugwa ewọwọp iriọk ya ijet ọmọ me okpọkọ me okpọkọ, ibọbọkọ, mè iwọp otutuuk, igbaalek ibot kan̄, ikana oduku me inyọn̄ ntook ngwugwa ya. 14 Inenisa mun̄ igwọk inu emen owot mè ukot kan̄ cha, mè iben itoon̄ me inyọn̄ ntook ya igbaalek inu ngwugwa ewọwọp iriọk cha, mè iwọp otutuuk ikana oduku.
15 Erọn onenisa anam ngwugwa otutuuk ebi Ijeren ya inu, mè inimọnọ orie ebot ya eyi ebesa igwa ngwugwa ijo inu me ibot otutuuk ebi Ijeren, mè igwu, mè isa igwa ngwugwa ijo inu kubọk îgwabe eyi ibot kan̄.
16 Inenisa anam ngwugwa ewọwọp iriọk inu, mè isa igwa si ngwugwa keya igọọk ubọk igwagwa keya. 17 Inenisa si inu ngwugwa akpa inu, mè inigwọ ubọk ge iwọp ikana oduku òkibubaan̄ olu me inyọn̄ ntook ngwugwa ya. Eyiyi ìre ngwugwa îgwabe igbaalek ngwugwa ewọwọp iriọk eyi ewelegwe.
18 Inenigwu orie eriembuuk ge mè orie arọọn̄ ge echi ebesa igwa ngwugwa esuuk me ibot otutuuk ebi Ijeren. Ebi bọn esasa eje anam cha ijet ọmọ, ibọbọkọ, mè iben itọp igwook ikana me lek otutuuk agba owot ntook ngwugwa ya. 19 Erọn onenikpulu okpọkọ eriembuuk ya melek okpọkọ orie arọọn̄ ya echi okpọn̄ ojotbe me lek cha, òrere igbo edim kiban̄ ere òkup ufuk ufuk mè okpọn̄ òkup me lek, mè ichip kiban̄ mè akwaan̄ òchichit ejit kiban̄ cha, 20 mè inikpulu otutuuk itoon̄ me inyọn̄ ngọ ejit anam cha, mè iwọp ema otutuuk ikana oduku me inyọn̄ ntook ya. 21 Erọn onenibene ngọ ejit anam iba cha melek ukot agan̄ ulom kiban̄ cha ifo inyọn̄, mè iwuwum kubọk ngwugwa ewuwuwum inyi Okumugwem, kubọk Mosis onyibe ida.
22 Mgbọ Erọn ogwabe otutuuk ngwugwa ijo inu mè eyi ewọwọp iriọk mè eyi esuuk cha isan̄a, ibebene ubọk ida ebi Ijeren, mè igbana ema, mè ininan̄a me ere ntook ya ikwala isibi.
23 Mosis mè Erọn enenije inin̄ emen Atanga Chinichini, mè iyaka igwu ikom inan̄a isibi, inigbaan̄ igbana ebi Ijeren. Ujamgbugbo eyi Okumugwem okakana isibi me isi otutuuk ebi Ijeren. 24 Mgbọ yaage, ukan̄ onanan̄a me isi Okumugwem isibi, mè ilomo itoon̄ me inyọn̄ ntook ya, mè itaka ngwugwa ewọwọp iriọk ya mè okpọn̄ cha. Otutuuk ebi Ijeren emumun̄, mè ibọn̄ ukpo inwọọn̄ unwọọn̄, mè irurọn̄ọ ikana isi ichit me ijọn̄.