Eje ìre mbuban inorie
17
Okumugwem onenitumu inyi Mosis ibe 2 ilook Erọn mè ebi bọn ebirieen̄, mè ilook si otutuuk ebi Ijeren ibe ke Okumugwem ìnyi ida ibe, 3 “Ogwu ototun̄ ukan̄ kè Ijeren geelek ògwugwu anam ngwugwa, mè ìre orie eriembuuk, mè ìre gwun̄ arọọn̄, mè ìre ebot me emen ere m̀gba-ǹgwele ukan̄ mè ìyaka ire me udun̄ ama, 4 mè ìkasa ìnu me isotu Atanga Chinichini ìnisa ìgwa ngwugwa ìnyi Okumugwem me isi Akpatan̄ Mbuban Okumugwem, eje òwa me ubọk ene ya, mije, îfiat eje. Ebesasan̄a ene ya isan̄a me otu ifuk ebi kiban̄. 5 Ikan keyi môrọ inyi ebi Ijeren ekesa ngwugwa kiban̄ geelek eyi ema ekisi igwa me emen oron cha ekenenyi ogwu ngwugwa ikigwa inyi Okumugwem me otu isotu Atanga Chinichini, inyi ema ekesa anam cha ekegwa ngwugwa esuuk enyi Okumugwem. 6 Ogwu ngwugwa mônenisa eje anam cha itọp igwook me lek ntook ngwugwa Okumugwem me otu isotu Atanga Chinichini, mè iniwọp otutuuk okpọn̄ ònan̄a me lek anam cha ikana oduku, inyi idun̄u utop olu òkibele Okumugwem ejit. 7 Ikan yi si môrọ inyi ebi Ijeren ekayaka ìkigwa ngwugwa kiban̄ ìnyi ebi kè ijo erumun̄ cha òbet lek orie ebot, echi ema ekitele Okumugwem, mè ikisi igọọk ifaka. Eyi ìre ikan òbokup ire mgbọ geelek me ukot kinyi geelek.8 “Tumu si nyi ema ibe, ene geelek me ototun̄ ukan̄ kè Ijeren mè ìre ogwu ichen òluk me etete kiban̄ ogwu òbogwa ngwugwa ewọwọp iriọk, mè ìyaka ire ofifi chieen̄ ngwugwa geelek, 9 mè ìkasa ìnu me otu isotu Atanga Chinichini ìnigwa ìnyi Okumugwem, ebesasan̄a ene ya isan̄a me otu ifuk ebi kiban̄.
10 “Ogwu ototun̄ ukan̄ kè Ijeren geelek, mè ìre ogwu ichen geelek òluk me etete kiban̄, òrerie eje anam geelek, îre emi me lek n̄a mbakana isi ikweek ene ya, mè isan̄a ọmọ isan̄a me otu ifuk ebi kiban̄. 11 Mije, ugwem inu geelek òkifuuk efuuk ìkup me emen eje. Emi si ǹsasa eje inyi enyi ibe esa erọ esuuk me ibot kinyi me inyọn̄ ntook ngwugwa, mije, îre eje okirọ esuuk me ibot ebek ugwem ene. 12 Îre mije keyi ke ntumu inyi ebi Ijeren ibe ene geege me etete kinyi ikarie eje, mè itumu si inyi ogwu ichen geelek òluk me etete kinyi ibe ikarie eje.
13 “Eya orọ, ogwu Ijeren geelek mè ìre ogwu ichen òluk me etete kiban̄ òsisi ota, mè ikpan̄ anam mè ìre unọn eyi ìkakaan̄ mbuban me lek, ene ya môgwook eje anam ya mè ìre eje ofut ya me ijọn̄, mè igwọ achiaan̄ ijọn̄ isa ichit eje ya. 14 Mije, ugwem inu geelek òkifuuk efuuk ìkup me emen eje kan̄. Eya orọ ntumube inyi ebi Ijeren ibe ekarie eje anam geege, mije, eje ore ugwem inu geelek. Mije keyi, ene geelek òrerie eje, ebesasan̄a ene ya isan̄a me otu ifuk ebi n̄a.
15 “Gwun̄ owot Ijeren geelek, mè ìre ogwu ichen geelek òluk me etete kiban̄, òtataka nkwukwu anam geelek òkwukwu me lek kan̄, mè ìre eyi anam-unye ochimbe ikpan̄, ene ya môgwọk ofọnti kan̄ mè iken mun̄, mè ikaan̄ mbuban me lek mege ire ikakwun̄, sabum mbuban ònota ene ya me lek. 16 Ire, ire ene ya ìkagwọk ofọnti kan̄ mè ìken mun̄ ìgwọk akpalek kan̄, ufialek mkpaka-ibot kan̄ ìbotoon̄ ọmọ me ibot.”