Igwọgwọk lek uman-gwun̄
12
Okumugwem onenitumu inyi Mosis ibe 2 itumu inyi ebi Ijeren ibe, “Ogwu enenwaan̄ geelek òninin̄ owot iman gwun̄ enerieen̄ môkaan̄ orieen̄ me lek mege usen jaaba, ike îkikaan̄ orieen̄ me lek onyan̄ geelek mgbọ îkikup me irek ebibaan̄. 3 Me òso usen jeeta, mêfieek gwun̄ ya afi. 4 Bene me usen keya, ogwu enenwaan̄ ya môkup me irek okọbọm akọp usen ita mè ita, inyi lek kan̄ ichat, sabum ọmọ mônenitana. Ìkpochak ubọk me lek inu geege òkup me mbuban. Ìkposi si Uwu Mbuban mege otu ifuk usen òbọk kan̄ môsobe. 5 Ire, ire gwun̄ enenwaan̄ ke îman, orieen̄ môkup me lek kan̄ nde iba, ike îkikup onyan̄ geelek mgbọ îkikup me irek ebibaan̄. Nde iba ya isiso, ọmọ môkup me irek okọbọm akọp usen gweregwen mè gweregwen, inyi lek kan̄ ichat sabum ọmọ mônenitana.6 “Otu ifuk usen òbọk kan̄ isiniso me lek gwun̄ ya îmanbe, mè ìre gwun̄ enerieen̄ mè ìre gwun̄ enenwaan̄, ogwu enenwaan̄ òman gwun̄ ya mônenititiin̄ inu ngwugwa isa ijet ogwu ngwugwa me isotu Atanga Chinichini. Inu ngwugwa cha ìbore gwun̄ arọọn̄ acha ge eyi mêsabe igwa ngwugwa ewọwọp iriọk, mè gwun̄ elesia ge mè ìyaka ire ekerekwukwu ge eyi mêsabe igwa ngwugwa ijo inu. 7 Ogwu ngwugwa mônenibọkọ inu ngwugwa cha, mè isa igwa ngwugwa inyi Okumugwem, isasa irọ esuuk me ibot ogwu enenwaan̄ òman gwun̄ ya, inyi mbuban ita ọmọ me lek. Sa me ikeyi, ke ogwu enenwaan̄ ya obosa isibi me irek okọbọm kan̄. Echichi ore ikan òkup inyi enenwaan̄ òman gwun̄ enerieen̄ mè ìre gwun̄ enenwaan̄. 8 Ire ubọk ogwu enenwaan̄ òman gwun̄ ya ìkasoon̄ gwun̄ arọọn̄, môkọt isa ekerekwukwu iba mè ìre asabọn elesia iba inu me useen̄, inyi esa ge egwa ngwugwa ewọwọp iriọk, mè esa eyi keyilọ egwa ngwugwa ijo inu. Sa me ikeyi ke ogwu ngwugwa ya môsa irọ esuuk me ibot ogwu enenwaan̄ òman gwun̄ ya, inyi mbuban ita me lek.”