4 “Ire, îkaan̄ usini anam òkigọkọ inu itaka gaalek, ire, ìkabum otukot, mè ikaan̄ si usini echi òbubum otukot, ire, ìkakigọkọ inu ìtaka. Anam òkup ikechi, enyi kpebetaka. Aligọ, enyi kpebetaka, mije, ìkekigọkọ inu itaka, ire, ìkabum otukot. Eya orọ, môchaka enyi mbuban me lek. 5 Ikpi emen ewuuk, ikataka, mije, ìkekigọkọ inu itaka, ire, ìkabum otukot. Eya orọ, môchaka enyi mbuban me lek. 6 Ejook, ikataka, mije, ìkekigọkọ inu itaka, ire, ìkabum otukot. Eya orọ, môchaka enyi mbuban me lek. 7 Okodi, ikataka, mije, otukot kan̄ îbum iba, ire, ìkakigọkọ inu ìtaka. Eya orọ, môchaka enyi mbuban me lek. 8 Ikakitaka otutuuk anam chi, ikachachak si ubọk me lek nkwukwu kiban̄, mije, ema mêchaka enyi mbuban me lek.

9 “Me etete otutuuk inu òkiluk me emen mun̄, enyi mêkọt itaka irin̄ geelek òkaan̄ uwop mè ikaan̄ si ikpọk me lek, mè ikiluk me emen mun̄ me okwaan̄ ile mè okolo. 10 Ire, inu geelek òkup me okwaan̄ ile mè ìre me okolo eyi ikakaan̄ge uwop mè ikpọk me lek, mè ìre inu òkinyinyọnọ ikana me emen mun̄, mè ìre ofifi chieen̄ inu geelek òkup me emen mun̄, ikataka. Echichi ìbore mbuban inu me lek kinyi. 11 Ikataka inu chi geege, ikachachak si ubọk me lek nkwukwu kiban̄, mije, echichi ìre mbuban inu me lek kinyi. 12 Inu geelek òkup me emen mun̄ eyi ìkakaan̄ uwop mè ikpọk me lek, ìre mbuban inu me lek kinyi.

13 “Me etete unọn òwulu me inyọn̄, echichi ìbore mbuban inu isa inyi enyi, enyi kpebetaka ema. Enyi kpebetaka igo, mè edene ofifit, mè edene isọọn̄ ibot, 14 mè mkpukpo araran̄, mè chieen̄ mkpukpo ofifit geelek, 15 mè chieen̄ amaan̄ geelek òkup esese esese, 16 mè wukuwuku, mè ikwurikwu, mè akaba, mè chieen̄ akwanakwa geelek, 17 mè ikwurikwu ǹkeme ǹkeme, mè igo mgbidim otu, mè ikwurikwu iko ibot, 18 mè ikwurikwu okuket, mè ikwurikwu emen èwê, mè edene yalayala akukọ, 19 mè aba mbese, mè chieen̄ aba okuket geelek, mè uchabat akukọ ibot, mè afian̄.

20 “Otutuuk asabọn inu geelek òkiwulu me inyọn̄, mè ikije me ukot ini me ijọn̄, ìbore mbuban inu me lek kinyi. 21 Ire, me etete asabọn inu chi òkiwuwulu, echi enyi mêkọtbe itaka ìre echi òkaan̄ ukot ini ema ekisa ije, mè ikaan̄ si ukot ile iba echi ema ekisa irama ikana mgbọ ema isikisọọk me ijọn̄. 22 Eya orọ, enyi mêkọt itaka chieen̄ akaka ituuk geelek, mè chieen̄ ogaan̄ nsabọn geelek, mè chieen̄ arian̄ geelek, mè chieen̄ ata akaka geelek. 23 Ilọ me lek kechi, otutuuk asabọn inu geelek òkiwuwulu, mè ikaan̄ ukot ini, ìbore mbuban inu me lek kinyi.

24 “Inu chi môchaka enyi mbuban me lek. Ene geelek òchachak ubọk me lek nkwukwu kiban̄ îchaka mbuban me lek kan̄ mege ire ikakwun̄. 25 Ene geelek òmọmọnọ nkwukwu kiban̄ ìbogwọgwọk ekwut mè ofọnti òkup ọmọ me lek. Ene ya si îchaka mbuban me lek kan̄ mege ire ikakwun̄.

26 “Anam geelek otukot kan̄ ikabumge iba ìsan̄a, mè anam geelek eyi ìkakigọkọ inu ìtaka, anam chi ìbore mbuban inu me lek kinyi. Ogwu geelek òchachak ubọk me lek anam òkup ikecha îchaka mbuban me lek kan̄. 27 Ubọk yaage, anam geelek òkaan̄ ukot ini, mè ikisa akajit ukot ijak me ijọn̄ ije ije ìre mbuban inu me lek kinyi. Ogwu geelek òchachak ubọk me lek nkwukwu anam òkup ikecha îchaka mbuban me lek kan̄ mege ire ikakwun̄. 28 Ogwu geelek òbeben nkwukwu anam òkup ikechi ìbogwọgwọk ekwut mè ofọnti òkup ọmọ me lek. Ene ya si îchaka mbuban me lek kan̄ mege ire ikakwun̄. Anam cha ìre mbuban inu me lek kinyi.

29 “Me etete asabọn anam geelek òkililibi ikana me ijọn̄, echi òre mbuban inu me lek kinyi ìre ikpi, mè ejook, mè chieen̄ ifa geelek, 30 mè oban-uwu, mè uta, mè okpọk, mè okpọk oron, mè okube. 31 Asabọn anam kechi geelek ìre mbuban inu me lek kinyi. Ogwu geelek òchachak ubọk me lek nkwukwu ge me lek anam chi îchaka mbuban me lek kan̄ mege ire ikakwun̄. 32 Ire ge me lek anam chi ikwu, mè irọn̄ me inyọn̄ inu geelek, mbuban môchaka me lek inu ya, mè ìre inu esabe uti irọ, mè ìre ekwut, mè ìre ikpa anam, mè ìre ekwut ufieejit. Nroon̄ ikwaan̄ geelek esabe inu òkup ikechi irọ, eyi nkwukwu anam ya orọn̄be itoon̄ me lek, mbuban îchaka me lek mege ire ikakwun̄. Mêben inu ya itap me mun̄ mege ire ikakwun̄, sabum mônenitana. 33 Ire ge me lek anam chi irọn̄ inin̄ emen otin̄ ibat, mbuban îchaka me lek inu geelek òkup me emen otin̄ ibat ya. Otin̄ ibat ya si me lek kan̄, ebubum. 34 Ire mun̄ ònan̄a me emen otin̄ ya igwook me lek inorie geelek eyi mêkọtbe irie, mbuban îchaka me lek inorie ya. Inu inwọnwọ geelek eyi mêkọtbe inwọ, eyi ònan̄a si me emen otin̄ ya, mbuban îchaka si me lek. 35 Ire nkwukwu ge me lek anam chi irọn̄ itoon̄ me lek inu geelek, mbuban îchaka me lek inu ya. Ire ke îre orioon̄ fituru mè ìyaka ire okpungwu ebobot ke îrọn̄ itoon̄ me lek, mbuban îchaka me lek. Orioon̄ fituru keya mè okpungwu keya, ebubum. Ema ìre mbuban inu me lek kinyi. 36 Ire, ire ge me lek asabọn anam chi irọn̄ inin̄ emen ògbugbuk mun̄, mè ìre emen udọn̄ erọkọbe isa ikitap mudim, mbuban ìkachaka me lek mudim ya. Ire, mbuban îchaka me lek ene geelek ogwu òmọmọnọ nkwukwu anam ya isan̄a me emen mun̄ ya. 37 Ire nkwukwu anam ge me lek anam chi irọn̄ itoon̄ me lek ukwuuk uti eyi ebesasa isi iwop, mbuban ìkachaka me lek ukwuuk uti ya. 38 Ire, ire mîgwook mun̄ me lek ukwuuk uti ya sabum nkwukwu anam ya onirọn̄ itoon̄ me lek, mbuban îchaka me lek ukwuuk uti ya. Îkana mbuban inu me lek kinyi.

39 “Ire ge me lek anam echi enyi mêkọtbe itaka inigak ikwu, ene geelek òchachak ubọk me lek nkwukwu kan̄ îchaka mbuban me lek kan̄ mege ire ikakwun̄. 40 Ire ikaan̄ ogwu òtataka nkwukwu anam ya, ene ya ìbogwọgwọk ofọnti mè ekwut òkup ọmọ me lek, mè ichaka si mbuban me lek kan̄ mege ire ikakwun̄. Ogwu geelek òbeben nkwukwu anam ya, ìbogwọgwọk ofọnti mè ekwut òkup ọmọ me lek, mè ichaka si mbuban me lek kan̄ mege ire ikakwun̄.

41 “Inu geelek òkinyinyọnọ ikana me ijọn̄ ìbore mbuban inu me lek kinyi. Enyi kpebetaka ema geege. 42 Asabọn anam geelek òkisa owot inyiọọn̄ me ijọn̄, mè echi òkisa ukot ini ije, mè ìre echi òkisa ogbogbo ukot ije, enyi kpebetaka. Ema ìre mbuban inu. 43 Ikataka geege me lek anam chi, mè ìfifila lek kinyi. Ikasa me lek anam chi ìchaka mbuban me lek kinyi. Ikachechieek si ibe anam chi ichaka enyi mbuban me lek. 44 Mije, emi nre Okumugwem Awaji kinyi. Ìsun̄ lek kinyi esese, mè ìkup me mbuban, mije, emi ǹkup me mbuban. Ikasa me lek asabọn anam chi geelek òkije ikana me ijọn̄ ìchaka mbuban me lek kinyi. 45 Mije, îre emi Okumugwem nsan̄a enyi isibi me ido Ijipiti, inyi emi mârebe Awaji inyi enyi. Eya orọ, ìkup me mbuban, mije, emi ǹkup me mbuban.

46 “Eyiyi ore ikan ofolek anam geelek, mè unọn geelek, mè inu geelek òkaan̄ efuuk ugwem, mè iluk me emen mun̄, mè echi òkije ikana me inyọn̄ ijọn̄. 47 Emi ǹnyi enyi ikan chi isasa iche inu òkichaka mbuban isan̄a me lek inu echi ìkakichaka mbuban, mè iche si anam echi enyi mêkọtbe itaka isan̄a me lek echi enyi kpetakabe.”